雅‧悠蔬食 Leisurely Veggie：重新素造

素食店「悠蔬食」有咗九龍店，嚟光顧就方便好多，約咗表哥食晏，幾間餐廳俾佢揀，估唔到佢對素都有興趣喎，可能我同佢講過依間唔喺一般齋鋪，啲素菜做得精緻有心思，又夠健康，所以，佢就揀依間嚟一試。

大概年初嚟過一次食晚飯， 嗰次喺老婆嘅生日飯，事隔一年都無，環境當然無乜點變，所以，就唔多介紹，貼一、兩張相就一目了然。

午市，有散點，亦有套餐，當然套餐計起嚟划算一點，一客午餐就包咗前菜、湯品、主菜及飲品，主菜共有6款，定價都喺$88-$108，而甜品就要加錢加配。

韓風蘆薈柚子蜜

落單後先嚟嘅喺飲品，表姪女嘅韓風蘆薈柚子蜜應該喺現成食材溝成，應該無乜驚喜嘅吧！但還好喺柚子蜜清甜，不過，蘆薈就少咗啲。 

鹹柑桔蜜

表哥揀嘅鹹柑桔蜜比較有個性，深沉嘅色澤，令啲鹹柑桔好似有種葯到病除嘅感覺，佢話飲落鹹酸味好出，但似加咗蜜糖，所以，唔會酸到死。

芒果菠蘿清涼特飲 +$30

我就見枱邊有個介紹牌，介紹其夏日限定特飲，其中一款喺芒果溝菠蘿，完全喺針對我嘅弱點，所以，點一杯嚟試吓。原價要$40，跟餐都要補$30，而杯嘢入果堅純果汁喇，因為唔單味道濃郁，口感杰度較強，亦飲到絲絲果肉纖維。不過，可能顧及客人健康關係，唔喺好凍，如果凍啲相信更爽。

藜麥鮮蔬沙律配鮮柚子意大利黑醋汁

隨後，好快就有得食，先喺沙律，睇到色澤鮮艷，更有大量紅菜頭及藜麥，未食都覺得健康啦，淋上香濃自家調嘅柚子意大利黑醋汁，酸爽好食，為今次午餐打開胃納。

青豆薯仔薄荷竹燕忌廉濃湯

餐湯有中有西，小弟就揀個忌廉湯，因為覺得新鮮感十足，色澤帶淡青綠，質感較杰身，但味道特別，青豆、薯仔重質感，薄荷就令個湯變得輕盈啲。

青木瓜甘筍花生雪耳湯

雖然喺素湯，無肉更無味精，但夠老火，又足料，個湯一啲都唔會淡而無味，仲入口清潤鮮甜。

叻沙湯麵伴香脆蒟蒻及天婦羅秋葵 $98

主食先嚟知叻沙，始終喺素，跟正式嘅叻沙仍有少少差別，但湯底微辣帶有層次嘅香料味，相當不俗。麵條幼滑，仲伴唔少配料，而蒟蒻及秋葵炸得香脆不膩。

吉列菇扒配上海菜飯 $98

件吉列菇扒非常有睇頭，大大件，又炸得金黃，入口酥脆到不得了，亦無話食落一口油，口感有啲煙煙韌韌，菇味卻唔算好重；菜飯飯粒軟熟，既有菜，更加有菌粒，口感豐富 。

泰式鳳梨鮮蔬炒飯配香脆腐皮卷 $98

依道炒飯炒得出色，炒得爽口，味道唔單調，喺嫌無乜菠蘿，突出唔到主題；而腐皮卷嘅得意，做到成條賣蔗蝦咁，入口香脆有豆香。

咖啡朱古力千層班戟 +$20

最後都加配兩款甜點，先喺件千層班戟，睇都睇到做得層次幼細，層層都喺薄薄塗上朱古力忌廉，食落餅皮軟綿，忌廉柔滑，好食。

日式柚子雪葩 +$20

意屬山梨白桃雪葩，不過無貨，只好試吓柚子雪葩，其實味道一啲都唔差，柚子味濃郁，仲有唔少果肉，雪葩入口冰涼清爽，飽餐一頓嚟食有種清滯感。

小弟唔喺第一次嚟「悠蔬食」，自然知道其水準，否則都唔會翻兜啦，而表哥佢哋就覺得好有驚喜，話估唔到素食都做到咁有特色，重新塑造對素食嘅印象，一改得個油、味道淡嘅形象。

個人評分
味道：8/10
環境：8/10
服務：8/10
抵食：8/10
平均每人消費：HK$135

餐廳資料：
雅‧悠蔬食 Leisurely Veggie
尖沙咀金馬倫道48號中國保險大廈3樓B號舖
3706 5827