Arome Bakery Room東海堂：情人節．草莓．紅白の恋

日本每年都搞個紅白歌唱大賽，男女歌手都大顯實力，紅、白，日本人傳統上都認為紅白色嘅組合有吉利同恭賀嘅意思，所以晌慶祝生日、結婚……等高興日子，如果送生果嘅話，就鍾意將紅色及白色嘅士多啤梨放埋一齊當賀禮！白色士多啤梨？無錯，相片唔喺電腦加工，真喺白色。按常理計，我哋一般都會挑最紅嘅士多啤梨，但依一款「白い草莓」絕對喺要顛覆常理嘅珍罕新品！

靜岡縣直送，你又估吓一盒要幾錢？

每夥零售價高達840円

！

不得不佩服日本人對種植生果嘅熱誠、用心及毅力。佢哋晌過去大半個世紀不斷鑽研士多啤梨嘅培植，不斷研發新品種，仲改到啲名特別有雅氣詩意：熊本縣「露之水滴」、福岡縣「甜王」、靜岡縣「初戀之香」、和歌山「幸之香」、佐賀縣「穗之香」、愛知縣「秋姬」……等等。

早前先啱啱試咗東海堂數款甜品蛋糕，小弟依晚有幸獲佢哋邀請，出席為今個情人節，以「恋の盛宴」為主題嘅新出品發佈試食會。當中，以「白い草莓」靜岡縣初戀之香及「赤い草莓」佐賀縣穗之香士多啤梨為最矚目，尤其前者，絕對喺一期一會嘅珍罕之味！是次「恋の盛宴」系列一共有4款產品，能夠先睹為快兼試味，加上小弟第一次出席此等新產品發佈會，自然更加興奮，晌度再次多謝店家公關嘅邀請！

一眾主題蛋糕陳列晌長枱之上

何以白色士多啤梨極罕有？因為種植煩囉，咁又點解要種呀？因為佢好味囉，甜度比一般士多啤梨高，誇張啲咁講就喺甜得過分，未入口聞落已很有士多啤梨嘅幽香。據網上資料喺日本一家叫 Agri-Tech嘅公司花咗成廿多年時間研發出嚟嘅新品種，都喺早幾年前先正式推出市場，目前日本全國都只喺有約10個果園能成功栽種，晌當地也只能限量發售，每夥零售價高達840円（近排日元匯水低咗，折咗都成HK$73粒），有啲送禮嘅盒裝，隨時賣到成21,000円（~HK$1,800）。價高不外乎產量極少、物以罕為貴，農民晌種植期間，喺用紙逐粒逐粒咁包著，完全隔絕晒陽光，令佢哋唔含一般士多啤梨嘅紅色色素，慢慢完熟，種植成功率相對很低，就算熟成咗，都喺一身白裏透紅，仲要喺隱約淡紅，就好似少女初嘗戀愛滋味嘅可愛臉兒，故此，日本人將它命名為「初戀之香」（初恋の香り）。不單外表偏白，連果肉都喺白色嘅，而味道意想不到咁好，香氣濃郁，一般士多啤梨甜度介乎10-12，但喺「初戀之香」一般去到14，再靚啲可高達17度，半點酸澀都無，兼且果肉敦厚、汁液豐盈，故此，不愧近年都被喻為水果界嘅矜貴之最。店方破天荒首度引入，誠意呈獻，讓大家可以跟另一半品嚐最珍貴甜蜜！

「白い草莓」$438
賣相已有點先聲奪人，以朱古力製作嘅「木紋手飾盒」，而盒蓋面加添白朱古力蝴蝶結，更見精緻，再以白朱古力碎營造如雪花白般絲絹，晌上面放有4粒原粒「初戀之香」，雖知日本多會為士多啤梨以重量嚟分級數，粒粒呎吋碩大又一致，絕對甚具「份量」。既然蛋糕落本咁重手，包裝更唔可以失禮，專為「白い草莓」而設嘅淡黃色禮盒，配以香檳金絲帶，高雅而瑰麗。盒內蛋糕以雲呢拿慕絲夾朱古力海綿蛋糕，雖然我哋無機會試到個「真身」，但店方已為大家預備好杯裝形式呈獻依份甜蜜，試試這個白い草莓嘅「味力」，很抱歉，依個杯裝試食版喺非賣品，專為今次活動而設，立時感到真喺可遇不可求嘅幸運！雲呢拿慕絲很幼滑香甜，雲呢拿味極之香濃，而海綿蛋糕細密鬆軟，簡單俐落嘅配搭。主角白い草莓，體態完美，咬開內裡果肉都喺呈白色，但甜得意外，軟熟多汁，果真香氣馥郁，超正。

店方為一眾博客製作嘅試食杯裝（非賣品）

因為用上「初戀之香」士多啤梨，全由靜岡縣直送，成本頗高，所以限量發行，必須預訂，無即時現貨買。據公關透露，1月28日到2月3日期間可到店方網址作優先訂購，有85 折優惠，但只限「白い草莓」蛋糕。(http://www.aromebakery.com.hk/tc/category_detail.asp?cid=1011&v=vday)，此優惠只適用網上訂購，不可與其他信用卡優惠同時使用。

「赤い草莓」$198
另一款焦點新作，以佐賀縣嘅「穗之香」（穗の香）士多啤梨為賣點，賣相跟「白い草莓」差不多，只喺換上鮮紅亮澤嘅士多啤梨，朱古力盒蓋上改以紅色蝴蝶結作配襯，同樣典雅精緻。盒內蛋糕則以雜莓慕絲蛋糕搭純味海綿蛋糕，為方便一眾博客享用，一樣特別製作咗非賣品嘅試食杯裝，點知造型更吸引，杯內雜莓慕絲跟海綿蛋糕層層相間，杯面加咗士多啤梨鮮果醬、開心果仁碎及士多啤梨脆糖，唔少得仲有主角「穗之香」。又要講聲抱歉，「真身」當然少咗鮮果醬、果仁碎及脆糖啦。不過，單以清甜柔滑嘅雜莓慕絲、鬆軟回彈嘅海綿蛋糕，以及鮮甜飽滿嘅「穗之香」，足以叫人感受到甜蜜滋味。此外，格價比起「白い草莓」相宜，實屬抵食之選！

「赤い草莓」嘅試食杯裝（非賣品）

「心の恋人」$138
雖然無刻意用上咩特級士多啤梨，但造型極具心思，絕對喺以貌取（悅）（情）人啦，立體紅心、格仔網紋絨面，俾人感覺浪漫至極。蛋糕內包含雜莓慕絲、新鮮士多啤梨粒同士多啤梨夾心，又喺另一款令人期待之作！

「恋莓絮語」$98
貫徹近年做得頗成功嘅cake little系列，依款「恋莓絮語」甚有cake little（情人節版）嘅影子，以小巧精緻嘅賣相推出，外型簡約，不賣花巧，但蛋糕面上嘅原粒士多啤梨同樣用上日本來貨，仲要有成8粒之多，下層為草莓忌廉蛋糕，喺較為傳統情人節蛋糕嘅組合，而且訂價非常吸引，要換嚟甜蜜幸福滋味也可以經濟一點嘅。

白い草莓配白酒啫喱
店方還送贈每位一份小禮物預祝大家情人節快樂，透明玻璃雞蛋裡邊原來喺白い草莓配白酒啫喱。原粒白い草莓「初恋の香り」浸泡晌白酒啫喱內，粒士多啤梨好食唔使多講，老婆大讚清甜多汁，而白酒啫喱味道清爽、酒香柔和，令人再三回味！真喺一份喜出望外嘅心意。

溫馨提示：
4款「恋の盛宴」蛋糕系列由2月1日起全線東海堂接受預訂。
「白い草莓」取餅日期為2月12日至17日，且只供訂購，不設門市零售。
「赤い草莓」、「心の恋人」、「恋莓絮語」取餅日期為2月6日至2月17日，門市同步有現貨發售。

數款情人節主題蛋糕，有貴有經濟，大可按能力買個嚟氹氹身邊另一半，平貴都好，最緊要喺份心意啫，祝願情人節快樂。

個人評分
味道：9/10
環境：7/10
服務：8/10
抵食：8/10
平均每人消費：HK$0（試食活動）

餐廳資料：
Arome Bakery Room東海堂
金鐘金鐘道93號金鐘廊Lab Concept F03號舖
2529 5938