甜品森林 Dessert Forest：黃金撈KO芝麻糊

睇完戲返到美孚，老婆突然話請我食糖水，其實美孚無咩好嘅糖水鋪，除金裝燉奶佬外，晌內街仲有一間「甜品森林」，打正旗號專賣甜品、糖水。

店鋪瑟縮恆柏道內街，對區外人嚟講都幾難搵，而且店舖細細，一邊長梗枱，另一邊喺摺枱，逼逼狹狹勉強坐到10多個人，但就仲逼過晌綠林。所以，區內外賣客居多，打個電話落單，轉頭計啱時間落嚟拎，唔使多等，又唔使同人逼，返歸慢慢嘆。

 入門左邊長梗枱

入門右邊摺枱

「麻雀雖小，五臟俱全」，咪睇佢店舖豆腐潤咁細，所賣嘅產品都唔少，分為傳統滋味、推介涼粉、馬蹄露系列、紫米露系列、精緻糕點、森林獨家、果凍系列、大菜糕系列…等等。每個類別唔講，素描張外賣紙俾大家參考仲實際。

芒果黃金撈 $20
餐牌有一版彩色大頁，圖文並茂喺店方推介，第一眼就睇中佢個芒果黃金撈，以楊枝甘露、鮮芒果肉搭芒果布甸嘅組合，都幾有新意。最上層嘅楊枝甘露幾清香，內裡仲有好多西米，面面又有粒粒柚子，不過柚子肉唔算好甜，且帶微澀；中層嘅芒果肉雖則唔多，但味道頗鮮甜；至於打底嘅芒果布甸，都幾挺身，但略嫌唔夠柔滑。賣$20，一次過有3重滋味，都划算喎！

生磨芝麻糊 $22
老婆果然喺傳統派，又喺點糊，個芝麻糊等咗好耐，印象中都有近10分鐘，唔通生磨？相信唔喺，因為上到枱時碗嘢唔熱，只喺微微暖，兼且杰撻撻，未食落口對佢個印象已經好差，而且賣到成$22一碗，小弟就覺得貴呀。因為比起晌深水埗嘅「甜甜地」，食一碗超水準嘅合桃糊都喺$17，芝麻糊仲要平啲，賣$14。味道？普通啦，今晚所遇到依碗「芝麻糊」，絕對要被KO。

會唔會再幫襯？或者啦，始終仲有好幾款推介嘢幾有特色，都唔可以就咁一次定佢生死，況且依區又真喺無乜得好揀囉。

溫馨提示：逢星期二休息

個人評分
味道：5/10
環境：4/10
服務：6/10
抵食：5/10
平均每人消費：HK$21

餐廳資料：
甜品森林 Dessert Forest
美孚美孚新邨六期恆柏道2-4號N291C
6979 5156