南翔饅頭店：咁近城隍廟，唔喺要求簽

記得初開業時，因為挾著直上海豫園城隍廟直營店過江龍之名，都想試一試，不過每次嚟都人山人海（星期日午市時段），漸漸打消咗個幫襯嘅念頭，興致亦隨時間減退。

今回唔喺刻意嚟搵食，只喺撞啱老婆教會有嘢搞，完咗之後同另一對夫婦食餐飯，綠楊坊港鐵上蓋，勝在方便，過嚟南翔望望，無人排隊仲即刻有位，所以二話不說就入去。綠楊坊內嘅食肆，以南翔裝修最雅致，仿明清古建築，燈光柔和，卡位寬敞，通道闊落，感覺唔侷促又幾好坐。而價位屬於中檔次，三幾個老友聚一聚，傾吓長偈，喺個幾唔錯嘅選擇。不過，同樣都喺星期日，跟以前人多時嘅情境好不一樣，難道味道走下坡？

鮮肉小籠 $40 / 6隻（$30 / 4隻）
小籠包分4隻 / 6隻分量，當然買得多平得多。肉味挺新鮮，質感刴得幼細，湯汁則稍為少，而外皮夠薄，只喺收口位摺起嚟略厚。

雞絲粉皮 $48
粉皮柔滑，芝麻醬下得夠狠，有人覺得重手，但以個人口味，小弟食腸粉要麻醬多過甜醬，所以依雞絲粉皮變得好啱我胃口，添上青瓜絲，多份清新口感。

炸饅頭 $26
既為饅頭店，大抵心理作祟，總要叫一客試試囉。炸饅頭，一客6個，炸得甘香唔油，色澤閃爧，趁熱咬，絕對喺外脆內軟，再點啲煉奶，變得似個甜品！

酸辣湯 $60（例）
因為點咗個炸饅頭，老婆話應該叫個酸辣湯襯襯喎，OK，順應民意，就來一個例牌。一窩例牌可分到6碗，都幾抵飲，人少亦可以叫「一碗」裝，賣$26，當然此碗不同彼碗，分量大概二人份。個湯材料十足，木耳絲、竹筍絲……‥酸味嚟得唔嗆喉，不過胡椒引起嘅辣味就霸道咗啲。搵饅頭沾啲酸辣湯食，別有風味。

雪菜肉絲炒年糕 $53
雪菜比一般茶記、酒樓所見嘅較為黝黑，但雪菜味濃郁，又無過鹹嘅弊病，掂喎。伴以肉絲，炒年糕，而年糕亦比一般店子嘅煙韌，無咁軟身，切得較為修長大塊，掛滿醬汁，整體真喺幾好食。

排骨菜飯 $58
最後慣性更要點啲粥粉麵飯嚟墊肚，菜飯喺上海菜較有特色嘅飯類，不過菜飯選擇唔多，獨沽一味「排骨菜飯」。大大塊排豬扒已經「碎上」晌飯面，豬扒雖然算唔上好多肉汁，肉味亦無話超強，但炸得鬆化，而且無話咬落一口油。

平日午市有一人客飯，選擇會實惠啲。星期六、日只好散叫，幸好部份信用卡有9折，幫補吓慳番廿零蚊。

個人評分
味道：8/10
環境：8/10
服務：7/10
抵食：7/10
平均每人消費：HK$72

餐廳資料：
南翔饅頭店
荃灣惠荃道22-66號綠楊坊2樓S22-23號舖
3692 4078