正品蕃茄湯麵店 Tomato noodles：正．值．蕃茄麵

同屋企人去完荃灣仁濟醫院探病，因為晏晝仲有好多嘢搞，所以，食晏就搵啲簡單、快捷啲嘅地方，姨仔建議就過對面街嘅「正品蕃茄湯麵店」，小弟當然舉手贊成啦，一來未食過可以試試間嘢嘅質素，二來外間仍然喺熱辣辣，食吓酸咪咪嘅蕃茄湯麵喺幾醒胃嘅選擇。

正品屬小店格局，鋪內嘅地方真喺幾細，尤其正值午飯時段，更顯得佢擠迫。但嚟嘅人都喺為食餐好嘢，所以，環境喺其次，「屈質啲」都無所謂。

既然嚟食晏，午餐必定有提供，午餐有蕃茄湯麵，亦有飯品選擇，前後6款，選擇唔選多，奉送餐飲一杯，又有多種加配或升級優惠，但定價比散叫又唔喺平好多。

反而人氣蕃茄湯麵餐就應該相對注目啲，8款口味，定價$44-$48，而雙拼一律定價$59。麵底可轉米線、米粉、通粉、公仔麵，湯底可以揀香芹、酸菜、黑胡椒、風味辣嘅蕃茄湯，同樣奉送熱飲一杯。

嫌人氣蕃茄湯麵餐定死晒，咁自選蕃茄湯麵套餐，就啱晒啦，「車仔餸」形式，點配搭都得，夠自主喇啩。

唔食麵嘅朋友都唔使擔心，除午餐外，亦有多款特色飯餐供選擇，價錢跟食蕃茄湯麵相若。

想再食得豐富啲，不妨晌小食類着手十數款小食，睇睇有無合自己心水。不過，一份蕃茄湯麵餐已好夠飽喇

脆炸雞扒湯麵 $47

小弟揀雞扒，配黑椒蕃茄湯底，我都喺第一次試加入黑椒嘅蕃茄湯，效果意外地好喎，酸酸香香中滲出惹味嘅辣勁，又唔會好嗆喉。

而麵條屬粗身嘅蘭州拉麵一類，睇到色澤帶點啡紅，後尾發現到頭上有個小牌，果然連麵條都加咗蕃茄元素。入口有嚼勁，夠咬口。

至於伴雞扒沾粉漿脆炸，甘香好食，喺油膩咗啲。

腐皮墨魚卷湯麵 $46

姨仔揀咗人氣嘅腐皮墨魚卷，一客有4條，試咗一條，炸得外層腐皮挺脆口，而內裡嘅墨魚又幾軟滑帶點彈牙，食味不俗。

田園樂園湯麵 $46

老婆偏向食素，所以，理所當然揀以時菜、什菌、素雞為主嘅田園樂園湯麵，配香芹蕃茄湯。麵底同我哋嘅一樣，所以，就唔多講，原不過，加入芹香嘅蕃茄湯底，估唔到幾夾喎。

紅豆豆漿冰 +$8

紅豆、豆漿都喺老婆至愛食品，所以，一見有咁嘅組合，加$8都1要升級試吓。豆漿嘅豆味好濃，而紅豆清甜軟腍，又夠多，確喺幾好嘅組合。

凍咖啡 +$2

講明外間熱辣辣，仲喺正午時份，所以，整杯凍啡爽吓，而咖啡嘅味道屬港式咖啡，香濃，以花奶作調和。

順便講講一段小插曲，老婆本身唔好凍飲，但又想試個紅豆豆漿冰，問可唔可以唔好咁凍，果然，喺有「少少少冰」，但其實啲豆漿喺晌雪櫃原支拎出嚟，本身無加冰，估計都喺拎啲無雪咁耐嘅豆漿啫。

成日聽啲朋友講食碗粉麵成4、50蚊，好貴好貴，但食碗日式拉麵8、90蚊，甚至過百，就話好抵好抵。做得有質素嘅，落足料俾你，就叫做值架啦。再者，除食材成本，唔晒燈油火蠟及人工咩。

個人評分
味道：8/10
環境：6/10
服務：6/10
抵食：8/10
平均每人消費：HK$50

餐廳資料：
正品蕃茄湯麵店 Tomato noodles
荃灣荃灣街市街115號蘊崇大廈地舖
2419 9951