又喺一個月一次嘅細胞小組聚會，由組員Elvina同佢老公阿銘負責，形式喺戶外，所以就揀咗去西營盤嘅孫中山紀念公園「郊遊」。話就話晌西營盤，好似好遠，其實晌上環地鐵站行過去都喺15min左加，沿路仲喺行海濱，望吓尖沙咀同西九，是日天朗氣清，感覺幾舒服呀。題外話講少少，小弟真喺大鄉里，都唔知有個咁正嘅公園，園內有牌樓、鐘樓、四大寇庭院、水景廣場、兒童遊樂場，最正喺有個紀念草坪，草坪正中央有個孫中山像，而周圍就喺一大片草坪，猶如城市綠洲。我哋個小組有好多大細路同小朋友，同佢哋踢波仔，玩飛碟（最好喺用布做嗰啲），晌草地滾吓，飛撲吓，感覺都後生番啲。
叉燒酥 外皮做得酥香，而叉燒美心一向都做得唔錯，鬆化唔太肥，所以，啲叉燒酥好對板。
炸春卷春卷炸得夠脆又唔太油，已經令口感不錯，內餡都喺平平實實嘅冬菇絲、肉絲、蘿蔔絲、筍絲……，但作為平常點心，都收貨啦。
自家蒸製蘿蔔糕 $24細細一兜仔蒸蘿蔔糕，蘿蔔味清甜，少少蝦米、冬菇，好味，但有點貴。
鹹魚肉餅飯 $38列為頂點，但份量唔多，一個人食都未必夠喉，唯肉餅撻得鬆化，鹹魚很香。
北菇棉花雞 $29雞件同魚肚都大大件，雞件很嫩口，估計用上新鮮雞肉，所以如果喺咁而定為大點都不為過。
豉汁蒸排骨 $29排骨都定為大點，食乜都越來越貴，其實我覺得豉汁蒸排骨已經喺一碟無乜太多功夫嘅點心嚟，小弟家中有時都蒸排骨做餸，所以總覺得晌酒樓食蒸排骨最唔抵。
白灼田園蔬 $30健康為由，大家總喜歡叫碟菜，查實灼菜又喺另一個唔多抵叫嘅點心。
一品砂鍋炆飯 $88一品就即喺帶子、鴨肉、瑤柱，個炆飯有啲似炒飯，但夠濕身，味道不賴，但餸料確喺偏少。
蜜汁叉燒腸 $28即拉腸粉，腸粉拉得唔喺好薄，而且捲出嚟個效果好似幾厚咚，但勝在軟滑，唔削，叉燒又好食。
上素蒸粉果 $18粉果外皮薄得通透，又唔黏牙，裡面嘅冬落粒、馬蹄粒、雲耳粒、甘筍粒、冬菇粒……等等填得滿滿。又要切咁多粒粒，包粉果又要講手藝，定位先喺小點，自己邊識整，識整都未必有咁好，所以依類個人先認為值得叫嘅點心。
南瓜千層糕 $18千層糕嘅南瓜版，千層糕之間夾著南瓜蓉，雖然千層糕做得鬆軟，可惜南瓜味唔喺太突出，有啲未如理想嘅感覺。
蠔皇叉燒包 $24叉燒餡多到個叉燒包都爆晒口，一籠兩個，叉燒包總喺飲茶必點，喺廣東點心嘅經典，如果無點就好似差啲差啲咁，飲茶嘅情意結。
香滑奶黃包 $24一客3個奶黃包，個個又圓又飽滿，包身極之鬆軟，而奶黃餡做得唔錯，既香且滑，依家好多時仲會加入鹹蛋黃碎嚟增加香味添。
蟹籽滑燒賣 $29食落感覺普普通通，有時自已同屋企人飲茶，都少咗叫燒賣添。
時菜鯪魚球 $24鯪魚球挺彈牙，魚味濃。有時老婆都會晌街市買啲現成鯪魚肉，返屋企煎鯪魚餅做餸，幾方便嘅一道菜，不過要喺自己親手打，就真喺咪搞喇。
薑蔥牛柏葉 $24牛柏葉煮得好爽口，但又唔會韌到咬唔開，薑蔥味亦很夠。
山竹牛肉球 $24牛肉打得鬆化，我晌度諗，依家列為中點，但啲牛肉不斷加，一年仲要加幾次，下次再嚟唔知會唔會變咗大點、頂點呢？
豉汁蒸鳳爪 $24一個豉汁蒸排骨，一個豉汁蒸鳳爪，飲茶常叫嘅點心，不過上文都講過，依類嘢較易整，真喺晌屋企自己整都得，不過好鬼奇，鳳爪就真喺無酒樓人哋整得咁腍。所以，有時飲茶都仲會叫吓鳳爪嚟啜！
咖喱牛孖筋 $24鍾意食牛孖筋嘅人就啱晒啦，成碟都淨喺牛孖筋，炆得腍，但咬落黏牙煙韌，咖喱汁又幾香，微辣，幾好食。
三星滑燒賣 $29話就話燒賣，其實喺蒸豬肉蝦膠，口感爽彈，上面再配以三星：冬菇、鵪春蛋、滑雞件，份量都幾大件頭，味道幾好。
煎蘿蔔糕 $18蒸蘿蔔糕就唔錯喇，煎又點呢？一客有3件，仲喺小點價錢，相對抵食啲，不過做煎糕溝沾米粉要多啲，蘿蔔味亦會相對無咁強。
菠蘿叉燒包港式做法嘅菠蘿叉燒包，迷你呎碼，個個的的骰，好啱細路仔食。喺度食就一定唔抵架喇，志在過過口癮。效果唔錯，兩啖一個。
脆麻花無預到食甜品，不過啱啱有侍應問到要唔要試吓，大家都話好耐無食過喇，一於叫一碟大家分享依份「甜蜜」。脆麻花做得很鬆脆，小弟就鍾意勁沾糖膠食，正呀！
個人評分
味道：8/10
環境：8/10
服務：8/10
抵食：8/10
平均每人消費：HK$100
餐廳資料：
美心皇宮 Maxim's Palace Chinese Restaurant
上環干諾道中168-200號信德中心地庫B13-B18號舖
2291 0098
沒有留言:
發佈留言