Angry Oppa Restaurant & Bar：憤勇當先

韓國菜，算喺食唔少，但近呢年，唔喺韓燒，就喺炸雞，直至最近先一試韓式熔岩薄餅。其實，都曾經食過幾次芝士拉絲炸雞，但薄餅就絕對喺第一次，見人拉得咁過癮，其中一個表姨甥女上完電視節目，就搵埋佢嚟「Angry Oppa」奮勇當先一齊拉吓。

餐廳裝修簡約，水泥牆，左右兩邊木枱，有啲似咖啡店或輕食店，若非牆上有幾張韓式電影海報，真喺睇唔出佢喺家韓國菜館。

一般韓餐館都會提供三數款韓式前菜小食，但呢度有別傳統，只有一小兜醃洋蔥，較少見，味道就覺得普普通通。

翻開餐牌，內頁第一版有店家嘅介紹，原來佢哋喺韓式煎餅專門店，所以，除熔岩薄餅，煎餅都要試吓先。

再睇勻餐牌，其實都有幾多嘢食，包括熔岩比薩、年糕比薩批、韓式傳統湯鍋、薯泥比薩批、煎餅、韓式傳統金便當、湯品、拉麵、烏冬、年糕、餃子、飲品，仲有多款韓式真露、燒酒及啤酒。

韓式煎大餃子 $58
韓食當中，小食最常見喺餃子，而餃子只有3款，有蒸有煎嘅，原打算喺點呢款大餃子，但店員解釋缺貨，改為另一款青椒餃子，聽起嚟幾得意，又即管試試。

一客有4隻餃子，唔單止外形好「青椒」，而裡面確有青椒，以及粉絲、肉饀，好韓式嘅餃子。外皮煎得頗脆口，富肉汁而味道不俗。

海鮮韭菜煎餅 $168

既然自詡為煎餅專門店，梗喺要試試啦，足足有成12款選擇，確喺比一般韓國菜館得三數款為多。

我哋所揀嘅海鮮韭菜煎餅，煎得外觀唔錯，既多韮菜，鋪得又夠平均，食落好有韮菜香，而且，已切成一格格，方便食用。底面都煎得乾爽香脆，感覺不膩，而且餅底夠薄，唔會咬落一糰粉，不過，海鮮料好似只得啲魷魚咁，唔太覺得有其他海鮮。

蒜香雞肉熔岩比薩 $198

嚟到是晚焦點「熔岩比薩 」，3款比薩最心水其實喺大醬五花肉，比較有韓式風味，但表姨甥女擔心肥，又唔喺好食得辣，所以，揀咗個健康啲嘅款式「蒜香雞肉」。製作都真喺幾需時，好彩有啲餃子、煎餅攝吓時間。

比薩送到上枱，賣相金黃，不過，雞肉切成丁粒，細粒且少，加咗少少黑橄欖、洋蔥，再細心睇就個點解叫「熔岩」，因為比薩中心啲芝士真喺做成好似熔岩咁多，剷起一件一拉，啲芝士絲可以拉到呎幾、兩呎高都無問題，真喺拉得約過癮。食味方面，口感似足食厚批咁，某程度當同食麵包差唔多，但質感極鬆軟，每口都有香濃芝士味，而芝士非常香軟，當然再多啲雞粒，再加重多少少蒜蓉，就變得更貼近菜名。

韓國果肉果汁 @$25

我哋都唔好酒，就梗喺揀番飲果汁啦，小弟鍾情桃味，而表姨甥女則揀橙味，以前去啲韓燒店都飲過呢款果肉果汁，感覺清甜幾好嘅。

金巴利道、金巴利街成為韓國街已經喺多年嘅事，偶爾行過，韓國餐廳嘅進駐真喺有增無減，但要突圍都幾唔容易。暫時見佢啲招牌菜：熔岩薄餅、煎餅都大有捧場客，相信不時加入新款式，都仲可以有排做。

個人評分
味道：8/10
環境：7/10
服務：7/10
抵食：7/10
平均每人消費：HK$260

餐廳資料：
Angry Oppa Restaurant & Bar
尖沙咀金巴利道73號地下A舖
2884 3266