My Little Coffee : Coffeehouse & Roasters：我的咖啡小天地

友人轉行走咖啡師嘅路，可謂從低做起，所以，兼職於大連鎖咖啡店學一學管理之餘，亦到細咖啡店學唔同嘅咖啡知識及沖調手法，我相信有志者，事竟成。嚟到My Little Coffee，屬小型咖啡店，俾人感覺就喺一間好有個性嘅咖啡店。

甫走進店內，好有小家居嘅感覺，比起連鎖咖啡店一式一樣嘅裝修，依類小咖啡店嘅吸引之處，就喺環境。雖然地方唔大，但舒適、寧靜，無賣保險嘅經紀，無做傳銷嘅客人，嚟嘅都喺想靜吓、傾吓偈嘅人。

近窗對住街景嘅位故然感覺開揚，但我鍾情死角嘅梳化位，除咗舒服好坐之外，自成一角，私隱度相對高，感覺猶如晌屋企，好家居小天地。

餐廳內有唔少咖啡嘅相關產品，均作零售；牆上、天花掛有唔少裝咖啡豆嘅麻包袋，更有唔少書籍、掛畫，都同咖啡相關。雖然，小弟對咖啡嘅認識都仲喺好淺，但咁有「咖啡」氣息嘅環境，感覺特別輕鬆。

今日嚟到，都喺打算同朋友閒聊，嘆杯咖啡，食件餅。所以，一入門口就瞄住餅櫃睇睇有咩選擇，估唔到小小一家咖啡店，甜點可不少啊！餅櫃後就喺水吧，睇到咖啡師不斷沖調咖啡，餐廳採用先付款後送餐形式，落單後就可以埋位安心等待飲品、食物送上。

等候食物期間，補影番啲餐牌作記錄，如果喺星期一至五嚟（公眾假除外），早、午、下午茶都有做套餐，定價都非常實惠，仲要有即磨咖啡無限添飲服務，就算唔喺飲得多，都覺得店家大方。

可惜，小弟到訪之日喺星期六晏晝，就無套餐供應，只有散點。而散點同套餐分別，食物款式可謂大同小異，相差嘅就喺價錢方面。

仲有，套餐只包基本即磨咖啡，轉其他特色咖啡就自不然要額外補補錢。查實，店家晌飲品方面有幾弓選擇，個別咖啡的確好有特色，如以四季為名嘅"Little"咖啡系列，又有挑戰忌廉極限嘅Vienna Coffee……等等，此外，手工咖啡相信亦喺店家嘅招牌主打，而茶品亦估唔到有咁多選擇！

檸檬撻 $36

之前，晌紅磡一家酒店嘆高茶時，就食過一款高水準嘅檸檬撻，今日晌店所食嘅，同樣甚具質素。賣相無咩花巧，但撻面檸檬漿做得平滑，有光澤，切開睇睇，撻皮做得薄，底同邊厚度一致，喺手工嘅熟練，而且，撻殼口感香脆。中間嘅檸檬餡心先令我印象深刻，因為，依家真喺好少見，做咁薄身嘅撻都分3層，上下兩層喺檸檬漿，中間喺檸檬果蓉，檸檬味好傳神，酸香清新，且酸甜度細緻平衡。事後問問店員喺咪自家製，佢不諱言喺來貨，但喺屬交貨俾本地酒店嘅供應商，故質素真喺絕不失禮。

拿鐵咖啡 $36

一小啖入口，杯拿鐵沖泡得果然有質素，雖然個拉花未夠大而唔搶眼，但花紋都算細緻，咖啡面唔會起晒泡泡。口感順滑細膩，奶泡跟濃縮咖啡撞得平均而綿密，確喺一杯醇香具水準嘅拿鐵。

黑糖薑餅咖啡拿鐵 $45

唔知喺咪就嚟聖誕，推出帶「薑餅」元素嘅冬季新品。雖然同樣喺拿鐵，但拉花就唔喺佢亮點，重點放番晌味道上面，睇杯面黑色點點，就喺直接加入黑糖粒，而「薑餅」元素主要喺加入薑汁，所以，醇香嘅拿鐵中，慢慢滲出一絲絲薑味，個人而言，我喜歡薑味重啲，咁先有點突出到個主題，依家稍為隱若啲。

其實，餐牌中都有寫明繁忙時段只可以坐90分鐘，不過，相信未必會強烈執行，但為他人着想，如遇人多，可尊重番店家嘅要求。否則，就好似小弟咁，揀個非繁忙嘅晏晝，盡情迤！

個人評分
味道：8/10
環境：8/10
服務：8/10
抵食：7/10
平均每人消費：HK$72

餐廳資料：
My Little Coffee : Coffeehouse & Roasters
尖沙咀加連威老道100號港晶中心地下3號舖
3488 8387