Pret A Manger 百特文治：芝味．滋味晚茶

嚟到灣仔會展睇展覽，唔經唔覺睇到好晏，仲有一段時間先到食晚餐嘅時間，夜晚又有其他行程，所以，就不如兩餐夾一餐搞掂，下午茶加個早鳥晚餐，攝埋個中間時間，偷得浮生半日閒，唔使四圍盪。

我記得灣仔海港中心依間Pret A Manger以前唔喺咁，只喺地鋪一間，座位都晌晒鋪外。而依間新鋪鋪面骨緻啲，地下有少量座位，樓上卻寬敞闊落，最好坐自不然揀梳化位，又有免費wifi，所以，都迤耐少少。

佢哋有啲下午茶套餐好抵吓，以往曾試過佢哋啲手製盒裝蛋糕，確喺唔錯，一件都要賣$27，依家加多杯咖啡（或茶）都喺$38，好划算。所以，介紹個下午茶先，查實喺食咗個通粉，之後先食件蛋糕嘅。

是日嘅蛋糕只得兩款：藍莓芝士餅及歌劇院蛋糕，同樣賣$27，選後者因喺味道之外，做餅手工複雜好多，感覺更抵。

歌劇院蛋糕 $27

真喺幾有水準，側面睇都見到一層又一層嘅組合，層次分明，底層帶微微濕潤嘅朱古力蛋糕，之上有咖啡忌廉、朱古力軟漿、微濕嘅海綿蛋糕，真喺味道多變富層次，既有朱古力嘅濃味，又有咖啡香，難得無傳統嘅甜得太過份。其實，只賣$27，食手功都抵啦！ 

蒸餾咖啡 $24

套餐只備有一般蒸餾咖啡，但醇香度都已經唔錯。如想飲其他款式，如鮮奶咖啡，意式泡沫咖啡……，加錢就可以嘞。

講明下午茶、晚餐夾為一餐，主食就要咗個焗通粉，因為晌度食三文治就試得多，熱食就好似無乜點試過。佢啲熱食唔平，但計及質素，以及餐廳環境，如果你純粹嚟快食快閃，就一定喺唔抵，但輕鬆食吓嘢，坐吓，嘆吓，咁又唔同。

焗芝士風乾火腿通粉 $49

個通粉睇落份量好似好少，女生食就絕無問題，不過，以一般一餐計，男生食就只可以講喺還可以。通粉內除有風乾火腿，仲有啲椰菜花及車打芝士，法式白汁好香滑，奶味比較濃，而火腿喺意大利風乾火腿，唔喺普通貨色嘅煙肉，食得出鹹香細緻啲。

一份通粉，一件蛋糕，一杯咖啡，來一陣陣小歇，好味嘅食物，都要有好心情去配合。

個人評分
味道：8/10
環境：8/10
服務：8/10
抵食：7/10
平均每人消費：HK$87

餐廳資料：
Pret A Manger 百特文治
灣仔港灣道25號海港中心1樓111-113號舖
2877 3686