對上一次晌依間鳳城食已經喺2008年初嘅事，其實嗰次印象麻麻，今次再嚟，枱櫈依然喺咁逼，人手依然喺唔多夠，服務依然喺麻麻哋，但今次所點嘅食物大家都食得津津有味，好啱胃口，尤其個梅子焗米鴨，真喺好duck。
嚟鳳城點依道菜都算喺指定動作，一客12件（例牌），侍應話可以按人頭再加，不過有啲細路唔食得炸嘢，所以照要一個例牌都可以喇。大蝦去穀挑晒腸起雙飛，夾住一小炷蕃茜，跟白麵包炸成蝦多士。件蝦多士本身已經唔算油，但蘸點喼汁，油膩感就更輕，多士底非常脆，而大明蝦肉質爽甜、蝦味鮮，正！
鍋貼大明蝦都當喺道前菜小食，唔多好送飯，跟住再嚟亦都喺一樣，當前菜小食嘅鳳城炸粉果，依道菜又喺鳳城另一特色嘢。賣$68一打幾抵食，粉果餡料不賴，有蝦肉、冬菇、豬肉……等等，淨食已經唔錯，小弟個人食法喺要快浸一浸個湯，去油膩喺其次，令個炸粉果變得軟糯，但咬嗰吓先有點脆脆，慢慢又嗒到上湯甜味，最後就軟軟糯糯。
藕餅在於事前功夫，打蓮藕，搓豬肉，都要時間心機。蓮藕餅煎得非常香脆，藕味都幾突出，而質感有咬口又唔鬆散，好食！
晌張菜單上，樣樣嘢都有標價，但唯獨蔬菜類就無，只列低一堆菜名：豆苗、菜心、芥蘭、西蘭花……。煮法由你決定，又或問吓經理意見，依碟上湯灼芥菜胆就喺阿經理建議個煮法。芥菜胆經上湯灼過好鮮甜，帶點點爽口，唔點蠔油都OK。
另一道蔬菜菜式就揀個惹味啲嘅，蒜蓉豆豉炒夠晒香口惹味，而且啲炒菜夠鑊氣，送飯良伴。
家鄉炒斑球
一啲都唔斑球呀，大大件嘅斑塊，無骨啱晒啲細路食，肉質又炒得好鮮嫩，魚味濃，不愧為大海斑。仲有芹菜、蜜糖豆、木耳，幾款都喺口感爽脆嘅配菜，所以整道菜有嫩有爽，好穩妥嘅一道魚類菜式。
相對炒斑球，炆頭腩就濃香好多，頭腩份量亦唔少，而且炆過特別入味，充滿磨豉香。此外，墊有枝竹及冬菇，索滿汁，又喺好食。
炸子雞屬鳳城名菜，唔少客會點，伴有一小件檸檬壓汁加添炸子雞芳香，亦喺依度特色。老套一句，真喺皮脆肉滑，外皮確喺甘金鬆脆，油脂唔多，雞肉嫩滑入味，喼汁淮鹽都可以唔使點，帶少少檸檬芳香，果然別饒風味！
焗米鴨喺需預訂嘅菜式，亦唔似炸子雞有半隻買，所以我哋成圍枱，當然預訂一隻啦，結果個米鴨不負眾望。雖然唔知個焗米鴨點整，睇落應該無八寶鴨呀、玉簪田雞腿呀……咁複雜，但就真喺唔訂無得食。米鴨鴨肉好鬆化，又軟又腍，而且滲出濃濃梅子香，酸味得嚟啱啱好，唔會太過火，連底下啲梅子汁撈飯亦正，酸甜有肉羶香。
等咗好耐都未見個大良炒鮮奶，仲以為漏單，總之就千呼萬喚始出來。不過，成晚所有菜式，以依個炒鮮奶似乎有啲失準。奶炒得唔喺好滑，而且有少少怪味，所以大家試咗啲都無再夾喇。
焗布甸喺今晚另一個要預訂嘅菜式，亦喺鳳城名物，分細$68、大$88、加大$120，唔知點因算個份量，叫侍應安排就得喇。我哋10多個人，叫個大都已經OK，1人1小碗。布甸捧出嚟仲喺熱氣騰騰，新鮮出爐咁，焗得個面面有微焦，好靚。面層喺蛋漿同西米，底下喺白蓮蓉，既清香又軟滑，無過甜嘅毛病，超正！
我哋當中都有好幾個組員都鍾意食甜品，所以，既然個凍椰汁紅豆糕賣咁平，又點可以唔叫呀，仲一次過叫4客，盡量人人都試多少少。由於切割擺位問題，其實每件糕都有幾多紅豆，紅豆大粒清甜，而椰汁糕部份，亦好濃椰汁味，質感亦唔會太削。
個人評分
味道：9/10
環境：5/10
服務：4/10
抵食：8/10
平均每人消費：HK$220
餐廳資料：
鳳城酒家 Fung Shing Restaurant
太子彌敦道749號歐亞銀行大廈1-2樓
2381 5261
沒有留言:
發佈留言