講起晌中環食飯就頭痛，一到食晏時間，間間食店都逼滿人，小弟平時無依啲煩惱，因為公司仲喺包緊福食，晌寫字樓搞掂，唔使出去同人逼，食完仲有大把時間「恰一恰」。咁既然約得幾個舊同學出嚟食，又咁耐無見，自然預咗多嘢講，所以就搵間坐得舒服，環境清靜，方便傾偈，價位唔太貴嘅食肆，忽然就想起太平館，諗番轉頭都好多年無去過咯！
羅宋湯．粟米忌廉湯．港式餐包午餐包羅宋湯或粟米忌廉湯或鮮蔬沙律，再跟一杯啡茶。小弟要個咗粟米忌廉湯，味道跟質感都算喺普通，平穩中嘅港式西餐水準。美其名「粟米」，查實粟米粒唔多，湯底就只有麵粉味。羅宋湯無試過，唔知水準又喺點。反而好鍾意港式餐包，一般來貨都唔會做得差，鬆鬆軟軟，塗點牛油已好好食，但稍欠熱度。
太平館瑞士雞翼飯 $88一客有4隻雞全翼，煮得黝黑，招待即喺招待呀，甜甜酸酸，味道濃郁。白飯另上，碟頭頗大，小弟當然狂撈汁啦。此外，你話啲雞翼會唔會好特別，咁又無啦，主要都喺食個汁。
燒豬脾飯 $88望住眼前碟「燒豬脾」，只有以失望嚟形容，燒豬脾以薄切大大塊咁鋪上碟，又喺淋啲瑞士汁，但啲豬脾肉切到紙咁薄，一啲食唔出豬脾肉嘅質感，此外，更加無「燒」嘅感覺。
太平館乾炒牛河 $88乾炒牛河稱得上水準依然，睇啲河粉上色均勻，就知炒功有一手；仲有就喺，炒出嚟嘅牛肉、河粉、豆角都平均融和，唔會偏埋一邊。味道帶著濃郁瑞士汁香，牛肉又鬆化，至於放面嘅蛋絲，就可有可無都得喇。
砵酒牛柳絲飯 $78老牌港式西餐碟頭飯，橙橙紅紅嘅砵酒雜菜汁又喺撈飯佳品，簡單配以牛柳絲，雖則味道唔算突出，亦唔太覺有酒香，但有份兒時嘅回憶，就喺晌快餐店常食到快餐ABC之一嘅俄國牛柳絲飯。
個人評分
味道：7/10
環境：8/10
服務：8/10
抵食：7/10
平均每人消費：HK$75
餐廳資料：
太平館餐廳 Tai Ping Koon Restaurant
中環士丹利街60號地下
2899 2780
沒有留言:
發佈留言