店子處佐敦食廈莊士倫敦廣場，交通故然方便，食廈又安排服務員協助客人搭唔同嘅電梯，所以，排隊情況良好、有秩序。而上到去，一打開電梯就喺餐廳。第一眼望落，以為環境唔喺好大，原來轉彎另一邊仲有長長多排卡位，格局如大部韓燒，都喺以卡位居多。
枱上已放有多款韓式前菜：芽菜、菠菜、泡菜、翠玉瓜、魚仔、冬菇……等等，晌等候上食物期間，搵依堆小食間場就最好，調味功夫不俗，味道各有不同，食落好醒胃。
既然喺放題，就即喺任點任食，先睇睇食物選擇。點菜紙一面分類為豬、牛、海鮮及和其他肉類；另一面分類為韓式料理、蔬菜及Premium Menu，不過，後者Premium Menu雖設定為需額外付款食物，但又唔一定喺啲貴嘢喎。
飲品方面，雪櫃內多款韓式飲品任君選擇，最貼心喺有幾個雪櫃放晌餐廳內唔同位置，唔使啲人堆埋晒一齊攞嘢飲。
而且，口味唔喺本地大路嘢，啱晒我試東試西，再者食住熱辣嘅烤肉，一邊飲住凍飲就不知幾爽。
由於店家嘅烤肉大多無調味，希望客人食到食物嘅原味，但為咗照顧唔同客人嘅需要，都為每位客人提供3款佐料或醬汁。小弟本身都唔食辣醬，但韓式甜辣醬就少少例外，因為辣度唔強，又有點甜。
爐邊蛋
依家韓燒好多都有爐邊蛋，如你鍾意嘅，DIY自行加入配料都得，如泡菜、冬菇絲都可以。我就淨食，烘到外層脆口，咬落仍有份軟滑感就正喇。
生菜
食韓燒，生菜少不了，始終，烤牛又好，烤豬又好，始終油脂唔少，以生菜夾埋一齊食，清爽啲，又可以減少啲罪惡感。
牛肉腌漬胸叉肉
個名好似好勁，所以，試試會喺乜，拎到嚟睇落似肥牛，查實肥肉都幾多，薄切燒過之後，又OK喎，無想像中咁油。燒乾少少變得好脆身，爽生菜食，唔錯！唔錯！
生蠔、大蝦、帆立貝、鰻魚
多款海鮮都喺任點任食，揀嚟其中4款，用料質素唔差。
生蠔就最花時間燒，所有海鮮食完先輪到佢，蠔味頗鮮，殼內嘅汁液成為「蠔湯」，千祈唔好錯過。帆立貝，燒到收水就差唔多，入口幾爽彈，同樣鮮甜味足。
大蝦，其實唔算好大隻，我哋都燒得有啲乾，味道還可以。最正喺啲鰻魚，因為有醃過，魚皮好易燒燶，但燒完去走層皮，鰻魚好香滑，正。
烤梅頭肉
一件過嘅巨型梅頭，夠晒氣勢，外觀色澤紅潤粉嫩，睇落已經好吸引，放到烤爐上，越燒越香，香氣買溢，燒得兩面金黃，食得。
剪成小件，先淨食，果然好有肉香，再沾甜辣醬，搵生菜包住食，果然一流，甜辣醬令味道多點變化，生菜去咗份油膩感，感覺更好。
烤牛排骨（調味）
食韓燒真喺唔可以唔燒牛排骨，連住骨頭獨有嘅裁切、鎅花及捲法喺其標記。每件攤開真喺好長，都要一開三先夠放晌爐上燒烤。
燒香咗嘅牛排骨，味道一流，既有肉香，口感軟腍，沾海鹽蒜油，抑或甜辣醬都咁正，唔少得例牌包生菜啦。
杏鮑菇、茄子
食咁多肉，點可以唔食番多啲菜平衡吓，搵生菜包住肉嚟食就故然喺正道，但燒吓其他蔬菜喺常識，鍾意嘅話，更可以跟生菜一齊夾住啲肉一齊食，過癮呀！
辣泡菜湯
老友食得辣，所以，睇餐牌時已指名點嚟試試，小弟試咗一口，果然辣勁十足，但友人就食得好滋味，仲話，越食越辣，越辣越起勁。
平日價$198任點任食，雖然比唔起日式放題款式咁多，但有咁多肉類選擇，又有海鮮，自己燒吓燒吓，有得玩有得食，況且，韓燒本身唔喺低消費飲食，所以，198真喺抵玩抵食，難得喺食材有相當質素。
個人評分
味道：8/10
環境：8/10
服務：8/10
抵食：8/10
平均每人消費：HK$220
環境：8/10
服務：8/10
抵食：8/10
平均每人消費：HK$220
餐廳資料：
平昌 By BBQ 7080
佐敦彌敦道219號莊士倫敦廣場5樓
5901 7080
平昌 By BBQ 7080
佐敦彌敦道219號莊士倫敦廣場5樓
5901 7080
沒有留言:
發佈留言