佢地址印3樓，依商場扶手電梯上去，點知喺間雞煲店，原來，上Spark Cafe要入去搭商廈電梯，正確嚟講，餐廳喺晌商廈，而唔喺商場。至於餐廳內格局，跟一段西餐廳分別唔大，最入處有個小舞台，可以夾吓band，又有電子飛標機玩吓。
反而，趁着有啲秋涼，出面嘅露天位感覺仲爽，不過，有冒着吸二手煙嘅風險，但我哋見無人食煙（至少嗰刻無囉），就坐出去，亦叫店員安排得坐邊少少。
本身有晚餐供應，都唔見得好平，嚟嚟去去都喺啲乜扒物扒，所以，少有哋改為散叫唔要套餐，因為計過度過散叫似乎仲底。
散叫嘅選擇都唔少，由小食、頭盤、沙律、主菜、海鮮、意粉、意大利飯、餐湯、到甜品都一應俱全，亦無焗限邊一度嘅地方菜式。
既然喺酒吧餐廳，各款酒品當然唔少得，不過，我哋都喺非好酒之人，所以，老友揀咗汽水、檸茶，小弟就揀杯好耐無飲過嘅奶昔。
芒果奶昔 $48
奶昔打得好香滑，多夠冰凍，不過芒果味未夠強勁，一般嚟講都喺搵芒果雪糕跟鮮奶打成，以前曾飲過一間小店會再加入適量芒果汁，真喺難忘佢嘅超香滑。
小食拼盤 $128
拼盤有芝士餃子雞翼、煎魚餅、絲網春卷、炸生蠔及洋蔥圈，每款有三幾件，啱晒三五知己共享。雞翼去骨釀入芝士炸，唔喺咩新奇菜式，但一啖雞翼，一啖奶昔，一樣咁正；煎魚餅喺泰式做法，配個酸辣醬，魚餅彈牙，蝦味十足；絲網春卷應該喺越式小食喇，外層鬆脆可口，味道不俗；炸生蠔，淡淡蠔味，炸得唔油膩；洋蔥圈個粉漿唔太厚，都收貨。個拼盤集唔同地方嘅特色小食，更可讓唔同人選取自己嘅心水小食。
意大利香醋海鮮沙律 $115
簡單嘅油醋沙律菜，配上大量海鮮配料，有帶子、鮮蝦、魷魚、蜆肉，再唧上自家醬汁，味道酸香醒胃，難得帶子、蝦肉及魷魚都鮮甜，尤其帶子，原粒大大隻，非常有睇頭，夠肉地，沙律菜亦夠冰涼清爽。
法式烤焗寶貝乳豬脾 $248
外觀猶如中式嘅燒乳豬，外皮閃亮金黃，店員更窩心幫我哋先切件，方便食用。一咬咔嚓脆開，皮脆無庸置疑，因為喺乳豬關係，皮下脂肪少，唔會食到一口油，但仍有一份油香，肉質軟腍好食，沾少少芥辣，就仲惹味，不愧為「鎮店豬寶」。而乳豬底下墊有軟滑嘅薯蓉，唔怕唔夠飽肚，我覺得一份乳豬最好就4人分享。
茄皇大蔥藍青口天使麵 $118
刻意將藍青口直插圍邊，令個天使麵賣相更立體。天使麵煮得啱啱好，唔會太餬，麵條質感柔滑如絲，而配以蕃茄醬底，酸香鮮活，比預期更好。
由於菜式嘅份量都比想像中大份，所以大家都食得夠晒皮，甜品一環就放棄了！整體做菜嘅水準不俗，定價唔貴，份量又十足，值得支持嘅樓上店！
個人評分
味道：8/10
環境：7/10
服務：8/10
抵食：7/10
平均每人消費：HK$265
味道：8/10
環境：7/10
服務：8/10
抵食：7/10
平均每人消費：HK$265
餐廳資料：
Spark Bar & Restaurant
旺角花園街2-16號好景商業中心3樓301號舖
3521 1666
Spark Bar & Restaurant
旺角花園街2-16號好景商業中心3樓301號舖
3521 1666
沒有留言:
發佈留言