奇華餅家 Kee Wah Bakery：好友狂嚐曲（58）

依家啲商家做生意，都會各出奇謀，最常見就喺搶「頭啖湯」嘅策略，四月尾講賣糉，八月推出月餅，所以，十一月出現聖誕禮品已好平常，就算收到都變得唔喺咩特別嘢。多謝友人，提早祝小弟聖誕快樂，送嚟小小聖誕心意。

所收到嘅 小禮物喺奇華餅家嘅聖誕節禮盒，內裡包含：黑白芝麻蝴蝶酥（2包，每包3件）、小紅莓牛油曲奇（6件）、杏仁片朱古力牛油曲奇（6件）及原味手製鳥結糖（8件）。

黑白芝麻蝴蝶酥

蝴蝶酥喺近年唔少餅店都有出嘅產品，因為其吸引之處喺酥化且富牛油香。奇華依一款蝴蝶酥，加入咗黑白芝麻，就添多一朕芝麻香，入口非常香脆。我仲記得佢哋有一款玉桂口味，印象中仲好食，唔知仲有無出呢。

小紅莓牛油曲奇

佢哋一向有出曲奇，所以，對此都唔陌生，禮盒內就有兩款迷你曲奇，先試小紅莓，簡單嚟講就喺牛油曲奇底加入紅莓乾，所以鬆脆嘅口感中，有煙韌嘅紅莓乾，酸酸甜甜，真喺幾好食。

杏仁片朱古力牛油曲奇

另一款就加咗杏仁片，入口故然多份薄薄嘅杏仁片脆口感，而曲奇底嘅朱古力味亦香濃。

原味手製鳥結糖

奇華嘅鳥結糖都曾經食過好幾次，印象一向都唔錯，既有牛奶香味，唔會過份死甜，口感煙煙韌韌，混入唔少花生粒好有咬口。

雖然，唔喺整個禮盒都以曲奇為主，但「好友狂嚐曲」依個系列好耐無寫過喇，但話晒盒內都有兩款曲奇，就抽抽水放入依個系列啦！

個人評分

味道：8 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
奇華餅家 Kee Wah Bakery
北角英皇道260號怡安中心地下G17號舖
2802 6776