永和海鮮酒家 Wing Wo Seafood Restaurant：西遊團餐

是日教會搞咗「西遊記」，兩車一行近百人包團遊西貢，去吓獅子會、鹽田梓及橋咀島，行程好迤，叫做到過部分地質公園，但依條線唔算多嘢睇。中午，安排到西貢市中心嘅永和海鮮酒家食團餐。

咪睇永和個門口如一般周圍嘅商鋪咁，唔喺好大，實際裡面何止別有洞天，簡直另一個天地。地下堂座已經唔細，成間店依山而建，後面有樓梯上二樓，再屈個彎上到三樓，更好似多出另一間酒樓咁，多人多到呢……！

我哋七圍半枱，被安排到3樓另一個偏廳，零裝修兼窄到呢……！唔使多講，團餐嘅質素唔好抱太大期望，睇其他人嘅食評，佢哋嘅服務就知出名……差。雖然，我就無咩遇到好差嘅待遇，但負責上菜嘅阿姐，全程黑面，問多句都唔啋，你就感受到嗰股對客人嘅怨氣。

 3樓正廳

3樓偏廳

做得團餐，就好似某律師樓嘅廣告咁，咩都要快，狂風掃落葉，印象中10-15min內就上齊晒8個餸，另白飯任裝！因為成枱人都唔喺太熟，一有菜上枱就起筷，點好意思叫人等等相機先食，所以，碟碟餸都要把握時機，一嚟到就快攝，出嚟嘅質素一定無咁好，請見諒。

貴妃雞

即喺白切雞，只可以真喺講，雞有雞味，薑蓉有薑蓉味，不過，雞件皮下脂肪少，雞肉又幾滑，收貨啦！

豉汁排骨

個豉汁好惹味，撈飯一流，但啲排骨就「非常」骨感，多骨無肉。

白灼蝦

雖然只喺白灼，但如果啲蝦質素好，點灼都唔會太差，如果嚟到西貢食白灼蝦都唔得，真喺「弊家伙」。

魚香茄子 

「黑掹掹」嘅魚香茄子，睇樣真喺唔知佢就喺，茄子煮得好腍，無乜鹹魚香味，只得醬油味。

蒜蓉粉絲蒸元貝

撥開啲蒜蓉粉絲，粒元貝細到得個五毫子咁上下大，好細粒，所以，道菜似喺食蒜蓉粉絲囉！

蒸魚

隻碟就好大喇，對比下，條魚就顯得好細條，還好，條魚蒸得無過火，肉質幾滑溜。

油菜

麵檔格局嘅蠔油生菜，無咩特別可言，只喺多碟菜食吓！

時菜鮮魷

最後上枱嘅一道菜，燈籠椒、翠玉瓜炒鮮魷，兩款菜都爽脆，鮮魷柔韌，加啲蝦醬就一流喇，可惜喺清炒！

12人一圍，餸菜份量如一般酒嘅例牌，所以，如果成枱都大男人就肯定唔夠食，還好我依枱師奶、細路多，變得份量啱啱好。跟團嘢，預咗喺咁，志在撐飽個肚，食完繼續玩。下一站喺坐船去鹽田梓及橋咀島，食唔飽都好，搭船無咁容易嘔。

個人評分
味道：6/10
環境：6/10
服務：5/10
抵食：-/10
平均每人消費：HK$0（團餐）

餐廳資料：
永和海鮮酒家 Wing Wo Seafood Restaurant
西貢普通道14號A地下
2791 0063