Burgeroom：奇珍異堡

七、八十蚊食個漢堡唔喺咩驚奇事，近年不斷湧現漢堡包店，講緊唔喺三、四十蚊一個餐嗰種，而喺單買個包都七、八十，甚至過百，但仍然有唔少人幫襯，願意以金錢換嚟高質素嘅漢堡。Burgeroom在港原來都開業10年，能賣高檔嘅漢堡一直維持咁多年，必然有其個人之處。

開放式嘅門面，一室粗獷嘅水泥地、水泥牆，並以交通為主題，架起好多個車轆，又見到黃黑相間嘅行人輔助線及路牌，見到「Order Here」就知喺走入去自助點餐。

整體餐廳環境幾大，而且幾深，走到盡頭都幾入吓。尖沙咀區做生意，枱櫈拍得埋啲都預咗，但勝在呢度樓底夠高，所以，都唔覺好逼夾。

叫得Burgeroom，主打必然喺漢堡，所以，打開餐廳，佔咗3/4篇幅喺漢堡，剩番嘅菜式就喺小食同沙律。漢堡嘅選擇真喺非常之多，分有牛肉、海鮮、雞鴨及素食，可另外再加配料，如酸瓜、煙肉、菠蘿……甚至鵝肝。而每分類配搭唔同食材就出現好多款式，如單喺牛肉系，就有13款之多，平貴都有，豐儉由人，無加一。

背頁仲有一版飲品，選擇有酒精及非酒精類，小弟就梗喺揀非酒精啦！

此外，近收銀位有個大雪櫃，擺滿罐裝及樽裝飲品，自行拿取即可。順帶一提，餐廳採用半自助形式，晌收銀處落單俾錢，安心埋位等店員送上食物。

奇異果汁 $38

友人揀Snapple啲果汁，我見啲鮮打果汁都喺貴多$10，就梗喺飲鮮打啦。3款果汁以奇異果汁未試過，自然成為首選。單以質感，相信應該有加少少糖水，因為，味道唔喺咁酸，口感唔會太杰身，而奇異果味頗突出。

小食項一樣選擇多多，揀咗個香脆單骨雞翼及牛油果醬芝士薯條，前者見喺新品就試試，而後者之前上網睇到呢款薯條，已經諗住必點。

香脆單骨雞翼配蜜糖芥末醬 $60

一客有8隻，隻隻都炸得金黃香脆，咬落咯咯聲咁脆，又絕無油膩感。沾上啲蜜糖芥末醬，更香更惹味。

牛油果醬芝士薯條 $62

薯條送到嚟，香氣逼人，仲堆到成座小山丘咗，連皮薯條入口香脆不膩；面層鋪滿厚厚嘅牛油果醬，落得一啲無手軟，可謂份量十足，底下再墊入半溶嘅芝士，混埋一齊食，滋味大不同，加上有牛油果醬及蕃茄蓉，食起嚟「安樂」啲，無咁罪惡感。

上面都講過，佢哋嘅包款十分之多選擇，配搭亦都有特別，而且，望過隔離枱個包，呎碼之大唔可以跟平常麥記嘅去作對比，所以，食完啲雞翼、薯條，一份漢堡夠兩個人「些牙」架。

菠蘿煙肉牛肉漢堡 $90

揀咗個平平哋嘅「菠蘿煙肉牛肉漢堡」，貪佢有大片菠蘿，可以中和吓啲油膩。成品嚟到，本身個包身已經喺加大碼嘅體積，裡面堆到爆餡，件漢堡牛肉有成吋厚，而煙肉都唔喺肥膏多過肉嘅平價貨，墊底仲有新鮮蕃茄同生菜。

個包實在太巨型，入口咬落去實在唔可能，分開上下層慢慢食喺我嘅策略。牛肉打得鬆化富肉汁，又夠肉味，配上菠蘿，帶點酸香，感覺平衡，而煙肉鹹香唔會煎到「乾爭爭」，仲帶些少脆口感，整體效果非常好。

門口仲楝咗個牌，用銀聯滿$300，仲有7折（不適用歡樂時光及套餐），可惜小弟無銀聯，否則要多樽Snapple，再打個7折，成兩嚿水多啲，除笨有精啦。

Burgeroom嘅包款果然選擇多多，而且，可謂突破傳統，配搭有心思，小食亦做得不俗，氣氛輕鬆，幾適合三幾個老友嚟食吓嘢、吹吓水。

個人評分
味道：9/10
環境：8/10
服務：7/10
抵食：8/10
平均每人消費：HK$140

餐廳資料：
Burgeroom
尖沙咀彌敦道132號美麗華廣場一期2 樓 207 號舖
3702 0361