慢煮工房 Sous Vide Factory：慢無一失

「慢煮」（真空低溫烹調）依一種煮食技巧相信唔少人都已經知喺咩嚟，以往晌唔少餐廳都品嚐過以此煮成嘅菜式，而大多數做出嚟嘅效果都唔會差得去邊，可以講喺萬無一失嘅方法。最近，有食友報料話觀塘有一家餐廳以慢煮為賣點，聽落好有興趣，所以，專登走訪一下呢間「 慢煮工房」。

餐廳位處有唔少Outlet及食肆嘅駱駝漆大廈，呢幢廠廈都算喺「環境」企理嘅廠廈，上到樓層都唔會太殘舊。晌門口已見有慢煮嘅介紹，又有好精緻嘅大型晚餐菜底介紹，務求多一點吸引。 

單睇門面真喺一啲都唔似開晌廠廈；而走到餐廳內籠，格局喺一字長形，一眼睇晒，左邊有開放式廚房加吧位，右邊喺挨牆用餐區，裝修簡約，空間感十足，再配以柔和嘅燈光，感覺輕鬆無拘束。

此外，睇到頭頂架設咗投影機，再望望開放廚房下有活動屏幕，就知有包場服務。整個場唔太大，又無柱位遮擋，最適合二、三十人嚟包場。

晚市只提供四道菜晚餐，包夏日果茶、前菜、特製餐湯及主菜，定價介乎$118-$398，讚好其臉書送甜品一客，而額外點其他飲品有半價優惠，更全日唔收加一服務費。

夏日果茶

依度好得意，一開始上一杯冰涼果茶俾客人，你可以當佢喺餐飲，不過，味道就無得揀，個人就覺得俾客人揀餐飲喺好啲，始終有啲人唔喜歡飲茶品或凍飲。不過，話說回頭，杯夏日果茶飲落應該喺桃味烏龍茶，清甜有茶香，感覺唔錯。

雞肉沙律

前菜嘅沙律，唔算話好特色，雞肉加上沙律菜、車厘茄配胡麻汁，但勝在穩陣，雞肉夠嫩滑，沙律菜新鮮爽脆。

南瓜湯

餐湯佢店家標示喺特色餐湯，嚟到只喺南瓜湯，似乎無咩特別，但入口有種輕微嘅唔同感，就喺唔多覺加入忌廉，朕南瓜味好濃郁，質感幼滑，好有原味嘅感覺；蒜蓉法包亦焗得香脆，充滿蒜香。

主菜共有9款選擇，但並唔喺樣樣都喺慢煮菜式，但過半數喺慢煮嘅，亦有清楚標明，我哋一心嚟試慢煮，當然以此為揀菜準則啦。此外，菜式嘅用料同醬汁配搭，都頗有心思。

西班牙伊比利豬鞍、北印度乾果飯、蘋果薄荷慕絲 $288

友人竟然喺因為個北印度乾果飯而相中依道菜，所以，人人味道唔同，喜好不一。豬鞍非第一次食，但做到咁大件，咁厚切，就真喺第一次，所以，道豬鞍一上道，賣相有少少震撼感，而且，燒得好靚仔。

切開豬鞍睇睇，落刀已感覺到肉質嗰份軟腍，色澤呈粉紅。先試一小口，外層焦脆，細嚼肉質仲有份爽脆感，呢個正正喺豬鞍嘅特點，加上以真空慢煮嚟做，未煎之前已熟得八八九九，再煎封外層，令肉汁豐盈，又好有豬肉味，不愧西班牙黑毛豬種；伴醬嘅蘋果薄荷慕絲亦好好味，清爽中滲出絲絲果香清甜。

至於個飯，有別於平時食印度飯嗰種長米，口感似意大利飯，內裡混有好多乾果及果仁，令飯粒有微甜，感覺真喺好特別。

紐西蘭雙骨羊架、自製薄荷醬、忌廉薯蓉 $208

所謂雙骨羊架，就喺每件羊架裁成兩支骨嘅份量，再配上薯蓉、紫洋蔥、蕃茄粒，整體真喺唔少嘢。

經過慢煮再燒，支羊架超好食，外脆內嫩，肉質軟腍到不得了，極富肉汁，微微嘅羶香，唔太食羊嘅朋友都應該OK，沾上自製嘅薄荷醬，點點冰涼感襯托出肉香；幾樣伴菜，薯蓉打得幼滑，薯味濃，紫洋蔥炒得仲有少少爽口感，蕃茄粒酸香減膩。

試咗兩款慢煮菜式都好有水準，而且，份量頗多，慢工唔一定出「細」貨，好似今晚所點嘅兩個晚餐，計落3個女生都夠晒食，而沙律同餐湯，亦都無迤做。招呼方面，做足基本咁啦，但上菜節奏唔錯，亦都做到同步，整體，友人非常滿意今晚嘅介紹。

個人評分

味道：8/10
環境：7/10
服務：8/10
抵食：8/10
平均每人消費：HK$250

餐廳資料：
慢煮工房 Sous Vide Factory
觀塘開源道60號駱駝漆大廈3期4樓T室
2121 1021