金記冰室 Kam Kee Cafe：金非昔比？

今個中秋節所品嚐嘅月餅唔多，唔喺親友送嘅，就喺朋友俾，又或者同事拎返嚟公司一齊分享。所試到嘅大多數都喺奶皇，少部份喺傳統嘅蓮蓉或豆沙餡。如果講到最懷舊就要數到伍仁，依個年頭真喺唔喺個個識欣賞，偏偏我老婆佢又鍾意喎，因為少蓮蓉，而果仁對身體有益，佢話如果無埋啲金腿就完美喇！

正正就收到朋友嘅一盒「金腿伍仁月餅」，出自「金記冰室」嘅出品，唔單口味懷舊，就連個包裝都翻返去60、70年代，硬皮紙盒，嫦娥公仔。打開包裝盒，一盒4個，個個都好墜手，斤兩十足，全以獨立包裝，衞生乾淨。

其實，依一款月餅印象中兩年前都食過一次，今次再食，感覺無乜點走樣。餅面清晰印住金記冰室1967字樣，烘得金黃，切開睇到餅皮做得薄，填滿各種餡料，堆滿果仁之外，更加入乾果，仲食到一絲絲金華火腿絲，口感極之豐富。

今非昔比並唔喺指舊事物好過還是差過依家，只喺時代變化，有啲嘢無得比，正所謂今時唔同往日。雖然伍仁月餅未必喺「仁」見人愛，但仍有唔少知音人，就好似我老婆，佢就讚好食。早前就睇報紙有段小新聞，話內地網購最多嘅月餅竟然喺伍仁，孰真孰假真喺唔知，只當一則趣聞而已。

個人評分
味道：7/10
環境：- /10
服務：- /10
抵食：- /10
平均每人消費：HK$0（朋友送贈）

餐廳資料：
金記冰室 Kam Kee Cafe
銅鑼灣霎東街5號地下
2206 4448