話說回來，今晚嚟到嘅Greyhound Café，就喺泰國時裝品牌Greyhound所開設嘅食肆，晌當地已非常有人氣，2011年10月首度來港，落戶中環國金，事隔數月2012年2月晌尖沙咀海運開設分店，勢估唔到就晌2012年聖誕前夕，再於九龍塘又一城開立第三分店。據知，北京三里屯亦已有分店，隨後亦會晌上海再開，小弟唔喺咁經常被邀試食，難得今晚獲公關邀請，與三幾個食友有幸品嚐一下這「灰狗」出品，實在感謝有關單位。
Greyhound主打喺賣fusion融合菜，今回又一城分店喺以「泰、意」菜為主題，除一眾泰國菜以外，亦有唔少融和兩者食材嘅菜式。未講食，環境都已經有啲亮點，全店裝修以時尚為主，但又加插咗懷舊冰室嘅元素，好似地上鋪咗以懷舊黑白灰花紋地磚，一道舊式士多拉閘間出一個私人派對空間，而牆上好多手繪畫作、粉筆字食譜，都喺一眾泰國設計師手筆，稍加留意，「私家房」嘅一側黑牆壁，原來喺榴槤圖案，摸上手喺一粒粒實感嘅榴槤釘，堪稱玩味十足。
 |
| 餐牌圖文並茂 |
Butterfly Pea & Stevia Tea $28嚟Greyhound好多人都會一試佢飲品名物Iced Lemon Tea (Greyhound Style)，不過公關有另一款推介，就喺依款花茶，餐牌內嘅飲品無中文譯名，大概可暫譯佢為藍蘭豆甜菊花茶，據介紹有減壓同抗氧化作用，日日對住啲蠻不講理、又扮失憶嘅老細，真喺要減減壓囉，一壺藍蘭豆甜菊花茶吖，唔該。花茶起初喺半透明淺藍色，慢慢會轉為墨水藍而不見底，雖然花香唔突出，但下點點蜜糖（如需蜜糖喺要揚聲），清幽中滲出滋潤，實屬秋、冬天窩心熱飲之選。
Iced Lemon Tea (Greyhound Style) $32餐前試咗杯花茶，去到尾段，對「灰狗凍檸茶」仲喺有啲心癢癢想試，唔客氣多要一杯凍檸茶。相信好多人都知依杯凍檸茶嘅亮點喺邊，原粒茶冰配青檸，確實飲到尾茶味依然。其實，佢仲有一系列Healty Cocktail（雜果汁）、Bangkok Favorite（泰式特飲），從餐牌睇賣相、睇成份，相信又幾值得一試。
招牌脆炸單骨雞翼（Greyhound Famous Fried Chicken Wings）$68將雞翼一開為二成骨雞翼，比食成隻方便少少，不過小弟唔太覺得有咩噱頭，如果你話成隻去晒骨又保持番雞翼嘅形狀，啖啖肉，咁就無得彈喇。但喺，貴為招牌，唔可能因為「單骨」就變得咁「巴閉」，以魚露醃製喺其一大特色，外皮本已炸得啱火喉非常脆身，細嚼雞肉，魚露鹹香徐徐滲出，大可作為配啤酒嘅惹味小食！
薄切三文魚配泰式辣汁（Salmon Carpaccio in Spicy Hot Sauce）$98有一道出名泰菜叫「泰式生蝦」，依道三文魚就喺以此為藍本，以三文魚替代生蝦，亦成為咗Greyhound嘅招牌菜之一。賣相幾養眼，橙襯綠，食法好簡單，以鮮三文魚捲住芫茜香草碎、生蒜片，一啖過放入口就最正；因為薄切關係，口感唔會太油潤，反而很鮮滑，加上落咗自家製泰式辣汁，帶少少辣，但又夾晌香草嘅芳香中，喺味道多種層次嘅感受。
泰式柚子沙律（Pomelo Salad）$88柚肉一向都常見於泰式沙律之中，泰國金柚柚肉果然飽滿多汁，再配以花生、蝦乾碎、魚乾仔，多一份脆口感，簡單淋上甜檸檬汁作卜調味；食落你會嗒到啲椰子味，原來混雜在魚乾仔當中仲有啲炸椰子薄碎，甚有畫龍點睛之效。改改食法，大可以用跟沙律伴碟嘅羅馬生菜，包住柚肉、魚乾仔一齊食，感覺更清爽。
特式家鄉燒羊串（Waterfall Grilled Lamb）$88（新菜式，分店限定）點睇都難以想像同泰、意菜有關聯，其實喺為北京新店而創作嘅分店限定新菜，標誌由北京帶嚟，既然要誇國界，依款菜就變成中、泰混合，孜然粉當然無得留低，換咗一身泰式香味，以泰北香料、青蔥、京蔥、乾辣、檸汁醃製。羊柳非常軟熟，羶味唔重，夾雜層次多變嘅香料味，有啲驚喜。而碟中嘅青瓜串，無咩賣弄，單單幫你清清味蕾嘅瓜串！
特色椒鹽蝦（Aromatic Shrimp）$148（新菜式）又喺另一款前菜新菜式，蝦隻唔喺好大，呎吋大概一個5蚊銀，去頭去殼，方便食用。雖然中文譯「椒鹽」，但有欠不足，反而英文用「芳香」（aromatic）一詞，小弟覺得傳神啲，因為鮮蝦用上蒜蓉、岩鹽、香茅、辣椒嚟整，又以香茅味道較突出，椒鹽味反而其次，而蝦肉又挺爽彈喎；除咗可加添檸檬汁令炸蝦食落更清新之餘，仲可以蘸點特製醬汁，蒜蓉酸忌廉醬，帶蒜香得嚟又有一朕酸爽柔滑，確喺值得推介嘅前菜之一。
水牛芝士漢堡（Buffalo Burger）$128（新菜式）一上枱就已經很引人注目，無他嘅，超黑外型，定必令人猜想喺乜，未食已引起咗話題先。其實漢堡喺添加咗墨魚汁嚟做，再撒上黑芝麻，賣相又真喺幾型格，不過，味道卻又唔喺有咩好特別。可是，內餡用料就唔講得少，一大撮厚厚嘅水牛芝士，既有奶香，又極軟滑；中間嘅羅勒、洋蔥、蕃茄好新鮮；至於下層嘅手打漢堡牛肉，近1吋厚，好實在，口感鬆化，肉味又夠，真喺好正！唔好錯過嘅仲有伴碟嘅炸薯條，粗身有薯味，趁熱食，先夠香脆！
意式烤牛肉三文治（Roast Beef Panini）$118（新菜式）既然混入咗意大利元素，三文治類點可以無Panini意式烤三文治份架！搽咗牛油經過烤烘嘅麵包，外觀有啲似大版嘅蒜蓉法包，裡面除有一大塊烤牛肉外，仲夾有烤紅椒、黃椒、茄子同青瓜片，再塗一遍意大利辣蒜醬。鬆脆嘅麵包，搭上豐富鮮味嘅餡料及滋味醬汁，三文治中嘅高級享受，如果以帶有條紋嘅烤烘機壓出炭炸紋路，賣相自然更殺食。當然，要好就要付代價，百多元食一份三文治，有啲人總覺得會奢侈咗少少！
泰式銀魚柳意大利麵（Spaghetti with Thai Anchovy）$98又一Greyhound招牌菜式，顧名思義，就喺以泰式銀魚柳配搭意大利粉作融合。其實份量有點偏少，而且賣相普通，但下銀魚柳蓉不少，每炷意大利粉都掛有銀魚柳蓉，啖啖鹹鮮，加上調味方面又落咗泰式辣椒油及新鮮泰國青胡椒粒，不過唔喺好辣嘅啫，但就風味獨特。
 |
| 成串串泰國青胡椒，用料不賴！ |
香草辣椒炒雞肉碎配白飯（Minced Chicken with Sweet Basil and Hot Chilies）$108其貌不揚，跟茶記嘅碟頭飯無乜兩樣，因為佢就喺晌曼谷街頭巷尾常見嘅街坊美食，一客飯配個清湯，好多人就咁又一餐架喇！免治雞肉以香草辣椒同炒，在小弟嚟講唔算好特別，反而隻煎荷包蛋稍有亮點，流心得緊要，最鍾意蛋黃撈飯食，真想加埋豉油添。跟飯嘅清湯喺大頭菜肉丸湯，湯味不俗喎。不過呢，晌咁有格調嘅環境，俾百多銀食呢個街頭「碟頭飯」，感覺有啲唔襯啫！
泰式炒螺絲紛（Fusilli Phad Thai）$98（新菜式）相對上面個意大利粉，小弟就稍為鍾意依個嶄新嘅螺絲紛。一來個螺絲紛煮得非常有咬口，恰到好處；二來，跟泰式醬汁炒過，帶點甜又有花生香，好有趣嘅味道。此外，加埋芽菜、花生碎、蝦乾碎，再唧啲青檸汁，爽口醒胃！
泰式鹵水鴨湯河粉（Noodle with Thai Duck Stew）$88（新菜式）純泰式粉麵，河粉用上金邊粉，質感滑溜；湯頭以牛骨熬製，幾濃郁鮮香；而最大賣點應該喺隻鹵水鴨脾，鹵水濃郁又入味，鴨肉唔躁又鹵得腍。另外跟湯河粉同上嘅調味料，有：黃辣椒汁（原來都頗辣，被佢鮮黃色個樣呃晒）、魚露、沙糖（用嚟中和吓啲辣味）、辣椒粉（比黃辣椒汁仲辣），想點就「點」。
食完一輪前菜同主菜，體會到味道嘅多變，泰、意菜彼此嘅融和，感覺已好滿足。但依份滿足並未完結，繼續再由甜品延續，如果講到Greyhound嘅甜品，不得不提佢所提供嘅選擇。一般café通常都喺3、5、7款，但佢嘅甜品餐牌有額外另一本，由頭翻到尾，足有29款之多，雖然其中有啲喺同類型而唔同味道，不過，計落選擇仍多。今晚公關為我哋挑咗4款嚟評一評，等小弟介紹一下。
 |
| 甜品餐牌，一共有29款選擇！ |
香蕉榛子芝士餅（Banana and Nutella Cheese cake）$52以美式芝士餅為基礎，晌芝士餅面層塗上一朕薄薄Nutella榛子朱古力醬，再加上香蕉片及灑上唂咕粉就成為依道甜品。消化餅餅底做得無鬆散，牛油亦唔覺過多；而芝士蛋糕部份挺身得嚟幾柔軟，芝士味相對無出面餅店咁重，可能為咗平衡番榛子朱古力醬及香蕉嘅香，確實，熟透嘅香蕉片，夾雜住芝士同榛子朱古力味，幾吸引嘅味道組合！
新鮮椰子千層蛋糕（Fresh Coconut Crepe Cake）$68Greyhound嘅甜品名物，愛好椰子味道嘅人首選，無他嘅，以新鮮椰子拆肉，雖然只有夾晌千層蛋糕中間幾層，但已經充斥住椰子香味；而輕柔軟滑嘅忌廉跟幼薄嘅法式薄餅皮相間交織，雖則一共有10層之多，口感依然好輕盈，加上雪白外型，非常討好。
鮮芒果糯米芭菲（Sticky Rice+Mango）$58跟大家玩玩個是非題，究竟「Mango with Sticky Rice」同「Sticky Rice + Mango」喺唔喺一樣呢？晌其他地方我唔知，不過，晌Greyhound就喺兩樣嘢，前者喺 #20甜品，外觀喺較傳統嘅泰式甜品，白糯米淋上椰奶伴芒果；後者喺 #22甜品，亦喺今次所試較潮嘅甜品。以水杯為盛器，一共4層，由下而上分別有糯米、椰奶、芒果粒及椰子雪芭，糯米軟糯煙韌，芒果粒極之香甜，而雪芭嘅椰子味唔算好濃，但一羮過將4樣元素放入口，感覺十分之過癮。
 |
| Mango with Sticky Rice |
 |
| Sticky Rice + Mango |
鮮製蘋果金寶（Fresh Made Apple Crumble）$58小弟都幾鍾意食蘋果批，所以蘋果金寶同樣都得我歡心，難得今晚有依道甜品作結，非常滿意啦。由於新鮮烘焗，所以一上枱特別香，下層喺玉桂蘋果粒，青蘋果粒已焗得軟透，滲滿玉桂，酸香有緻。至於上層嘅金寶，其實唔難做架，喺麵粉牛油粒，即喺切小粒牛油再撈勻麵粉，效果好正，外層脆脆內裡富牛油香。加上師傅特意配上雲呢拿吉士漿，粒粒雲呢拿籽絕對喺真材實料嘅證明，個吉士漿令整個蘋果金寶更香甜，冬日窩心暖意甜品之選！
由環境裝修、服務招呼、食物質素，每一環都甚高水準，絕對值得一試嘅品牌餐廳。再次晌度謝過餐廳負責人、公關嘅細心款待，令小弟大飽口福之餘，亦跟三幾位食友歡渡咗一個晚上！
個人評分
味道：9/10
環境：8/10
服務：8/10
抵食：8/10
平均每人消費：HK$270
餐廳資料：
Greyhound cafe
九龍塘達之路80號又一城2樓L2-42號鋪
2383 4838
沒有留言:
發佈留言