賀喜 Gaki Japanese Restaurant：後喜之秀？

香港人一向「新屎坑」，一有新店就好易一窩蜂去排，小弟就好怕排隊，因為香港大把好嘢食，唔會話食唔到依間就有咩損失，排隊真喺嘥時間。九月中尾先開張嘅「賀喜」，新開當然好多人，就好似隔幾個鋪位嘅「韓盛朗」，一樣開檔初期門口企滿人，依家去已經無咁犀利。所以，趁星期日午市過嚟睇睇，人唔多，兼且市午流轉快，只隔幾張籌，等無耐就有枱。

餐廳環境裝修較摩登，比同幾間日本餐廳都缺少一份和風味，若非見到個刺身雪櫃，真喺同間西餐廳無乜分別，枱櫈亦排得非常密，不過，美孚區嘅食肆，差不多間間如是！

午市主要做定食，不過，亦可以散叫。單頁餐牌，A-J共10款選擇，一眼睇晒，以日本餐廳而言，定價就屬中等，午市定食都喺$52-$85，另收加一服務費。所有定食都包一客茶碗蒸及味噌汁，此外，加錢可配咖啡或罐裝汽水。

茶碗蒸

上枱時熱辣辣，入口蒸蛋非常滑溜，內裡更有蟹柳、冬菇及嗚門卷，相當不俗。

味噌汁

麵豉味幾香濃，湯內更加入昆布，令其味道帶點海洋嘅味道。

C. 時令櫻花丼定食 $62

拎上手就知份量十足，一大碗丼飯，飯面放滿北海甜蝦、油甘、吞拿、三文、蟹籽、八爪魚，以及青瓜粒，刺身鮮甜新鮮，絕無欺場，兼且飯粒軟熟黏糯，意外咁好食。

Ｅ. 東京時令魚生三色丼定食 $85

老友嘅魚生三色丼亦唔失禮，「三色」無得選擇，用上咩時令魚生就睇廚師決定，今次就見到有帶子、馬糞海膽及油甘，再加蟹籽，同樣份量無手軟，夠晒足秤；味道又點呢？老友話有水準，又夠新鮮，尤其帶子及海膽都好出色，前者厚肉爽口，後者甘香豐腴。

美孚區嘅日本餐廳以「友樂亭」和「八佰屋」做得較為有聲有色，算得上喺區內嘅「老字號」，新加入嘅「賀喜」似乎有力爭一日長短嘅實力，但最後喺三雄鼎立，定反超成為後起之秀，抑或黯然退出呢？只好拭目以待！

個人評分
味道：8/10
環境：7/10
服務：7/10
抵食：7/10
平均每人消費：HK$70

餐廳資料：
賀喜 Gaki Japanese Restaurant
美孚美孚新邨第5期蘭秀道1-24號地下N2號舖
3481 2621