美味小廚茶餐廳 May May Restaurant：我的星期六美孚早餐 ~ 小炒勝早餐

好耐無寫依個系列，因為，近來食嚟食去都特別可言喺之前已寫過嘅餐廳，佢哋又無咩新嘢出，所以，真喺無咩好寫。諗諗吓，仲有間茶記好似未寫過，隱身晌街市嗰邊，之前同屋企人食過晚飯，啲小炒幾好，反而，早餐就未嚟過，故今次嘅星期六早餐就嚟到「美味小炒茶餐廳」。

唔喺老吹，「美味」確喺幾多街坊捧場，九點幾嚟到，真喺要等先有位。環境喺街坊茶記格局，無咩特別好講，卡位、小圓枱，逼逼窄窄，但勝在乾淨企理。

早餐款式相對其他茶記少，一頁紙睇晒，但都叫有超過10款選擇，不過，款式就大路啲，喺較傳統嘅茶記款式。

早餐B $26

小弟要咗火腿通粉、牛油多士，飲熱奶茶。啲通粉有少少過腍，個湯底亦無乜味，但塊火腿食得出唔喺普通平價嘢；而牛油多士可能喺大量製作，無理由影一陣相就凍晒，食落口真喺微熱都無，幸好仲有杯靚奶茶補數，雖則未叫超滑，但茶底芳香。

早餐F $30

老婆就要雪菜肉絲米、配午餐肉及煎蛋，熱檸水，不過，佢偏向食素，減少食肉，塊餐肉就醒俾小弟。佢話個肉絲米好食，主因喺啲雪菜無一般通病過鹹，而啲雪菜亦令個湯底無咁寡；餐肉，睇得到喺混有火腿「白豬仔」嘅貨式，比「梅林」好食。

兩個早餐，一個普通，一個好，但都唔及晚市啲小炒又抵又好食，下次再幫襯都喺晚市居多。

個人評分
味道：6/10
環境：6/10
服務：7/10
抵食：8/10
平均每人消費：HK$28

餐廳資料：
美味小廚茶餐廳 May May Restaurant
美孚美孚新邨百老匯街25號C地下
2741 8497