皇朝小籠包（八種口味） $98
包含原味、人參、鵝肝、黑松露、芝士、蟹粉、蒜香、麻辣8種口味嘅小籠包，外觀五光十色，摺紋細緻清晰，賣相已喺一個亮點。
雖然枱上有一張小籠包口味嘅介紹及品嚐嘅先後次序，不過，既然唔喺樣樣試晒，都喺按各自心水，所以，投其所好揀自己喜歡口味嚟食就可以。
人參口味
翡翠綠嘅人參味小籠包，參味絕不可以小覤，一咬已感受到啲參味有幾突出，有種苦盡甘來嘅感覺，參味餘韻悠長。
蟹粉口味
蟹粉口味跟麻辣口味嘅色澤好相似，當然味道喺南轅北轍，入口肉餡夠鬆化，有點點蟹黃及蟹肉，令小籠包鮮香盡出。
麻辣口味
之前幾次都未有機會試，今次親友就釀我試試依款麻辣口味，外觀無介紹卡嘅樣辦咁嬌紅，但麻辣味就一湧而出，不過，算喺溫和。
蟹粉蝦仁 $188
今次樂天推出4款蟹粉菜式，包括：蟹粉豆腐、蟹粉蝦仁、蟹粉炒飯及蟹粉白玉盅。龍井蝦仁就食得比較多，又想試試蟹粉蝦仁又如何？啲蝦仁夠大隻，本身已經處理得好爽口，帶蝦鮮甜味，混和咗大量蟹黃同蟹肉，甘鮮味美，好食到不得了！
麻婆豆腐烤桂魚 $238
麻婆豆腐喺滬菜經典菜式之一，當遇上烤桂魚，個化學反應會喺點呢？先評條桂花魚，以燒烤方式製作，唔單外皮有微脆，肉質極之細嫩幼滑；個麻婆豆腐醬汁，有別一般常食到嘅口味，因為加咗花椒，添幾分麻嘅感覺，所以，個汁變得惹味而帶多點刺激；豆腐亦都好食，外脆內軟。
喇沙海鮮拉麵 $78
推介依個麵俾親友，主要都喺因為個喇沙湯頭，既香濃、又微辣，實在做得出色；麵條亦喺近門口見到師傅即場手打，所以，有咬口，厚度適中，配合湯頭嘅稀稠度，麵條好掛汁，淨食個麵都覺得正。海鮮只有爽彈嘅鮮蝦，加上豆卜，作為配料。
榴槤小籠包 $58
甜品時段貪得意試一試個榴槤小籠包，因為裡面全部喺榴槤蓉，所以，小籠包個外觀比較塌身。一客共有6粒，一上枱已有少少榴槤香氣四散，咬開外皮，榴槤蓉唔算好多，但榴槤氣味已好濃郁，入口好軟滑，做成甜點，又確喺幾得意。
杏仁龍眼豆腐 $26
龍眼睇樣應該喺罐頭貨喇，而杏仁豆腐雖然好香杏仁味，不過，並非預期中嘅「豆腐」，質感比較硬身，個人覺得唔好食。
檸檬蘆薈桂花蜜 $26
都喺個桂花蜜做得好食，既有檸檬清香，又有桂花蜜嘅清甜，爽爽涼涼，又有好多蘆薈粒，喺一道出色兼滋潤嘅甜品。
雖然個杏仁龍眼豆腐唔喺好得，但品嚐過兩款新菜，又重溫過兩款舊菜，水準無乜好大嘅走樣，此外，招呼亦都好好，家人都話值得再嚟嘅餐廳！
個人評分
味道：8/10
環境：8/10
服務：8/10
抵食：7/10
平均每人消費：HK$270
味道：8/10
環境：8/10
服務：8/10
抵食：7/10
平均每人消費：HK$270
餐廳資料：
樂天皇朝 Paradise Dynasty
銅鑼灣波斯富街99號利舞臺廣場6樓
2177 0903
銅鑼灣波斯富街99號利舞臺廣場6樓
2177 0903
沒有留言:
發佈留言