Dressed：健康輕食，但今晚食得唔輕！

Dressed晌中環開咗好幾年，都未幫襯過，反而今次幫襯咗灣仔店，事緣工作嘅關係，走咗過嚟灣仔；無飯開嘅關係，今晚餐飯打算買外賣；網上遊戲嘅關係，中咗$100美食現金券。結果，造就咗小弟第一次幫襯Dressed嘅機會。原來Dressed喺來自美國阿特蘭大，主打健康輕食，如沙律、意大利烘包、三文治、熱湯……等等。

入門口就喺食物區及收銀處

入夜後嘅皇后大道東較少人流，而依間Dressed就更少人，晌小弟等外賣期間，只有兩個人，一個有買嘢，一個齋睇無幫襯。一室白牆青膠櫈，感覺幾醒目，清新健康感，不過長長嘅店舖，客少太清靜，有啲荒涼感啫，此時此刻先至喺夜晚7:00pm咋！

散叫嘅話唔多平，一份廚師推介沙律$70、$80有多，意大利烘包又$50、$60一份，三文治又收$50多，所以套餐較為上算，以組合形式劃分價錢：
1. 輕盈沙律
2. 本日精選意粉
3. 意大利烘包（半份）
4. 是日餐湯
5. 餐飲
組合一：1 / 2 / 3 + 4 + 5 = $50，組合二：1 + 2 + 5 = $60，當然每個類別無散叫咁多選擇，既然有$100「預算」揸手，理所當然盡點啦。要咗一個組合一，再加多份三文治，就啱啱好啦！

輕盈沙律
有4個選擇：亞洲沙律、加洲沙律、美式沙律及公司沙律，其實每款都各具特色，唔同嘅材料配搭唔同嘅醬汁，最後都喺好隨意揀咗加洲沙律。既然叫得「輕盈」，自然比正價份量少一截，雖然細細兜，但都塞到滿滿，內裡有沙律菜、烤雞（得好少）、牛油果（一大舊）、車厘茄、煙肉碎、芝士粉，配上黑醋醬，佢話有埋杏仁片，食極都唔覺。而整體味道唔錯，幾清爽，煙肉碎及芝士粉令個沙律鹹鹹香香，黑醋醬帶點酸，幾醒胃！

是日餐湯
餐湯每日都唔同款，會晌店內展示板詳列出嚟，依日就有「Chicken Noodle」同「Cream of Brocolli」，後者喺西蘭花忌廉湯，大概知喺乜，所以要咗前者。原來個Chicken Noodle Soup有啲似意大利雜菜湯，有啲蘿蔔粒、西芹粒、雞肉粒，而「Noodle」喺啲蝴蝶粉，幾多料，但略嫌味道稍淡。

餐飲
可揀嘅選擇唔多，可樂、凍茶或凍檸水，其他嘅都要加錢。我就拎罐可樂就算！以上套餐份量，女生就當到一餐，男生就多數都唔夠喇。

烤紅椒雞肉三文治 $50
麵包類有兩大分支，一類喺意大利烘包，另一類喺手製精選三文治。三文治都唔喺用普通白麵包，而喺用多榖麥三文治方包，較有咬口。餡料方面，包括雞胸肉、烤紅椒、車打芝士、雜綿沙律菜配芫茜杏仁醬，份三文治都幾厚身，主要喺因為夾住大量沙律菜。口感幾鮮爽，不過味道唔算好突出，無一種令人一食難忘或有驚喜嘅感覺，只可定為不過不失嘅配搭。

最新嘅餐牌，可瀏覽店家嘅網頁：http://www.dressedsalads.com.hk/

個人評分
味道：6/10
環境：7/10
服務：7/10
抵食：4/10
平均每人消費：HK$100

餐廳資料：
Dressed
灣仔皇后大道東222號GardenEast地下2號舖
2893 4848