麵包籃．四式佐料如果話先聲奪人可能有啲誇，不過，講喺平凡中盡顯不平凡就實不為過。麵包籃以大餐巾半包裹著，暖烘烘嘅麵包送來，仲可以保持一段時間嘅暖和。麵包一共有3款，放面嘅喺長條形有啲似意大利香草包（focaccia），不過就唔帶香草味，口感喺面脆包心軟熟；籃內仲有兩款共4個小圓包，一款喺原味，較軟身重麵粉香，另一款喺麥味，較韌身重麥香。通常出面跟餐嘅麵包，不外乎伴牛油、欖油或黑醋，Le Chef晌依個環節目顯特別用心，提供四式佐料：牛油、黑醋、檸檬油及蕃茄沙沙，牛油預先攤溶，好軟滑，唔會「硬掘掘」，小弟最憎啲餐廳俾舊「硬掘掘」嘅牛油搽麵包，好無誠意，除非佢個餐包喺菠蘿包囉；黑醋，很醇香，絕無嗆喉；檸檬油，誠心推介之一，初時以為普通橄欖油，食落帶點檸檬清香，好特別；而蕃茄沙沙就亮點推介，以蕃茄、洋蔥、芫茜、少少橄欖油自家製，蕃茄味濃郁，唔酸仲帶點甜味，塗麵包一流。老婆每款包都輕手試試，小弟貴為山區麵包王（自吹自擂呀！），成個麵包籃殺清，啲佐料實在太正喇！
餐酒最無心水嘅一環，就試吓由侍應阿Kin嘅介紹，佢哋最近做推廣來自法國嘅Prieuré La Clastre 2009，最夾配肉眼、配羊。評酒小弟就唔在行，不過單以小弟嘅感覺，葡萄果香味重，濃烈得嚟幾易入口，配個牛臉肉真喺唔錯。
牡丹蝦薄切橘子醬（Botan Ebi Carpaccio in Ceviche）Ceviche暫時未有確切嘅中文名，印象中見過有啲餐牌譯作涼拌海鮮，起源於南美嗰邊，以生果做醬汁漬醃海鮮而成嘅前菜，記得晌中環嘅Tango做嘅Ceviche都幾唔錯。再睇見Carpaccio意大利生牛肉依個名，你多少都估到依道菜個做法，以牡丹生蝦薄切雙飛，稍稍刴過但唔會爛溶溶，主打橙汁醃製，配啲啲香草，襯上少少芝麻菜（火箭菜）同車厘茄，賣相金黃晶瑩，講笑一句：金堆「肉」砌，哈哈！蝦肉幾爽甜，但小覺稍嫌佢橙味過重，有啲蓋過蝦鮮味，但作為前菜一道，幾有特色。
七味吞拿魚沙律（Togarashi Seared Tuna Salad with Green Salad）帶點和風嘅風格，以芝麻菜襯底，吞拿魚經過火炙再厚切，配以白芝麻、蔥絲，賣相頗精緻，份量以前菜計都算幾大份。魚肉鮮嫩粉紅，肉質細膩油潤，味道帶點辣，碟底之下有啲黑醋，將吞拿魚蘸點黑醋，估唔到七味粉嘅辣同黑醋嘅香，又夾到喎！
朝鮮薊帶子忌廉湯（Cream of Roasted Artichokes & Scallop） 朝鮮薊（亞枝竹）都算喺少接觸嘅食材，記得有次晌中環嘅Café Graham食過一道亞枝竹蕊、風乾火腿、薄荷葉、松子仁燴長通粉，亞枝竹味道酸酸質感軟腍，但今次飲到嘅朝鮮薊忌廉湯完全無酸味，原來朝鮮薊燒過再打爛做湯。湯面泛起一朕泡沬，質感較一般輕盈，原來大廚刻意下少啲「麵撈」（做西湯增加杰度嘅牛油炒麵粉），相反就加番多少少忌廉，唔怪之得咁鬼幼滑同咁重忌廉奶香；而湯底以鮮魚熬製，所以帶有魚鮮味，配合埋隻彈牙鮮帶子，帶子味又夠濃，個湯真喺好出色，超正！
鮮石蠔泡沬忌廉湯（Fresh Pacific Rock Oyster Cappuccino）原來唔喺新出品，話晌舊年出過，幾好銷量，成為店子嘅招牌菜之一，所以今次菜單再重點推介。論賣相，啡啡黃黃咁絕對喺唔好樣，但「我很醜，但我好溫柔」，仲好有「內涵」，一啖湯入口，真喺啲蠔味濃郁到你唔信，簡直好似啲蠔晌口腔內搏擊打到精華盡出咁，實在好有驚喜！雖然唔似飲意大利泡沬咖啡咁輕柔，但稀稠度啱啱好，依然柔滑，湯中嘅生蠔同樣鮮味非常，我老婆就話好鍾意依個湯，仲話一份麵包籃加埋個湯，已經可以當一餐。確實，兩個湯嘅份量幾足，而且飲完令人感到幾實在、幾飽肚。如果散叫一客要$88，飲個湯要$88可能你會覺得貴，但觀其質量，絕對超值！
燴澳洲牛臉肉伴紫蘇香橙汁（Braised Australia Beef Cheeks in Basil Orange Sauce）記憶中，牛臉肉應該第一次食，所以有啲探險嘅感覺。牛臉肉已經細切咗一件件，方便食用，牛肉味頗濃郁，肉質燴得好腍好鬆軟，但食落有啲花膠嘅口感，但又帶有一絲絲肉質纖維嘅質感，好得意。一啖牛臉肉，一小啖紅酒，何其寫意！紫蘇香橙汁唔喺好強勁嘅汁醬，但已經足以中和一下肉嘅油膩。墊底嘅薯蓉亦做得出色，好細滑，滲出濃濃牛油香，唔好睇個主菜細細份，其實食落好飽肚。
香煎紅立魚配檸檬香草汁（Sauteed Tilapia with Lemon-herb Glaze） 老婆算喺魚痴，食日本菜離唔開燒鯖魚、銀雪魚，食中菜蒸魚佢最啱，食西餐一樣好鍾意點魚類菜式作為主菜，所以個晚餐嘅主菜有紅立魚就啱晒佢喇！條立魚呎吋都頗大條，師傅手勢好好，煎得好靚，表面略有焦脆，魚肉非常嫩滑。至於個檸檬香草汁稍嫌下檸檬唔夠重手，淡淡香草幽香，檸檬味卻唔太突出，喺有一邊放咗幾小片鮮檸檬塊，嗰邊啲汁就好到位喇！伴碟仲有牛油薯蓉，以及蔬菜粒，整體老婆對依個主菜都好滿意。
同場加映．生日驚喜本來餐廳播緊啲悠揚悅耳嘅音樂，突然轉咗整首生日歌，雖然多少破壞咗整體氣氛，希望其他食客唔好介意啦，但真喺驚喜萬分，迷你鮮雜果忌廉蛋糕隨音樂送上，加上幾句簡單嘅生日歌，我老婆就故然驚喜啦，訂位時都講過喺幫老婆慶祝嘅生日飯，但真喺無諗過店家會有此安排，所以最驚喜嗰個應該喺我囉！海綿蛋糕做得十分鬆軟，下忌廉又唔太多，老婆至啱，而且內外都加入好多新鮮生果，面面嘅藍莓同士多啤梨都非常鮮甜，哩個環節真喺喜出望外呀！
特色芒果甜品拼盤（Mango Dessert Platter：Mango Mousse, Special Mango Jelly, Mango Ice-Cream）甜品以拼盤形式，實在食到尾都帶有豐足嘅感覺。甜品以芒果為題，一門三傑分別有芒果慕絲、特色芒果啫喱、芒果雪糕。先講賣相，做得好的骰，擺設好精巧，以芒果切片捲出一朵黃玫瑰，再以一紅一綠嘅紅莓乾同開心果仁劃出一道間線，頓時更有圖案感。
成晚無論麵包、前菜、餐湯，以至主菜、甜品都水準甚高，只喺咖啡一環稍為遜色，其實咖啡都好香濃芳香，只喺牛奶喺凍嘅，倒入之後咖啡變得暖暖，芳香大減。老婆揀咗紅茶，以小茶壺盛上，立頓品牌，飲落舒暢。
因為為慶祝Le Chef一週年，店家亦推出咗好多特別優惠，例如信用卡持卡人獨家尊享套餐15%折扣優惠，又或提早4日前網上預訂，可享30 %套餐折扣優惠，係咪非常之吸引呢！不過優惠期唔知去到幾時，想試就要好好把握喇。
餐後再跟Jenny交流一會，佢見我哋好滿意今餐晚飯，確實食得極之愉快，灣仔區都較少有依類高檔又有情調嘅西餐廳，喺值得再幫襯嘅餐廳，佢就再推介其他餐飲特色，Le Chef除咗上述個套餐，仲有一個Chef Table嘅套餐，只要你講低個預算幾多，有咩想食，有咩唔食得，大廚就為你度身訂造一份「獨家」嘅套餐。此外，每月最後一個星期五，又搞咗個「美酒佳餚配對之夜」，悉心挑選頂級葡萄酒配搭各款層出不窮嘅佳餚，喜歡葡萄酒配美食嘅人，真喺值得留意。至於日間所做嘅自助午餐，我見有食家都讚過，詳情就唔晌度多講，因為只喺睇佢張單張都十分吸引，才百鬆啲蚊，已有多款廚師推介，仲有每位食客奉送香煎鵝肝多士同燉鮑魚，甜品亦包括Mango Jelly「雞蛋黃」，吸引豈止如此，上去Le Chef嘅facebook，按指示登記仲有$50現金券，真喺抵到無話可說，其他折扣優惠，有興趣就自己上番佢個網頁睇睇啦。
個人評分
味道：9/10
環境：9/10
服務：9/10
抵食：8/10
平均每人消費：HK$350
餐廳資料：
Le Chef
灣仔軒尼詩道41-49號香港灣仔維景酒店M字樓
2863 7345
沒有留言:
發佈留言