どストライク軒 Strike Noodles：了無軒掛

雖然唔喺拉麵控，但偶爾都會食吓拉麵，不過頻密度唔高。因為好老實，八、九十蚊一碗拉麵小弟覺得唔便宜，雖然知道唔喺搶錢，食材、人工、租金、師傅嘅心機……都喺成本，只喺心理一關而已。早前，睇雜誌介紹過呢一家晌大阪開業30年嘅拉麵店「どストライク軒」（都唔知點樣讀佢個名），主打較為清嘅白雞湯拉麵，勾起試一試嘅心態，所以，趁老婆嚟開尖沙咀返學，同佢入嚟食番碗拉麵。

嚟到鋪面，見到貼咗啲雜誌宣傳，就駐足望咗兩眼，原來晌日本一啲點評網站都獲得幾高分，而且，亦攞過唔少獎。

雖然，日本嘅年號就嚟會更改，但對日本嘅年號本身無咩感覺，但當走進店內，對嗰股「昭和」年代風嘅懷舊裝修喺感覺大少少。古雅嘅原木枱櫈、和式燈籠，好有一份地道拉麵店嘅風格。

店內主要以2人枱為主，只有近門口嘅幾張枱可以拼埋一齊，此外，就有多張吧枱位，所以，呢度夠適合一、兩個人嚟食，太大棚人就絕對唔方便。

如大多數嘅拉麵店，所賣嘅款式唔多，務求喺貴精不貴多。上文都講過，呢度主打白雞湯拉麵，有別於香港大部分拉麵店所賣嘅豬骨湯，基本上5款拉麵、拉麵套餐追加、單品、配品、飲品就喺成本餐牌嘅內容。

不過，較特色嘅飲品就有6款日本直送原樽嘅果汁梳打，定價$28一樽啫。

仲有一款「大魔王超BIG特製沾麵」，睇相真喺勁大碗，話明夠2-3人食，賣$198，真喺人多嘅話試得過。

此外，呢款勁大沾麵更搞咗個勁食比賽，一個人8分鐘內食得晒嘅話，就免費，未能成功者都只喺俾番正價而已。不過，呢類勁食比賽唔多啱我嘅，講真，小弟就自認無乜本事嘞！

全熟桃味梳打 $28、信州白提子梳打 $28

平常老婆好少飲呢類汽水嘢，但見今次嘅梳打既喺日本直送，口味又特別，所以，我哋就一人揀咗一枝嚟試。佢話佢支桃味好香，而我枝白提就十分清甜，再者，食拉麵配汽水又確喺唔錯。

白湯野菜醬油拉麵 $88

小弟就揀咗基本版嘅醬油拉麵，而呢度就唔興有加減配菜、麵條軟硬度……等等選擇，所以，整碗麵備有兩大片叉燒、溏心蛋、大蔥、椰菜、木耳、紫菜，麵條嘅份量亦十足。先飲啖湯，感覺幾鮮，亦無豬骨湯般咁漿口；叉燒比一般所見嘅巨型，口感軟腍而少肥，溏心蛋亦做得啱啱好，蛋黃綿香；麵條喺直麵，加上喺白雞湯，故無掛湯可言，但麵條咬落有韌勁，整體有中上嘅質素。

白湯蜆松露鹽味拉麵 $98

老婆揀咗少肉嘅蜆松露鹽味拉麵，除有兩大片雞肉、大蜆、溏心蛋，仲有大量蔥花、紫洋蔥碎、木耳及椰菜。湯頭晌鮮味中，仲滲出微微松露香，唔太搶，算喺幾平衡；而雞肉比預期嫩滑，亦有雞鮮味，大蜆則味鮮，但就唔算好有肉地，不過，老婆就幾鍾意呢一款拉麵，因為較為清無咁膩，又唔會過鹹，食得安心了無牽掛。

相對以濃郁為亮點嘅豬骨湯，白雞湯可以稱為拉麵中嘅一股「小清泉」，唔同人總有唔同嘅喜好、口味，相信白雞湯一樣有大把捧場客，至少，我老婆就喜歡白雞湯，而小弟都喺鍾意豬骨湯多啲！

個人評分
味道：8/10
環境：7/10
服務：7/10
抵食：8/10
平均每人消費：HK$120

餐廳資料：
どストライク軒 Strike Noodles
尖沙咀柯士甸路17號豐樂大廈地下2號舖
2682 6550