客家好棧 Hak Ka Hut：平過隔離大快活

想搵平嘢食，以前嚟講，去快餐店似乎喺個錯唔得去邊嘅定律，不過今時今日，乜都加到飛起，去快餐店搵食真喺未必平得去邊。好似食晏時段，一個飯唔包嘢飲，動輒基本收費都$30，當然有啲燒味飯、特價飯都仲喺晌$30樓下。如果我話飲餐茶，嘆一盅兩件，仲平過去隔離大快活，你又信唔信先？

返完老婆教會，去咗荃灣城市廣場嘅客家好棧食晏，雖然好多人等位，但輪得快，因為佢哋可以搭枱，一張大枱幾家人坐，但唔會坐到逼，大家都醒目互相隔開個位，等大家騷擾都少啲。不過，如你堅持唔搭枱，等啲2人、4人枱就可能要等幾耐吓。客家好棧長期都幾多人排，歸根究底，都喺一個抵字，免茶、免芥、免加一依三樣嘢已吸引唔少人啦，包括小弟，食物質素方面，唔差喎，挽吓手比一啲點心專門店仲要好，始終客家好棧都喺稻香旗下店鋪，管理同質素有一定水平。

室內環境，一排2人或4人枱，輪候時間較長！

題外話，先講講依度啲點心收費，除個別推介小食、炒粉飯麵列明價錢之外，其他點心都只喺分小點、中點、大點、特點4類，簡單清晰，平日收費分別喺$14、$17、$20、$23，而星期日及公眾假則收$16、$19、$22、$25，即喺比平日貴$2。今次先點3樣點心，唔夠先再補單。

 炒粉飯麵餐牌

收費價目，簡單清晰。

胡椒鹹菜豬肚 $23
大大碗裝滿枝竹、鹹菜、豬肚，鹹酸菜脆口無過鹹過酸，豬肚份量唔少呀，口感幾爽，又有幾塊枝竹，浸透個胡椒湯幾好食，況且，個湯嘅胡椒辣度啱啱好，無過辣，啱小弟口味。

金錢肚陳村粉 $16
金錢肚頗為入味，好香磨球味，不過就有啲韌，而且唔喺好夠汁。另外，啲陳村粉食落感覺好油咁，雖然有啲銀芽再墊墊底，不過口感都喺差啲啲，加上啲粉又碎濕濕。

客家三式茶粿 $16
茶粿有3款味道，分別喺客家鹹茶粿、烏卒卒甜茶粿、玫瑰豆沙甜茶粿，每款都喺小點價錢，想試多款口味嘅我哋，當然喺點客家三式茶粿啦，一籠有齊3款。原味嘅客家鹹茶粿，內裡嘅鹹肉鹹鹹香香，配以煙韌茶粿，好食；而烏卒卒甜茶粿喺芝麻皮搭芝麻花生餡，味道就如食過年角仔咁，有口感，感覺香甜；至於玫瑰豆沙茶粿，好簡單，就只喺以豆沙餡作主料，豆沙清香，不過就缺少份驚喜。試式3款，老婆鍾意原味，小弟就3樣都鍾意！

本來仲打算叫多一籠點心，不過遇到個小插曲，可以令我哋慳番啲。話說當中豆沙茶粿有啲蒸唔透，內皮仲好生好粉，個阿姐二話不說拎走咗，唔喺毀屍滅跡，只喺拎入廚房睇睇，轉頭問我要番「烏卒卒」好唔好，我都無所謂嘅。點知佢就直頭拎過一籠新鮮熱氣騰騰嘅烏卒卒甜茶粿嚟，拎上手仲喺熱辣辣，反而我唔喺幾好意思，因為個客家鹹茶粿同烏卒卒甜茶粿都已經食咗，只喺個玫瑰豆沙茶粿有少許問題啫。所以，咁嘅服務態度，點可以唔俾高分數佢呀！兩個人埋單齊頭$55，平均都唔過$30，抵食一欄，俾個滿分佢啦。

個人評分
味道：7/10
環境：7/10
服務：10/10
抵食：10/10
平均每人消費：HK$28

餐廳資料：
荃灣眾安街68號城市中心一期3樓3B舖
2406 9338