奇華餅家 Kee Wah Bakery：姆明之月

既然老婆同姨仔去完北歐，自然多多少少都有啲北歐手信，老婆就送咗隻姆明茶匙俾我，姨仔就送隻芬蘭茶杯，仲加多一盒姆明家族嘅茶包。無獨有偶，友人提前送我月盒，嚟自奇華餅家，最特別喺「迷你姆明奶皇月餅禮盒」，真喺夾晒啲手信。

超萌嘅塔型包裝盒，直頭可以當模型嚟裝飾，上面印住姆明家族，雖然小弟對姆明唔喺好認識，但啲公仔都好得意。

整座「塔」採用咗3層設計，分別有「迷你蛋黃奶皇月」及「迷你朱古力奶皇月」各兩件。奇華嘅「奶皇系列」一向都有水準，奶皇做得幼滑鹹香之餘，唔同嘅味道都頗有特色。

迷你蛋黃奶皇月

每件月餅都印有姆明嘅嘜頭，都喺賣點之一。 蛋黃奶皇月喺經典口味之一，簡單以鹹蛋黃混入牛奶做成奶皇餡，切開，皮薄而入口鬆化，奶皇餡色澤橙紅，散發陣陣蛋香，口感軟綿幼滑，其實記得舊年都食過，果然保持水準。

迷你朱古力奶皇月

色澤黑沉沉嘅朱古力奶皇月，色差大影出嚟嘅相麻麻哋，可能影得唔夠清，請見諒。餡心加入朱古力元素，所以，鹹香中散發出濃郁嘅朱古力味，又喺少甜版本，故此老婆特別鍾意。

順便多謝埋姨仔送嘅姆明家族茶包啦，一盒有4款口味，都喺啲水果紅茶，包裝得意。

正所謂好事成雙，仲收到多一盒奇華餅家跟海洋公園聯乘出品嘅「精選迷你熊貓月餅燈籠禮盒」。個禮盒又喺賣萌為主，所以，盒面印有唔少可愛得意嘅熊貓公仔。

講明喺燈籠禮盒，真喺堅可以當燈籠，初時都唔知，打開盒蓋就有說明，盒底加設咗LED燈配件，開着就成為應節燈籠，細路仔睇到應該會覺得幾得意。而裡面就放有「迷你蛋黃純白蓮蓉月餅」及「迷你蛋黃豆沙月餅」各兩個。

迷你蛋黃純白蓮蓉月餅

兩款月餅外觀都喺一模一樣，都喺熊貓個萌樣，不過，包裝袋就印有月餅款式，絕不會隨手拎錯。而個蛋黃純白蓮蓉月味道、口感不過不失，比傳統月餅少甜，蓮蓉味較清。

迷你蛋黃豆沙月餅

反而，我哋都鍾意個 迷你蛋黃豆沙月多啲，原因好簡單，一來老婆真喺對紅豆有一定嘅偏愛，二來豆沙蓉做得確喺清甜，三來個鹹蛋黃好夠油潤，故相比之下，佢就梗好食過個純白蓮蓉月啦。

個燈籠禮盒除玩得食得之外，亦間接有保育成份，就喺每賣出一盒，就會撥捐$5俾海洋公園嘅保育基金。

順帶一提，上文分享到姆明奶黃月餅，記得按推薦食法，將其放入微波爐加熱20秒，或放進焗爐以150°C慢烤約10分鐘，熱烘烘嘅奶皇餡就變得更幼滑綿綿，餅皮鬆化。

個人評分
味道：8/10
環境：-/10
服務：-/10
抵食：-/10
平均每人消費：HK$0（禮物）

餐廳資料：
奇華餅家 Kee Wah Bakery
青衣青敬路33號青衣城3樓318號舖
2436 1823