如果跟實地址真喺有少少難搵，好在友人提水餐廳晌橫巷內，否則行嚟行去都以為自己行錯，而餐廳位處嘅橫巷原來仲有好多食肆，唔知將來會唔會發展成一條食街巷。而入到餐廳內，睇唔出喺咁有情調嘅，大型壁畫、牆上嘅盆栽、掛畫，都喺幾好嘅點綴。
午市就只有午餐供應，簡簡單單一個午餐餐牌，印有10款選擇，定價唔貴，都喺$78-$98 +10%。包餐湯或沙律，及餐飲或甜品。
水牛城雞翼 $56
雖然我哋點午餐，但友人好鍾意食雞翼，所以，額外多多客雞翼。啲雞翼炸得金黃，非常入味，酸中帶辣，極之惹味，而最正喺配上自家調藍芝士醬，畫龍點晴，好食。
蕃茄忌廉湯
午餐只可以揀餐湯或沙律，問過是日餐湯喺蕃茄忌廉湯，大家都覺得特別，就齊齊揀飲湯。個湯個樣平平無奇，其實，蕃茄味好濃郁，酸香鮮活，口感幼滑，建議加片薄荷葉做點綴，就即時靚仔晒啦。
麵包籃
喺用上較港式嘅餐包，當然喺無咩特色，但勝在夠軟熟，如再熱啲就更好，此刻只喺微暖。
藍蟹肉煙三文魚意大利飯 $82
意大利飯向來喺心頭好，所以，其中一道主菜就揀佢。飯面額外再灑上芝士，色香誘人，入口飯粒做到煙韌，再者，算喺有唔少蟹肉及煙三文，仲添加咗啲菌粒，整體個飯有中上水準。
香煎三文魚扒配芒果莎莎 $92
因為有朋友已表明好想試牛扒，所以，另道菜就揀輕盈啲嘅三文魚扒。件三文魚扒煎得甘香，食落確喺油潤，再搭上少少芒果莎莎，清甜嘅芒果粒令味道變得更輕盈，但嫩口度差啲啲；此外，仲拌有大量軟滑嘅薯蓉及油醋沙律菜，一定夠晒飽。個人意見，賣相可以諗諗佢，因為依家好似就咁將幾樣食材擺上碟而已。
炭燒澳洲肉眼扒 $96
牛扒有西冷或肉眼，既然想食肉，小弟就建議友人食肉眼，夠肉味，如果師傅手城3好，一樣可以燒得夠軟腍。餐牌就無標明有幾重，但目測估計都有10安，而且燒到一格格坑紋，極之靚仔，仲伴有沙律菜及脆薯條，只喺賣$96，大家都讚抵食。澳洲嘅肉眼一向唔差，件肉眼食落真喺好有肉味，亦富肉汁，沾點燒汁，夠晒香濃。
飲品方面，包基本茶啡，但亦可以加錢選其他特飲，大家都貪試特別嘢。
熱情果滑冰 +$12
睇外觀，估計大概喺熱情果漿溝梳打，友人話因為味道酸酸爽爽，幾啱依家大熱天時飲。
青檸柚子蜜 +$12
另一友人寒底，故此就揀杯健康少少嘅熱飲，青檸配柚子蜜，比預期好，因為，酸甜度好平衡。
鹽味焦糖鮮奶咖啡 +$18
小弟始終喺投咖啡一票，鮮奶咖啡就更喺心水。杯咖啡送到嚟，真喺有啲失望，睇同飲，都似意大利泡沫咖啡多過杯鮮奶咖啡，口感唔夠平均，只可以講徒有咖啡香。
綜觀餐廳嘅環境、食物嘅質素同份量，絕對值得翻兜，只喺有啲細節位需要調整吓，好似服務一環，本應都幾好，店員又有禮貌，但一下子餐湯都未飲完，就爭分奪秒上埋主菜，依點似喺茶記水平，始終有收服務費，客人對服務多少都有期望，希望只喺個別例子而已。
個人評分
味道：7/10
環境：8/10
服務：7/10
抵食：8/10
平均每人消費：HK$135
味道：7/10
環境：8/10
服務：7/10
抵食：8/10
平均每人消費：HK$135
餐廳資料：
Jumbo Cafe
大埔運頭街12-18號美華大廈地下A1號舖
2662 2552
Jumbo Cafe
大埔運頭街12-18號美華大廈地下A1號舖
2662 2552
沒有留言:
發佈留言