潮庭 Chiuchow Garden Restaurant：賞心悅目焗鱸魚．精緻巧手石榴雞

老婆近期做得辛苦，論功行賞，都要食番餐好嘢嚟撐吓嘅。有朋友介紹，美心嘅中菜裡面，潮庭做嘅菜唔差，手功細緻，店家以「正宗潮菜、現代演繹」為宗旨，提供正宗潮州美食。老婆公司附近就有一家潮庭，就揀個星期五晚嚟，佢收得晏，食夜咗，第二朝唔使返工都唔喺問題。

雖然訂咗位，點知一樣要等，都等咗近半個鐘。都唔知好彩定唔好彩，老婆比估計收得仲晏，錯有錯著佢嚟無耐就有位。小弟就晌等位期間刨菜譜，睇吓有咩好食咁，一列特色潮州小菜，有兩款已成為是晚心水。

部份菜牌 

轉個彎入到內堂，其實枱椅排得有點逼，樓底亦唔喺好高，但可能大部份都喺斯文客，環境唔覺得嘈，感覺幾怡雅。啲櫈較小巧，雖則唔喺高椅背，但有少少枕手位，又幾舒服好坐，反而感覺仲無咁「掗拃」。至於餐具，之前食過好幾間美心中菜，啲餐具就算唔喺精挑，都細選過，感覺有點氣派。黑白公私筷，老婆就永遠食吓食吓就公筷變私筷，私筷又當公筷用，我就甚少會出差錯，晌公司食咗十多年包伙食，俗語所講：訓練有素啦！

未起筷先嚟杯功夫茶，為咗好睇，都唔會淨喺上兩杯俾你，俾就俾一小盤6杯，人少咪飲多杯囉，功夫茶色澤橙黃清澈、味道醇厚甘涼，佐以前菜花生、青瓜、鹹酸菜、豆腐粒粒（泡菜每碟要收$26，茗茶每位$15，功夫茶就額外送嘅），一邊閒話家常，心境有份平淡閒暇。題外話，功夫茶喺講緊一種泡茶嘅技巧，沏泡嘅學問，所以稱為「功夫」，除非去茶館，否則都無乜幾多個地方可以欣賞到沖功夫茶。此外，因為功夫茶有健脾開胃，解酒除膩，所以潮庭飯前一盤功夫茶，臨尾都再上多一盤功夫茶。

小黃瓜海蜇頭 $65
打頭陣喺一道清爽嘅前菜，亦喺特色潮州小菜之一，小黃瓜切成一柱柱，咬落勁爽脆，而海蜇頭一大片一大片，既有脆口感，又帶點柔韌，簡單以醋同麻油調味，酸香平和。

玫瑰焗鱸魚 $55件（兩件起）
何謂「玫瑰」？唔喺碟中瓣玫瑰，乃喺鱸魚以玫瑰露酒嚟烹調。賣相非常之高雅有心思，以麵條炸成小舟形狀，煎成鮮橙色嘅鱸魚放在其上，有少少泛舟嘅意境，構圖頗為賞心悅目。鱸魚食落好似食銀雪魚咁，魚肉細嫩，隱隱有酒香，唔點沙律醬都夠晒好食。而「炸麵條」雖然可入口，小弟都試咗兩啖，既乾且韌，但絕對喺宜睇不宜食。

潮州妹家煮三鮮豆腐 $108
唔知邊戶人家嘅「潮州妹」，但佢一定喺出自大戶人家，因為佢嘅家煮三鮮又豈止「三鮮」就算，滿滿一碟材料豐富，有素鮑片、蝦仁、花枝、貴妃蚌、木耳……等等，而且樣樣大粒有睇頭，唔會蝦毛咁細。蠔油、醬汁所做嘅茨汁，亦啱啱好掛汁就夠，唔會有太多多餘。

翡翠菊花石榴雞 $108
因為造型特別，形態似石榴，又以雞肉入饌，所以叫「石榴雞」，不過被話遠睇似菊花，故又叫「菊花石榴雞」，小弟就覺得少少牽強喇。姑勿論似唔似菊花，但單睇外貌，當然稱得上精緻巧手。細問之下，原來外皮喺煎蛋白薄皮，據經理解釋，傳統做法喺用雞皮架，依家人人都講健康，先改咗用蛋白嚟煎皮，再以西芹條紮實「袋口」，所以，可見手功比以前更繁複、更巧手，但又真喺估唔到煎蛋白可以做到層皮咁有柔韌性喎，包起咁多餡料都無穿無爛，竅門原來加咗鴨蛋白，唔講唔知咁深奧。

賣相做得好自然好有吸引力，成功咗一半先啦，但唔好食就變得衰收尾。但放心，味道絕對不賴，內裡包裹著喺雞肉粒、蘿白粒、冬菇粒、冬筍粒、唐芹粒，每樣都刴得好細膩，又喺一番心機，至於口感上有細緻，有清脆，有濃香，有清爽，慢慢細味真喺感受到嗰份層次，再者，餡料嘅味道又夠調和。最後淋晌石榴雞嘅芡汁，喺雞湯芡，貫徹成個菜個味道。翡翠選上鮮綠嘅西蘭花，雖則只作伴碟之用，但令整碟菜色澤更鮮明好睇，而墊住石榴雞底下嘅蘿蔔片勁清甜，依道翡翠菊花石榴雞果真色香味全。

兩口子食唔到幾多嘢，今餐我哋都算食得多，仲有好幾道潮菜幾有興趣，例如：菠蘿醬燒蝦球、紅梅子梅羔醬烤骨、香芋桃仁鴨方、潮式鹹排骨春菜煲、桂魚特色炒飯、沙茶牛肉炒粿條……等等，要試唯有等下次！

個人評分
味道：8/10
環境：8/10
服務：8/10
抵食：8/10
平均每人消費：HK$250

餐廳資料：
潮庭 Chiuchow Garden Restaurant
尖沙咀梳士巴利道3號星光行東翼2樓
2801 6899