依晚喺星期五，到達餐廳時應喺食飯嘅高時段，但全間餐廳只得幾枱客，有啲冷清嘅感覺，亦明白點解訂枱對佢哋嚟講喺幾罕有嘅事情。全餐廳格局一字長形，以白色為主調，裝修簡約，無太多花巧裝飾，只喺一邊有幅「草牆」及有少少繪畫。
餐廳尾嘅水吧已成為雜架攤，正正反映出普遍男人不修邊幅嘅性情，哈哈！
貫徹男人嘅「浪漫」，餐牌就簡單以A4色紙印上菜式名，無咩粉飾。綠色嘅散點餐牌，印有沙律、小食、必食推介、甜點及意粉 / 焗飯5大類。
紅色嘅散點餐牌喺薄餅類，選擇唔少，數一數有成12款，仲分為7”、11”、14”唔同大細供選擇。不過，有一點好唔明，只有意粉 / 焗飯類有加配優惠，就連點必食推介或薄餅都無提供，其後所點嘅經典朱古力就證實呢點。
橙啡色嘅餐牌喺精選晚餐系列，共有8款，包餐湯、蒜蓉包及餐飲，定價由$78-$288，相距都幾大，亦提供其他升級或加配選擇。一來嚟到主打想試薄餅，二來精選晚餐款式唔太多啱細佬妹，所以就無點到。
淨番嘅藍色餐牌，一面喺升級2人餐，背面喺飲品餐牌，可見餐牌嘅編排都有啲隨意。飲品選擇唔多，而之前提及嘅加配或特色飲品，在小弟嚟講真喺講唔到有咩特色。
雪糕紅豆冰 +$12
喺點意粉時嘅加配特飲，奶水比較淡口，而且，好少紅豆，兩三啖就無晒，啲豆亦有啲煲得未夠透。
經典朱古力 $30
細佬點咗杯朱古力，睇佢有幾經典，佢話大就夠晒大杯，不過，味道真喺好普通，只喺茶記嘅出品水平而已。
小食拼盤 $95
人多點個拼盤就最好，樣樣有啲可以試多啲款式，包括芝士焗薯條、洋蔥圈、水牛城雞翼、焦糖雞翼。份量幾足，而且，整體味道唔錯，薯條脆而不膩，洋蔥圈香口帶爽，水牛城雞翼香辣惹味，焦糖雞翼甜甜哋帶焦香。
焗海鮮寬條蛋麵 $60
碟寬條麵睇嚟焗得不俗，個麵條底做得有咬口，個白汁亦調校得香滑，不過，啲海鮮料就好失色，有啲墨魚仔、蝦粒同蜆肉，但大部份都喺碎濕濕，鮮味欠奉。
德國腸拼盤 $118
碟德國腸喺必食推介嘅選項，所以，自不然甚有期望。碟上共有3款腸，名字就無乜考究，不過，其中一款應該喺蛇餅形嘅柏林肉腸，並伴有酸椰菜絲及酸青瓜。老實講，啲腸嘅味道本身唔太突出，最大問題喺煎得比較乾，故此口感都較為韌口，感覺麻麻。
1/2薄餅 $140
顧命思義，就喺鴛鴦薄餅，不過，就唔喺自選兩款口味，而喺指定嘅兩組配搭。專登揀最大嘅14"，果然好有睇頭，一邊喺莫沙里拉芝士、鮮蕃茄、時令蔬果、雞肉、辣肉腸加辣椒汁，肉4落頗惹味，亦唔喺好辣；另一邊喺芝士、羊奶芝士、松子仁、乾蕃茄、蘑菇，雖然全素，但酸香好食，尤其有小弟喜愛嘅乾蕃茄，茄味超濃。至於個餅底，焗得香脆，好食，要挑剔就喺整體落料偏少。
今晚餐飯，細佬妹雖然無咩意見，因為佢哋對食真喺要求唔高，但小弟就覺得麻麻哋，只可以講喺茶記嘅水平嚟做西菜。仲有一點，餐牌，以至周圍都無註明需要加一服務費，事前訂枱都有問過需唔需要加一，直到埋單先發覺要加一，原來只晌門口櫥窗貼上星期五、六、日晚市要加一，服務上好多細節位可以做好啲。
個人評分
味道：6/10
環境：7/10
服務：6/10
抵食：7/10
平均每人消費：HK$125
味道：6/10
環境：7/10
服務：6/10
抵食：7/10
平均每人消費：HK$125
餐廳資料：
男人廚房 Man Kitchen
深水埗青山道66-74號建文大廈地下5號舖
2668 6864
男人廚房 Man Kitchen
深水埗青山道66-74號建文大廈地下5號舖
2668 6864
沒有留言:
發佈留言