團年飯嘅第一炮，就喺跟以前晌酒店做過嘅舊同事，上次八月大家晌又一城八月花聚過，本來都無打算晌過年依段時間搞局，因為都知過年忙，團年飯局多，但其中一位老死提議過年前聚一聚食番餐，咁就促成今次嘅飯局。由於上次大家對晌又一城食飯都覺得挺方便，所以照舊揀嚟又一城，啱啱小弟又有啲現金券，故此建議晌Pizza Express食意菜，賀團年！上次坐裡面，環境較幽靜，騷擾性少；但今次訂枱時要求坐出面假露天位，睇吓又點，感覺就喺開揚啲。
 |
套餐餐牌，分2、4、6人餐。
|
 |
| 散叫餐牌 |
焗磨菇 $73首先上嘅頭盤喺焗磨菇，一客6粒，無論做法、伴碟都唔同咗。以前6粒焗磨菇都喺以機磨菇醸入馬蘇里拉芝士、香草汁、忌廉汁嚟焗，今之就3粒以馬蘇里拉芝士、香草醬嚟焗，另3粒以以羊奶芝士醬搭香草醬嚟焗，並棄麵包球改伴麵包條，但就同樣配上乾蕃茄醬及香草汁。焗磨菇水準依然，菌香之下帶少許焦香，非常多汁，不過啲麵包條稍為乾身。
迷迭香脆包 $60以迷迭香、蒜蓉、特純橄欖油、辣椒、海鹽所做嘅脆包，點啲薄批嘅樣子，只喺無餡啫，又脆又香，充滿迷迭香同蒜蓉味，配湯我估效果更好，可惜套餐唔包湯，散叫一客成$50一碗，感覺有啲唔划算。
主廚精選沙律 $112沙律有3款揀：夏日沙律、主廚精選沙律、雞肉凱撒沙律，揀上中間嘅主廚精選貪佢材料用上較多種類，包括雞肉、火腿、芳堤娜芝士、艾蒙頓芝士、橄欖、有機雞蛋、酸豆、車厘茄、青菜沙律，伴招牌沙律醬，不過，感覺上成個沙律無咗一份整合性，只喺一堆材料好似盆菜咁逐層逐層放埋一齊，無乜個性。PizzaExpress啲沙律醬喺另上，亦可要求混入沙律中，所以，小弟覺得依款沙律應該要求將沙律醬預先跟所有材料撈勻個做法會好好多。
美國辣味薄餅 $134薄餅分為羅馬薄餅或那波里薄餅，今次就改咗分為羅馬薄餅（餅底更大、更薄、更香脆）、輕盈薄餅（薄餅中間挖空換上新鮮火箭菜，再配上唔同材料）、傳統薄餅（傳統餅底，只喺羅馬薄餅厚少少，但就絕對唔喺晌PizzaHut見到厚批嗰種。美國辣味薄餅屬於傳統薄餅，但餅底仍然幾薄，咬落唔會太脆，但就帶點煙韌，餡料方面有匈牙利肉辣腸、墨西哥辣椒、巴馬臣芝士，蕃茄醬。芝士同蕃茄醬很香濃，而辣腸加辣椒又帶嚟點刺激，餡料少及鋪得唔平均喺美中不足之處。
煙三文魚薄餅 $139第二個薄餅都喺傳統薄餅，而且揀煙三文魚薄餅需另加$20。餐牌食有嘅材料包括：煙三文魚、刁草、忌廉芝士、fior di latte芝士、檸檬，fior di latte芝士好陌生，事後上網翻查一下，喺意大利文，字面意思喺milk’s flower，小弟戲謔佢為奶花芝士，跟水牛芝士做法相同，只喺奶來源唔喺水牛，而喺源自一般母牛。依個薄餅又幾正喎，煙三文魚大大塊鋪上批面，煙燻鹹香，而忌廉芝士、「奶花芝士」、蕃茄醬嘅配搭唔錯，如果落多啲刁草就仲好。
海鮮意粉 $115 睇唔出個海鮮意粉喺依期食譜嘅新菜式，因為一般印象海鮮意粉都喺大路嘢。其實個賣相唔喺好靚，感覺碎碎亂亂，不過睇真海鮮料十足，有蝦肉、蜆肉、青口、魷魚，而且質素唔錯，配以白酒蕃茄醬汁，雖然酒香唔重，但勝在蕃茄醬惹味鮮活。
甜品以前甜品送兩份甜品拼盤，即喺6件迷你甜品（亦即喺正常份量嘅一半），依家就改咗跟甜品3客（朱古力蛋糕或意式芝士餅），但份量屬正常份。如果想升級，可以+$20升為甜品拼盤（晌焗麵包球配朱古力榛子醬、朱古力蛋糕、意式芝士餅、芝士蛋糕任揀3款迷你裝）。
朱古力蛋糕 $56黑漆漆嘅朱古力蛋糕，質地濕潤，朱古力味濃，正呀！仲伴有一球雲喱拿雪糕，雪糕表面睇出粒粒雲喱拿籽，質應柔滑，原來喺XTC品牌，怪不得咁有質素。
意式芝士餅 $60意式芝士餅亦做得出色，馬卡風芝士打得幼滑，手指餅有酒香無過濕，面層唂咕其實可以唔使打咁厚。
甜品拼盤由獨立要咗一件朱古力蛋糕同一件意式芝士餅，所以個甜品拼盤就揀1件芝士蛋糕 + 2份焗麵包球。芝士蛋糕依然有水準，雖則今回個消化餅底整得頗厚，但無改芝士餡心味道濃郁及柔軟；相反，焗麵包球可能唔太啱朋友嘅口味，大家都覺得麻麻，口感乾又唔暖。
飲品可揀汽水（$35/罐）：可樂、健怡可樂、雪碧、乾薑水、礦泉水（250ml），或+$10轉橙汁、紅莓汁、蘋果汁、咖啡、茶、無限添飲凍檸茶（$38），又或+$25轉一支啤酒、一杯餐酒。我哋又頗一致喎，6罐乾薑水吖，唔該！哈哈！
個人評分
味道：7/10
環境：7/10
服務：8/10
抵食：8/10
平均每人消費：HK$130
餐廳資料：
Pizza Express
九龍塘達之路80號又一城2樓43號舖
3691 8691
沒有留言:
發佈留言