Mela Italian & Spanish Cuisine：搵食工略

唔覺唔覺，觀塘無啦啦成為小弟搵食地區嘅熱點，當然，始終唔及銅鑼灣、尖沙咀依等熱點，但數數，今年真喺多咗好多次入嚟觀塘食飯，仲以工廈餐廳佔絕大多添，工廈搵食亦成為好多人嘅搵食攻略。今晚同識食嘅友人嚟到賣意大利及西班牙菜嘅Mela，講飲講食之餘，仲品嚐到出色好手勢嘅菜式。

工廈餐廳越開越多，嚟搵食嘅人亦不少，好似今晚喺閒日，一樣有7、8乘滿。鍾意嚟呢類餐廳食飯嘅人，都喺貪其地方大，闊落寬敞，就好似Mela咁，裝修簡約，大玩紅白黑撞色，但空間感十足，光猛整潔，而且食材具質素得嚟定價較出面平，此外，都喺埋單先知，原來做緊8折，唔知喺咪咁樣所以咁多客人。

晌牆上見有個五道菜龍蝦、鵝肝、牛扒套餐，只賣$198，實在非常吸引，可惜要預訂。店員解釋喺為咗保持龍蝦質素，亦減少損耗，所以，設定咗依個套餐需要預定。

翻閱餐牌，除有一個二人套餐，散點亦不愁無選擇，頭盤、湯、西班牙小食、意大利粉、意大利飯、主菜、甜品及飲品，分門別類。

藜麥、蘋果、紅菜頭、松子仁沙律配香橙油醋汁 $78

藜麥、紅菜頭做沙律已唔喺咩新鮮事，但一樣受歡迎，皆因兩者都喺有「營」之物，多食無妨。再配以蘋果、松子仁，可謂口感豐富，不過，食落應該唔止依啲，眼見有埋瓜子仁，食就覺得似喺仲加咗啲啤梨粒，因為腍身兼香甜啲；個香橙油醋汁亦調校得相當好，酸酸甜甜帶微微橙香，好醒胃。

西班牙黑毛豬火腿、白菌、芝士炸薯球 $65

講笑咁講，依道西班牙小食言過其實，因為點講都唔喺薯「球」，喺薯「條」喔，哈哈！一客4件，每條都炸到金黃香脆，咬落熱辣辣，絕不油膩，裡面釀有黑毛豬火腿、白菌、莫沙里拉芝士，所以，鹹香好食。

牛肝菌、野菌、黑松露、手製闊麵配溫泉蛋 $162

主菜先嚟一道闊麵，亮點喺自家手製，賣相好特別，因為唔喺平常所見嘅闊麵，好似裁開半截嘅千層麵皮，但入口估唔到好有咬口之餘，又好有蛋香。配以牛肝菌、野菌、黑松露，所以，基本上好有菇菌香，雖然溫泉蛋篤開先發現煮過火咗少少，幸而蛋漿未至凝回，再將蛋漿搗勻拌入闊麵，添上一層滑溜感，確喺一道好有特色嘅自家製闊麵。

燒美國牛肋骨配燒蒜、紅酒燒汁 $265

好期待嘅主菜卒之上場，燒美國牛肋骨要上5乘熟，單喺上枱時嘅賣相、肉嘅色澤，已知好對辦，燒嘅時間拿捏得非常好。仲有，幾鍾意佢個表達，幾將肋骨肉切成小件，令賣相好睇，又方便客人「些牙」，但保留骨位俾你可以切下。

啲肋骨肉非常好食，燒到真喺外層焦脆，而內層保持肉嫩，呈嫩紅色，卻無血水滲出，恰到好處，肉味香濃，真喺無可挑剔。佐以紅酒燒汁及芥末，再伴有燒蒜、法邊豆、薯角，好值得推介嘅菜式。

咖啡 $26、蜜糖蘋果醋汁 $32

飽餐過後，大家點杯飲品，再慢慢詳談軼事。雖然店家無咩特色咖啡提供，但總比一啲餐廳明明唔喺咖啡店，又提供特色咖啡，卻又半桶水沖得唔好，甚至只喺機沖，兼收你三、四十蚊杯。小弟杯咖啡就無太多嘢可言，但友人杯蜜糖蘋果醋汁佢話又幾特別，甜酸細緻，感覺健康。

今晚所試嘅菜式好有心思，無論小食，還是主菜，均甚具特色。加上空間寬敞嘅環境，服務到位，朋友都大讚，喺值得再翻兜嘅工廈西餐廳。

個人評分
味道：8/10
環境：7/10
服務：8/10
抵食：7/10
平均每人消費：HK$280

餐廳資料：
Mela Italian & Spanish Cuisine
觀塘駿業街66號巧運工業大廈11樓C室
3686 0988