新星海鮮酒家：新星鬥新星（二）

上文「新星鬥新星（一）」都講過一向食開長沙灣新星，直頭當火鍋飯堂，點解今次會幫襯依間旺角新星。不過，真喺估唔到長沙灣店會訂滿位，反而旺角仲有得訂。當晚去到，見門口一個人都無喎，嘩！旺角嚟喎，天寒地冬，又喺星期五晚，做火鍋嘅唔喺咁靜呀？原來喺錯覺，旺角新星有兩個入口，一個晌廣華街（好靜無人嘅一邊），另一個晌豉油街，晌豉油街嗰邊多人多到塞實晒個門口，好彩有訂位，夠9:00pm即有枱喇！

好靜嘅一邊，廣華街入口。

熱鬧非常嘅一邊，豉油街入口。

環境比長沙灣店差好多，枱逼樓底矮，人聲鼎沸，嘈到拆天，我哋坐10人枱，真喺聽唔到對面位講咩，結果又要同隔離枱鬥大聲，嘈上加嘈。還好嘅喺服務唔錯，負責我哋嗰枱嘅阿叔，快手快腳，又好好聲氣。

枱逼樓底矮，非常之嘈吓！

今次都喺食9:00pm後無時限任飲任食打鞭爐，不過就無咗會員嘅4送1，收費跟長沙灣一樣，成人人頭費$88，茶芥$10位，醬料$10碟（XO醬$10碟），另加一服務費，仲有湯底另計，我哋要咗粟米銀蘿豬軟骨（$68）同胡椒豬肚（$65），埋單$1290，每人都只喺$130，仍然覺得抵食！不過，依度仲有啲湯底+小食孖寶套餐組合：$88有齊一款湯底、一款小食加一款特色飲品，個人覺得較適合人少嘅情況。而任飲就只有百事可樂、七喜、啤酒，無咗啲清熱嘅夏枯草或甘蔗水，如果要嘅就斷渣賣，計起嚟唔划算。

雖然喺咁，我哋依然不停食，頭尾出咗3盆大加1盆細嘅火鍋料，食咗乜都無謂多講，跟其他分店應該都無乜兩樣，而臨尾又烏冬、又出前一丁，但喺整體嚟講，用料質素感覺都喺比長沙灣店差啲啲！這晚，我哋實行要不飽無歸喇。之不過，各位老細話應該唔會再嚟依間新星，都喺返番長沙灣嗰間好啲，多啲親切感喎！哈哈，個個年紀大，食店都要講吓感情。

個人評分
味道：7/10
環境：4/10
服務：8/10
抵食：8/10
平均每人消費：HK$130

餐廳資料：
新星海鮮酒家
旺角廣華街15-33號明威閣地下至2樓
2780 2226