門面開放式，黃框邊，又插咗啲橙色波波，襯以花地磚，有種歡樂嘅感覺。而餐廳比晌門口望入去大，因為轉彎仲有一邊用餐區，4人枱以外，更有唔少卡位，整體環境整潔明亮。附近有多個大型樓盤，所以，食晏呢段時間大多數喺家庭客。
餐枱上早已放齊餐具、餐碟、餐紙，我幾鍾意呢個做法，有時需要多用啲刀叉，唔使吓吓專登煩店員。此外，唔好睇少啲餐碟，如果揀得好，亦可以帶出正能量。而枱上仲放有黑胡椒粒及海鹽，睇標籤喺嚟自意大利，更用上可即磨嘅玻璃樽裝，細節位盡在心中。
晌門口，設咗部爆谷車，喺免費供應，大可過吓口癮啊！
基本嘅散點餐牌分兩組，一組喺較大型嘅摺疊餐牌，分類有前菜、全日早餐、主菜、兒童餐、意大利麵、沙律、湯品、飯品。設計精美，部份菜式有靚相作為參考。
另一組為傳統嘅揭頁式餐牌，主要喺印有甜品及飲品，但選項喺估唔到咁多，單喺甜品已有多個系列：Movenpick雪糕系列、窩夫山系列、窩夫系列、鬆餅系列、多士磚系列、心太軟系列、木糠布丁系列、雪糕船系列、其他精選和雪山系列；而飲品方面，就有奶蓋系列、特飲系列、花果茶系列、沙冰系列、朱古力、Movenpick咖啡，喺咪勁多選擇呢！
讚好店家嘅臉書專頁，食滿$100就送番$10現金券，着數嘢無理由錯過架。
而我哋嚟食晏就梗瞄準個「精選午市套餐」餐牌啦，由A到O共15款菜式，包含嘅款式都頗多元化，並已包是日餐湯或精選沙律及指定茶品，定價$62-$128 + 10%，更有精選追加，如飲品升級、加配甜品、加配Movenpic雪糕……等等。另一張就喺「午市甜品系列」，一共14款，並配飲品一杯，同樣可加錢轉主餐牌內任何飲品。
是日餐湯
指定餐湯喺南瓜忌廉湯，睇色澤都幾對辦架，友人試過話幾唔錯，南瓜味都算幾清甜濃郁，質感亦唔會水汪汪或太杰，喺好穩定嘅出品。
精選沙律
沙律喺一般嘅田園沙律，沙律菜、車厘茄件點青瓜片，淋上黑醋，唔算好特別，但勝在用料新鮮，而且，細節位有用心，如青瓜片砌得好好哋，黑醋煮過，所以，酸香而厚身。
紐西蘭肉眼扒8安士 $128（午餐）
件扒足8安士，且睇落都唔細，一身燒得焦香，淋上燒汁，再伴上烤新薯及西蘭花。其實賣相就比較平實，但紐西蘭嘅肉眼一向都唔差，落刀嗰吓亦感受到肉質嗰份軟腍，我哋要5乘熟，不過，切開睇睇就似乎過咗少少火位，有啲去到7剩熟嘅位，剩番嫩紅嘅肉色就唔多，幸而入口都仲喺腍身，無話又韌又嚡，兼且富肉香。
蒜香欖汁虎蝦意粉 $128（午餐）
另一道主菜就揀款意粉，一客有3隻大虎蝦，泊埋一齊確然好大隻，咬落蝦味鮮，質感爽，食得出喺有質素嘅貨色。至於個意粉，煮得啱啱好，柔韌有嚼勁，陣陣蒜香。
火焰卡邦尼意粉 $108（散點）
午餐中有一款「煙三文魚卡邦尼意粉」，但店長推介我哋試吓散點嘅「火焰卡邦尼意粉」，話喺頗有特色。原喺，賣點喺烹煮嘅方法，究竟何謂「火焰」？原來喺近尾聲，會倒出白酒，點火後再倒落原個意大利芝士上，以熱力溶化出一層「新鮮」芝士，再加入已煮好嘅雜菌意粉跟芝士拌勻。
其實，跟平時食嘅卡邦尼意粉賣相分別唔大，但入口味道更濃郁；意粉同樣煮得剛好，有咬口，而且，每條意粉都掛滿醬汁，味道寧舍香濃重身，芝士味極之突出。
特濃五重朱古力蜜糖多士磚伴雪糕 $62
揀一款甜點方便大家一齊「些牙」嘅，所以，就揀咗蜜糖多士磚，大家篤篤吓，方便分，又方便食。叫得特濃，仲要五重，自不然喺有啲期望，不過，雖然啲多士烤得脆口，亦好有蜜糖香，之但喺朱古力嘅賣點就顯然未有施出魔法，只喺淋上少少朱古力漿，亳無澎湃感，
鮮果熱情果奶蓋 +$12
其實小弟都曾經去過Say Cheese嘅奧海城店，不過，嗰間店只有甜點及飲品，而我就鍾情佢啲奶蓋系列，所以，今回都喺揀番奶蓋拼鮮果茶。清晰做出上下兩層，面層嘅奶泡綿密豐厚，鹹鹹哋滲出芝士香；下層喺鮮熱情果茶，清幽酸香；之後再攪勻細嚐，似產生種化學反應咁，酸酸甜甜鹹鹹，有層次卻又唔會好古怪。
西柚檸香冰茶 +$12
簡單嚟講，喺檸茶加入西柚嘅版本，友人話本身嘅檸茶底唔錯，茶底幽香夠濃，檸香清新，再加入新鮮西柚，大可以形容有畫龍點晴之效，感覺清爽。
芒果乳酸沙冰 +12
另一友人喺亂乳酸沙冰嘅支持者，始終行完山，喺想飲啲冰涼嘅凍飲。一身鮮黃嘅芒果沙冰，的確喺充滿芒果香，絕無欺場，而混入乳酸成份，自不然多一層酸爽嘅味道；面層嘅鮮芒果粒粒夠晒清甜，喺錦上添花而已。
食過呢餐過後，幾日後老友就會返回加拿大，臨行前一齊食餐好嘅。唔知幾時有機會，輪到我飛過去探佢，又一齊食番餐，飲番杯，大聲Say句：Cheers！
個人評分
味道：8/10
環境：8/10
服務：8/10
抵食：8/10
平均每人消費：HK$170
味道：8/10
環境：8/10
服務：8/10
抵食：8/10
平均每人消費：HK$170
餐廳資料：
Say Cheese
將軍澳唐德街9號將軍澳中心1樓173號舖
2343 0868
Say Cheese
將軍澳唐德街9號將軍澳中心1樓173號舖
2343 0868
沒有留言:
發佈留言