Le Chef：情調浪漫賀年菜

上年10月初跟老婆嚟食咗一餐賀佢生日，當時對環境、服務、食物都甚滿意，估唔到事隔數月再重臨此地，不過，有別上次嘅浪漫西餐，環境依然喺情調浪漫、寧靜優雅，但獲邀試菜喺中式嘅賀年套餐，無錯，真喺賀年套餐！雖然都知Le Chef喺做東西共融嘅混合菜，但估唔到賀年菜一樣有做，所以對此都幾好奇，想睇睇佢點將新派又融入傳統，晌度再次多謝酒店公關嘅安排及款待。

由於之前已寫過佢嘅環境、服務……等等，所以今回就省略唔多講，直接寫寫所試嘅賀年菜，唯補充一句，據侍應解釋，廚房方面有啲出錯，所以整個晚餐上菜極慢。整個菜單一共有8道菜，都喺取其意頭「發」嘅意思，而整個鋪排多少都參照番傳統一圍酒席個模式，有拼盤、有湯、有海鮮、有菜、有魚、有肉、有飯、有甜點，但出餐上菜就以西菜格局，所以有餐前麵包籃，以及餐後咖啡或茶。當中嘅菜式，有啲喺融合菜，有啲就純屬中菜，個人而言，感覺幾特別，因為像食中菜，又似食西餐，鍾意試新嘢嘅人大可一試，可能有另一番體會。

麵包籃．四式佐料
跟上次一樣，麵包籃有3款麵包：長條意大利包、小圓法包及小圓麥包，送嚟時都喺暖烘烘，而麵包籃以大餐巾半包裹著，盡量幫麵包保溫。4款佐料喺：軟牛油、檸檬橄欖油、意大利黑醋及香蒜沙律醬，前三者上次都試過，檸檬橄欖油嘅清香仲喺記憶猶新；而上次嘅蕃茄沙沙無咗，換嚟香蒜沙律醬，同樣出色喎，沙律醬帶有好香蒜蓉味，塗包依然好食。

八喜臨門（Le Chef Sampler）
打頭陣，唔喺乳豬全體，更唔喺燒味拼盤，喺一道名為「八喜臨門」嘅點心拼盤。分別喺蜜汁叉燒、日式七味粉豆腐、鵝肝多士、沙拉蝦丸、蜜鹵腩仔肉、鮑魚燒賣、海蜇、甜酸青瓜仔，以一塊啡黑色石板盛上，甚有原始味道，頗有視覺享受。個人推介食法，最先應揀日式七味粉豆腐，雖然下咗七味粉，但味道較清淡；跟住就可以燒賣、叉燒、蝦丸、多士、腩仔肉，味道由淡到濃輪住食，幾樣嘢味道唔錯，可惜只喺蜜鹵腩仔肉香濃卻唔夠鬆化；最後就喺海蜇及甜酸青瓜仔，集爽、酸、辣，有助清新一下口腔，準備迎接下一道菜。

黃金蟹肉湯（Pumpkin with Crab Meat Soup）
「黃金」為南瓜也，南瓜以日本或歐洲南瓜仔為主，燒香再刮肉嚟做南瓜湯底，有別平常飲到嘅南瓜湯，因為大廚話無加麵粉，無撈忌廉，以南瓜淨肉嚟打，怪不之得南瓜味濃，不過唔知喺咪品種問題，個湯頗甜，有啲甜得過份嘅感覺。雖則賣相唔喺好靚，但湯中配以蟹肉，自不然令個湯更見矜貴，再以大圓湯碟載住，猶如西湯一道。

美極大蝦（Wok Fried King Prawn in Maggie Sauce）
整晚較回歸西菜模樣嘅菜式，大蝦鎅背以美極鮮醬油香煎，伴以少少沙律菜，賣相簡單而精緻。大蝦好厚肉，因已鎅背，拆殼亦非常容易，不過，肉質唔算得好彈牙，但味道保持到鮮甜。

瑤柱扒豆苗（Braised Pea Shoot with Conpoy）
絕對喺常見嘅傳統菜式，無加入任何西菜或融合元素，足可睇睇大廚煮中菜嘅手勢。豆苗很嫩綠，以高湯煮過，最搶鏡就喺放面嘅瑤柱絲，落得一啲無手軟，近乎鋪滿碟面。

蒸澳洲鱸魚柳配白露筍海膽汁（Steamed Sea Bass Fillet with White Asparagus in Sea Urchin Sauce）
中式做法、西式賣相、日式醬汁嘅蒸鱸魚，確喺一道頗為好食嘅魚鮮菜。澳洲鱸魚柳魚油多，平時多數用作煎，但蒸出嚟嘅效果都唔錯，魚肉挺滑溜；而墊底嘅白露筍，大廚話為咗去除其苦澀味，用上白酒、沙糖、蔬菜湯煮過；至於汁料除落咗豉油外，晌上面仲淋咗少少海膽汁，令鱸魚添加幾分海洋鮮味，構想幾有心思。不過，大概豉油下得多咗，部份魚肉及白露筍稍為過鹹，需留意嘅地方。

清炒蒜片牛肉粒（Sautéed US Beef in Garlic）
鮑汁海鮮荷葉飯（Fried Rice with Seafood & Egg White in Abalone Sauce wrapped in Lotus Leaves）
雖然喺兩道菜，但為求賣相好睇及豐富啲，所以以大碟放埋一齊。清炒蒜片牛肉粒賣點在於用咗美國熟成（dry aged）牛肉嚟做，雖知熟成過肉味都會較為濃郁，肉質亦都鬆化，配以醬汁、蒜片，幾惹味嘅組合，伴有少許時蔬襯托吓。本應依道菜值幾高分，唯可惜又再出現過鹹嘅情況，實有需要改善一下，看看所用嘅醬料來貨會否出現問題。
荷葉飯以迷你蒸籠盛載，咪睇佢籠仔細細，實質成碗飯有多，極之抵得飽肚。飯粒分明爽口，內裡有好多海鮮粒及蛋白碎，不過鮑汁味唔太突出，荷葉亦做樣大於實際，所以唔好期望飯粒好有荷香味。

焦糖燉蛋煎堆配杞子焦糖汁（Deep-fried Sesame Dumpling filled with Custard in Lycium Caramel Sauce）
正所謂「煎堆碌碌，金銀滿屋」，應吓節又配合番個菜譜，一道中西合壁嘅焦糖燉蛋煎堆幾富創意及配合餐廳路線。初初睇見個菜單，焦糖燉蛋 + 煎堆，點搞呀？啊！原來以小煎堆為藍本，內裡釀入焦糖吉士，實際並非真喺焦糖燉蛋嚟，睇佢個英文譯名就見到啲端倪，但又好奇怪，咁點解唔索性叫「焦糖吉士煎堆」呢？大概因為吉士無咁好聽啩。言歸正傳，講番道甜品，煎堆做得真有一手，外脆內暖，煎堆沾滿白芝麻，好香口，而裡面嘅焦糖吉士，軟滑香甜，再者令個煎堆食落無咁乾身。伴以杞子焦糖汁，杞子功效明目、潤肺，但做唔做到療效都喺其次，首先味道已帶嚟驚喜，小弟不嬲都鍾意焦糖香，滲以點點杞子味，質感細滑，雖然味道頗甜，但感覺挺特別，我都幾鍾意依個甜品，個人建議，就算唔作為賀年菜，大可放晌平時晚餐餐牌度，等其他食客有機會一試！

雖然話大部份菜式都以西菜包裝，份量精緻，做得的骰，但連埋麵包籃，8道菜加起嚟真喺食得人非常之飽。以$498一位都算抵食，人多仲有著數添喎，$888 / 2位，$1,288 / 3位，$1,588 / 4位（需加一服務費），如多過4位，以4位價錢除平均嚟逐個計。個人小貼士，唔算好大食嘅人，尤其女士，真喺可以叫一份嚟兩個人食，又或叫兩份嚟三個人食。如仲未有計劃去邊度食團年飯或開年飯，不妨到Le Chef一試佢個賀年套餐，供應期為2013年2月9-12日。祝各位食友餐餐食得稱心滿意，日日過得開懷寫意！
題外話：
除賀年套餐外，Le Chef當然會有情人節套餐供應啦，供應期為2013年2月13-14日兩日，價錢跟賀年套餐一樣，以5道菜為標準，有興趣人士可到佢哋酒店網址或面書查看。

個人評分
味道：6/10
環境：9/10
服務：7/10
抵食：8/10
平均每人消費：HK$0（試食活動）

餐廳資料：
Le Chef
灣仔軒尼詩道41-49號香港灣仔維景酒店M字樓
2863 7345