環境舒適有氣氛，上文都講過想同老友靜靜局吹吓水，所以，刻意挑餐廳最尾嘅位置。而是夜果真旺場，全餐廳都擠得滿滿，好在揀個死角靜局位，望出去喺中環商廈景，下面喺藝穗會街景，最緊要唔太嘈，服務都好到位，無話客多而有咩甩漏。
對照番自己對上一次食評，餐牌唔同咗，做得比以前精緻，好多菜式都加入照片參照，亦有啲新菜式，不過，我哋點菜都喺隨心意，並無專登揀新款式。
西班牙火腿菠菜奄列 $68
喺Espuma嘅特色前菜，所以，介紹俾朋友試試，不過，今次嘅奄列顯然有少少過熟，但又未至於太老，口感嘅軟滑度稍遜，蛋內有薯仔、火腿及菠菜蓉，但後兩者唔喺好多，所以，食味又未夠突出。
蕃茄芝士意大利飯球 $68
初次接觸依一種意大利飯球，感覺幾新鮮，一客有6球，配自家製沙律醬及沙律菜。飯球炸得金黃，脆口感雖然有，但咬落有啲乾，口感有少許硬，但內裡嘅芝士及蔬菜粒，令個味道又幾滋味。
西班牙薄餅 $98
薄餅有兩款選擇，用得店家名字起名嘅Pizza Espuma（西班牙薄餅）應該會特色啲。的確，個薄餅意外地咁好食，除咗啲黑毛豬火腿令個薄餅鹹香惹味之外，撒上大量巴馬臣芝士亦居功不少，加埋西班牙辣香腸、亞枝竹，真喺用料豐富；而個餅底嘅厚度喺薄身軟底，唔會太厚好似食麵包咁。
酥皮香蕉朱古力蛋糕 $68
酥皮、香蕉朱、古力蛋糕就算唔喺咩甜品組合無敵鐵三角，3樣都喺小弟喜歡嘅食材，拼埋一齊，效果絕對輸唔得去邊。朱古力蛋糕有啲似班尼士，好香濃，只喺無合桃嘅版本，面面在咗一層香蕉蓉，不讓朱古力味獨領風騷，一樣咁有「蕉」氣，而包裹外層嘅酥皮，做到酥脆已達到應有效果，所以，本道甜品既有口感，味道又有個性。
西班牙油條 $48
可選配朱古力醬、煉奶或咖啡醬，額外加醬汁每款俾多+$6。不過，啲「油條」比預期稍遜，因為造型似乎做得參疵，賣相較為巖巉，其次，雖然咬落柔韌卻唔夠熱脆，比之前食有啲失準，拉低咗甜品一環個分數，還好嘅喺輕輕一層沙糖、玉桂，唔過甜。
鮮奶咖啡 $36
Espuma嘅咖啡一向喺另一賣點，老友話佢杯鮮奶咖啡入口醇香細滑，只喺拉花唔夠細繳，伴一小件燕麥曲奇，多添半分寫意。
朱古力榛子瑪奇朵 $42
我本身都喺鮮奶咖啡嘅愛好者，不過，今回就試咗杯瑪奇朵，即喺意式濃縮咖啡加奶，而依杯更加入朱古力榛子醬，記得要攪勻先好飲，因為啲朱古力榛子醬沉晌底，入口充滿榛子香味。
今晚菜式嘅水準算得上保持到，薄餅及酥皮香蕉朱古力兩道菜頗有驚喜，後者誇張啲講，食完之後更有種朝思暮想嘅感覺。不過，Espuma初初開業喺以西班牙菜嘅Tapas及優質咖啡為賣點，但似乎幾經轉變後Tapas嘅形象越嚟越淡化，取而代之所有菜式都顯得「國際化」，然而，咖啡則依然出品高質。
個人評分
味道：7/10
環境：8/10
服務：8/10
抵食：7/10
平均每人消費：HK$235
味道：7/10
環境：8/10
服務：8/10
抵食：7/10
平均每人消費：HK$235
餐廳資料：
Espuma
中環威靈頓街2-8號威靈頓廣場M88 17樓
2973 6088
Espuma
中環威靈頓街2-8號威靈頓廣場M88 17樓
2973 6088
沒有留言:
發佈留言