英王麵包店 A1-Bakery：一抹茶香

本身唔喺抹茶控，不過，一樣鍾意食抹茶做嘅任何甜品。返歸途中，經過「A1」，老婆話請我食蛋糕，無理由唔賞面嘅，眾多款式中，見呢款抹茶蛋糕頗有層次，所以，就點中佢。

之前都曾經試過佢哋嘅藍莓撻及藍莓芝士餅，覺得用料實淨，質素唔錯，所以，對今次件抹茶蛋糕都有信心。之前，買兩件會有個紙盒，今次買一件就有個靚集紙袋，並附上膠叉，總好過上次晌Niji Bistro買兩件蛋糕，都只喺好求其一個紙袋裝住，完全無為外賣蛋糕做準備，但卻歡迎外賣。

宇治抹茶蛋糕 $26

數一數，有7層之多，包括抹茶海綿蛋糕、抹茶忌廉、紅豆蓉忌廉及面層嘅抹茶軟漿，但唔明點解蛋糕牌喺寫抹茶手指餅，睇同食都喺海綿蛋糕囉。老實講，個蛋糕嘅味道及口感都好豐富，海綿蛋糕好軟綿，抹茶忌廉及抹茶軟漿好有香濃抹茶味，但就未喺話去到好甘苦嗰種，而中間嘅紅豆蓉忌廉就嫌紅豆極少，突出唔到紅豆嘅清甜，不過，整體都屬有水準嘅出品。

有時，晌啲出名高級啲嘅餅店買件法式靚餅，動輒都四十幾蚊起標，有時都唔絕對一定喺好。近年，唔少連鎖本地薑賣嘅凍餅，唔單質素提升咗好多，用料有亮點，仲定價相宜，所以，唔需盲目話外國月亮圓啲。

個人評分
味道：8/10
環境：6/10
服務：7/10
抵食：8/10
平均每人消費：HK$26

餐廳資料：
英王麵包店 A1-Bakery
樂富港鐵樂富站L0F10號舖
2670 8618