幸屋：拉麵小確幸

晌日本旅行，見啲日本餐廳真喺做得好專吓，賣拉麵就只喺賣拉麵，賣壽司就淨喺賣壽司。不過，今晚落開灣仔買啲電腦附件，路經過嘅「幸屋」，就既賣拉麵，又有丼，且有好多串燒添。一支公食番碗拉麵，都可以喺種小確幸唷！

門口大大個橙紅色燈籠、布簾，一派和風標記。走入店內，以拉麵店嚟講，地方唔算細，一邊高腳枱櫈面壁位，另一邊就4人座，難得樓底極高，令空間感強。既然得一個，就揀面壁位自在啲啦。

餐廳尾似喺水吧位及廚房重地，可惜，就睇唔到師傅煮麵嘅情況。整體裝修都喺比較簡約，大抵想食客能專注佢哋食物嘅質素。

一坐低，奉上煎茶一杯。

店家強調佢哋喺主打博多拉麵，以超濃嘅豬骨湯為賣點，湯底經十多小時熬製，兼不含味精。

而拉麵分為金武士（原味豚骨湯）、黑武士（黑蒜油湯）、赤武士（辛辣地獄）、銀武士（味噌）、胡麻王（芝麻湯底）、玄武士（冷沾麵）及限定王（期間限定拉麵），共7款，基本定價為$78-$88，此外，仲有多款追加配料。

飯品選擇就少啲，只有3款丼：黑豚丼、燒鳥丼、蒲燒鰻魚丼，定價同樣相宜，都喺$78或$88。

仲有一面餐牌包括咗多類食物，如沙律、小食，以及串燒。串燒款式真喺估唔到咁多，專登數數佢，足有25款之多，有平有貴，有蔬菜，有肉，又有海鮮類。

飲品方面，除汽水，仲有數款特色飲唔5，如綠茶可樂、桃味特飲，更有甜品供應，但只得一款綠茶焦糖布丁，不過，一問就話已經賣晒。

講到啲拉麵，除口味以外，麵條類別、軟硬度、湯嘅濃度、濃香油度、叉燒選擇、青蔥、椰菜份量都可以逐項揀，不過，好似少咗木耳絲一欄喎！

黑武士 $78

小弟最心水嘅喺以黑蒜油混入豬骨湯嘅黑武士，貪其濃香得嚟有層次，呷一口湯，果然濃郁，卻唔會太餬漿住個口，濃而不膩，蒜香又隨隨滲出。夾雜蔥花再飲多口，又別有一番滋味。

叉燒可以揀慣常見嘅叉燒或豚角煮，但最好喺可以兩溝，每樣各一。佢哋啲叉燒肥肉唔多，但仍然好軟腍；而豚角煮會多少少脂肪，但肥而不膩，且入口鬆化。

溏心蛋喺原隻上，但一夾開，蛋漿流心黏凝，食落極有蛋香，蛋白部份柔嫩軟滑。其餘嘅伴菜亦唔求其，大量椰菜及木耳絲，仲有啲以為喺金蒜嘅炸蒜粒，咬落先知喺炸肉碎。

小弟鍾意啲咬口嘢，喜歡揀粗麵，食意大利飯，所以，麵條揀白麵（較粗身），軟硬度就選上硬嘅。麵條真喺極具咬口，非常煙韌。

雖然有杯綠茶作解膩，但天氣熱，又食住拉麵，都想飲罐嘢解解暑。

黑豚秋葵串 $20

食完碗麵，八乘幾飽，店員問有無興趣試佢哋啲串燒，做得幾巧手吓，所以，揀串平平哋嘅黑豚秋葵串。薄切嘅黑豚捲住秋葵，黑豚燒得焦香，入口滿滿油香，感覺其實喺有點肥，但再咬埋爽口嘅秋葵，極個配搭又真喺掂喎。

淨喺食拉麵，城中有唔少出色嘅拉麵店，但既想食拉麵，又想食吓高質素串燒，我覺得嚟「幸屋」喺唔錯，串燒成為佢哋嘅增值服務。

個人評分
味道：8/10
環境：7/10
服務：8/10
抵食：8/10
平均每人消費：HK$110

餐廳資料：
幸屋
灣仔機利臣街5-9A號維昌大廈地舖
2868 3091