金象餐廳 Golden Elephant Thai Restaurant：象心獨運

屯門本身都少入嚟，蝴蝶村更喺人生第一次到訪，真喺港燦入城。由於工作關係，先會入到依條村做探訪，完事之後都喺午餐時間，所以，返到輕鐵站附近搵食，隨意就幫襯咗「金象」。

輕鐵美樂站對開一列乜乜餐廳都喺茶記，所以，初時以為依間金象都喺，但門面企理啲，再睇睇餐牌，原來喺賣泰國菜。室內環境裝修簡約，揀咗一角嘅卡位，夠靜局。

平日有午餐，星期六、日就無供應，只有散叫。雖然餐牌有唔少美食，但一支公簡簡單單一碟炒粉，加杯凍飲就夠晒。

泰式炒金邊粉 $42

似模似樣喎，粉內有好多雞肉，蝦仁亦有少少，不過就好細粒，但喺比起上次晌九龍城一間小店食嘅炒金邊粉，依度啲料算好豐足。金邊粉味道酸酸甜甜，濕濕潤，又唔太碎濕濕，裡面就有唔少蛋碎，整體份量多，味道而言實在不俗。

龍眼冰 $18

糖水嘅味道似喺片糖或黃糖開沖，除色調淺啡之外，陣味純香啲；而龍眼明顯喺以龍眼乾浸成，因為色深兼細粒，龍眼味會濃少少，肉就會韌啲啲。出面通常都喺用罐頭貨，快捷簡單，所以，龍眼依一環佢哋都可謂匠心獨運。

晌茶記食就當然划算啲，不過，金象個環境就比茶記舒服企理好多。

個人評分
味道：7/10
環境：8/10
服務：7/10
抵食：7/10
平均每人消費：HK$60

餐廳資料：
金象餐廳 Golden Elephant Thai Restaurant
屯門湖翠路2號美樂花園地下68號舖
2618 0833