一列窗口位就更喺剎食位，唔單因為喺啲軟綿舒服嘅梳化椅，挨晌一旁全是落地大玻璃窗，雖然望嘅都只喺樓景，但感覺讓人更感開揚，陽光斜照下，更添活力，心情都開朗好多。
雖然嚟嘅目標明確，但都八吓英式下午茶以外有咩好食。餐廳有提供午餐，$55-$68，都喺啲健康輕食為主，附送咖啡或茶，加多$18有多一客精選甜品。
話明喺甜品店，主打就梗喺甜品，餐牌一面喺各式甜品，唔單止名字特別，配搭亦似乎好有心思，單點或配飲品變為套餐都得；另一面喺各種飲品，咖啡、朱古力、熱茶、特飲……等等。其實佢哋有部平板餐牌，不過，普通版餐牌我認為有需要做番精緻少少。
講到個英式下午茶，個平板餐牌描述得好簡單，只喺話包括迷你三文治、各式迷你甜點，每位包一杯茶或咖啡，一位用收$188，兩位用則收$336（+10%），然而，飲品選擇較基本餐牌上多，部份要額外加錢。再問吓會有啲乜，原來店主想彈性啲之餘，更想俾客人多啲驚喜，一早乜都講晒，就無晒驚喜。
嘩嘩嘩！依個喺對個英式下午茶好基本嘅反應，因為店家做咗兩組純白色嘅托架，將13款各有特色嘅鹹甜點，一拼呈現晌你眼前，的的骰骰，琳瑯滿目，賣相絕對喺要先嘩眾取寵，而晌燦爛陽光襯托下，猶如一場食物「花生騷」，爭妍鬥麗，令人目不暇給，謀殺咗記憶卡唔少容量。基本上每一款食物都無話一個指定名稱，以下名稱都喺取自食物嘅款式及味道而命名。
1.青瓜車厘茄三文治
薄薄一朕牛油，配上薄薄一片青瓜，以車厘茄及刁草作點綴，清爽嘅一口三文治，作用喚醒一吓味蕾。
2. 煙三文魚三文治
煙三文魚甘香油潤，夾晌上下兩小片麵包中，塗上酸忌廉牛油，撒點細蔥花，油甘香味更突出。
3. 焦糖青蘋果鵝肝多士
第一輪嘅鹹點，就喺依一款多士最得小弟歡心，唔好怪我對焦糖偏心，襯微酸嘅青蘋果，既甜又帶酸，層次感強，而青蘋果下有鵝肝醬，味道豐盈，配一小件脆卜卜嘅多士，口感一流。
4. 炒鴨絲迷你漢堡
迷你漢堡的骰可愛，包身亦非常鬆軟，內裡塞滿鴨絲，而鴨絲惹味油香，真喺咪走「堡」。試過4款鹹點後，已覺得喺認真而富心思嘅出品。
5. 檸檬蜜糖芝士蛋糕
跟住喺嚐嚐甜嘅時間，先試依款造型花俏嘅蛋糕，充滿檸檬蜜糖香味，餅身口感柔滑，而裝飾嘅花花喺用糖粉做，當然可以放入口，只喺得個甜字，哈哈。
6. 綠茶慕絲豆腐奶凍
慕絲配奶凍喺甜品常見嘅組合，加多隻糖粉小蝴蝶，立時變得可愛。綠茶慕絲做得既有綠茶嘅醇香，又如絲般幼滑；豆腐奶凍，豆跟奶味都好平衡，挺實而唔會好削，基本功非常紮實。
7. 藍玫瑰卷
超迷你嘅瑞士卷，最大亮點喺其瑰麗嘅湖水藍色澤，有種出水芙蓉嘅少女味道。一啖放入口，卷蛋鬆軟無比，忌廉軟滑得很，食用嘅玫瑰散發幽幽花香，真想要多一件再回味。
8. 檸檬、白松露馬卡龍
店主話馬卡龍喺自家製，雖然共有兩款味道，一甜一鹹，可惜每款只有一粒，為咗大家都試到，需切為一半。
檸檬夾心馬卡龍實在有驚喜，除做得光滑完整外，咬落先脆後煙韌，驚喜位唔止中間嘅檸檬醬調校得滿有清香，更神來之筆加入一片糖漬檸檬片，真喺富心思。
相比起檸檬馬卡龍，白松露馬卡龍就顯得平穩，味道亦如預期般帶濃濃松露幽香，同樣喺高水準出品。
9. 棒棒糖蛋糕
波板糖？朱古力？餐牌唔講咁多，就喺等你試出驚喜。其實，佢喺棒棒糖型嘅朱古力蛋糕，外層包住一層朱古力軟漿，味道不俗。
10. 伯爵茶冬甩麵包
一輪甜點，又再回歸到鹹點之上。首先迷你麵包圈做成冬甩型，掛晌自製「晾衫架」嘅外賣相，已夠玩味十足。入口，麵包帶點韌性，伯爵茶味徐徐滲出，配一口咖啡，感覺寫意到極。
11. 紫薯、黃薯脆片
兩款小食等去到尾聲先品嚐，其實，按個人喜好先後次序喺好其次。先食啲薯片，仲諗緊會唔會喺來貨，事後向店主查詢，原來同樣自家製，新鮮即炸。雖然算唔上好脆口（可能喺我哋等到臨尾先食而影響咗個效果），但好有誠意，況且，少油少鹹，感覺健康啲。
12. 巴馬火腿餅乾條
油潤嘅巴馬火腿捲住餅乾條，鹹香、香脆，好食。
13. 提子鬆餅
英式下午茶又點可以少咗英式鬆餅嘅一份。撕開迷你鬆餅，睇到質感綿密，入口卻十分鬆化。無論搽上自家製桂花黑糖，抑或芝士忌廉同吃，當相當味美。
玫瑰鮮奶咖啡（+$15）
小弟食甜品向來打死不離鮮奶咖啡，今次亦無例外，不過，就加啲料要杯玫瑰拿鐵。咪以為就咁加幾片食用玫瑰花瓣就了事，入口每啖都滲出幽香嘅玫瑰味，襯托出醇香嘅咖啡味，拉花未夠細緻亦變得無緊要。
桂花烏龍茶（+$15）
朋友喜歡甜品配熱茶，貪其有減膩之效，所以，要咗一壺桂花烏龍茶。茶色清澈，先淺嚐一啖，既有桂花嘅芬芳，又有烏龍嘅甘香，配甜品真喺效果不俗。
晌個咁輕鬆悠閒嘅環境下，一口氣試咗咁多款鹹甜美點，又跟老友暢談近況、飲飲食食、旅行軼事，真喺一個愉快嘅下午。
個人評分
味道：8/10
環境：9/10
服務：8/10
抵食：7/10
平均每人消費：HK$200
味道：8/10
環境：9/10
服務：8/10
抵食：7/10
平均每人消費：HK$200
餐廳資料：
Doux
旺角彌敦道726號18樓全層
2808 2520
Doux
旺角彌敦道726號18樓全層
2808 2520
沒有留言:
發佈留言