百味堂：夢味以求

早陣子同朋友晌K11食飯，由地鐵轉上商場，經過中庭見到有間店好多人排隊，名為「百味堂」，因為當日既路經，又鬼咁多人，所以，就未有詳細深究賣乜嘢。事後睇雜誌才知喺韓國一家乳業集團旗下嘅新品牌，標榜用100%韓國農場直送有機牛奶，主打牛奶雪糕，而呢間K11店喺Pop-up Store，真喺唔知開幾耐。是夜雖然都仲見好多人，但排隊嘅人唔算多，就試吓其夢寐以求嘅牛乳產品。

晌兩邊「入口」位，都架設咗巨型餐牌，企晌度諗清諗楚，心裡有個預算，就唔使埋到收銀唔知點咩好。

原來，佢哋都幾多產品吓，包括：多種配搭嘅牛奶雪糕、鮮忌廉蛋糕、奶昔、有機咖啡及店家嘅精選產品。

之但喺，有時有啲嘢又真喺要埋到櫃位先知，就晌收銀旁嘅餅櫃上面，就有一列新推廣，如9月限定嘅新口味、咖啡與蛋糕組合優惠、夏日綠色雪糕系列……等等。既然有限定出品，真喺蘇州過後無艇搭，自然想先試為快。

順便介紹埋個環境，其實位處中庭咁開揚嘅地方，都一目了然啦。但如想嘆咖啡嘅，可以走到埋邊嘅吧位，自成一角，感覺自在。

新鮮藍莓牛奶雪糕 $78

佢哋啲牛奶雪糕真喺有好多口味，足足超過10款，店員介紹話呢款期間限定就標榜以新鮮藍莓打造，無糖兼無人造色素，再配合番100%韓國農場直送有機牛奶雪糕。先講賣相，藍莓漿落得絕無手軟，滿滿咁填入晒去啲雪糕中，味道果然鮮甜，更有一份新鮮感，面面仲有好多新鮮藍莓粒，藍莓一向有明目、提升免疫力、預防心臟疾病……等一大堆好處，所以，多食無妨；

講到啲牛奶雪糕，挺身而柔滑，真喺勁濃奶味，跟啲北海道牛乳真喺不遑多讓，伴上藍莓漿，奶味與莓香同樣突出，令滋味升級！食到尾，剩番少少雪糕都溶番成牛奶咁款，混和啲藍莓漿，變成鮮活嘅藍莓奶昔，好飲！

老實講，食杯鮮果牛奶雪糕要成近八十蚊，當然，感覺一定唔會話平，但試過之後，奶味之濃郁，藍莓之鮮甜，用料無欺場之餘，又落得十足，確喺有番啲物有所值嘅感覺，偶爾為之，絕不過份。

個人評分
味道：9/10
環境：7/10
服務：7/10
抵食：8/10
平均每人消費：HK$78

餐廳資料：
百味堂
尖沙咀河內道18號K11購物藝術館地下中庭
25736293