個性唔止晌環境上，餐牌設計亦非常獨特，貫徹番個店名，以木板做成鍵盤形，好搞鬼，初時唔明點解突出嗰幾粒字母，同友人研究，就發覺喺「ENJOY 」，讓客人晌度好好享受一下，相信唔止享受食物，亦享受個環境。
「鍵盤」喺主餐牌，亦喺散點餐牌，內裡包括前菜、沙律、意大利飯、意大利麵、主菜。
另外兩張散開嘅餐牌有廚師推介（鹹食窩夫）、晚餐、飲品及甜品。廚師推介同晚餐都會附送是日餐湯及指定飲品，亦可以補錢轉其他飲品，套餐定價$68-$188，最窩心喺無加一服務費。最後，我哋點咗兩客晚餐，另加一客甜品。
南瓜湯
有別一般西湯，聞落去幾有南瓜香味，但入口南瓜味反而唔算重，相反，有少少薯仔味，同埋個色有少少透，除咗明顯無落忌廉去煮之外，亦唔似打入「麵撈」嚟做個湯，所以，口感較薄身啲、稀身少少。
什菌元貝意大利燴飯 $78
上菜上得幾快，個湯一飲完，就上個意大利燴飯，轉眼就上埋個豬扒，不過，二人枱有啲細，放滿嘢就有少少逼。意大利燴飯都幾蝦人煮，所以，小弟幾經常點，可以真正試到廚師嘅實力。
可能小弟要求高啲，如果要打個分俾個飯，應該喺合格高少少。先以賣相評一評，元貝用啲好細粒嘅貨色，就算有好多粒都唔及一整粒大元貝咁有睇頭；同埋，刨少少巴馬臣芝士，令香氣及賣相都可以大大提升。飯粒入口濕潤，但如果你話喺燴飯，我覺得OK，但寫明意大利燴飯，飯粒就完全食唔出煙韌嘅口感，後尾留意到牆上掛住「日本產米使用店」，會否喺死因之一呢？唯一讚就喺落咗唔少什菌，多到不得了。
最原先，喺想點「火山石燒澳洲黑安格肉眼扒」，因為晌門口個介紹牌，寫住是日半價，奈何每日供應有限，當然遲嚟就賣晒啦。
保雲酥厚切丹麥豬扒伴香草茄汁 $148
友人又想食吓扒，晚餐有幾款扒類：豬扒、羊扒及牛柳，當中友人未試過「保雲酥」嘅做法，所以，就揀咗屬中價位嘅丹麥豬扒。
以保雲酥嚟做，黐滿麵包糠，讓外層增添幾分脆口感。實在，件豬扒唔錯，既有豬肉味，又富肉汁，質感好鬆化，沾埋個香草茄汁，香草味好突出，好食喎。伴菜以炸新薯最好食，其他嘅西蘭花、甘筍就普普通通咁啦。
餐飲方面可揀蜂蜜柚子茶、蜂蜜生薑茶或是日精選果茶，又或選其他正價飲品，可扣減$8，而是日精選果茶有蜜桃紅茶或熱情果綠茶，但兩者都喺凍茶。
蜜桃紅茶
唔喺真正有生果一類嘅台式果茶，都同樣喺即沖現成貨色，不過不失，勝在夠大杯，友人話飲落都有淡淡桃味，OK嘅。
焦糖鮮奶咖啡 +$27
正價賣$35，跟市面好多咖啡店嘅價錢相若，而幾款茶品都普普通通即沖現成貨色，倒不如加點錢嘆杯好嘢。雖然，杯焦糖鮮奶咖啡講唔上上好，但沖得唔差，拉花有板有眼之餘，入口口感順滑均勻，醇香中滲出焦糖香。
太妃情迷朱古力窩夫 $82
初頭都未有打算叫窩夫，但眼見唔少客人都有點，有啲仲同店員有講有笑，似乎唔少附近街坊熟客。所以，點咗最心水有焦糖，有香焦嘅口味。收你$82，真喺交足功課，份量十足，而且，窩夫比一般厚身，睇落窩夫內心嘅密度頗高，食落意外地好軟綿，極有蛋香，配合埋焦糖香蕉、朱古力雪糕一齊食，真喺好正。順帶一提，佢哋標明喺紐西蘭天然雪糕，雖然唔知有幾天然，但口感軟滑、朱古力味濃郁就肯定嘞。
雖然個意大利燴飯未有預期般好，但個丹麥豬扒挺出色，加上客高水準嘅窩夫拉番高唔少分，再者，環境、服務都叫人稱心，所以，整體值得有個中高嘅評價，希望小店繼續努力，將理想付諸實行，一定有好嘅回報。
個人評分
味道：7/10
環境：8/10
服務：8/10
抵食：7/10
平均每人消費：HK$170
味道：7/10
環境：8/10
服務：8/10
抵食：7/10
平均每人消費：HK$170
餐廳資料：
Press Enter
大角咀大全街6號地下
2656 3000
Press Enter
大角咀大全街6號地下
2656 3000
沒有留言:
發佈留言