早段時間，人客唔多，但到8點左右，有8成幾滿，生意不俗。踏進餐廳，先喺鋪面鋪有藍白雕花地磚，再入啲，第一眼嘅感覺就喺一室工業風嘅裝修，水泥地、水泥牆、水泥石柱，牆上又搵咗唔少水喉通做裝飾，4人枱佔大部分，亦有張12人共用長枱，夠型格。
坐低嘅例行公事，就喺「掃描」餐牌，睇睇有咩好食，兼影低留個記錄。主餐牌內選擇甚多，類別由前菜 / 小食、沙律、主菜、意大利粉、意大利飯、芝士手工脆餅 / 薄餅、甜品，到酒精及非酒精都一應俱全。侍應遞上餐牌時，都會順帶介紹有咩食材新鮮返貨，有咩推介菜式。
此外，仲有兩組套餐餐牌，第一組共6款選擇（D1-6），定價平少少，包是日餐湯、法式蒜蓉包、主菜（$128-$188）、餐飲。
另一組同樣有6款選擇（D7-12），包是日餐湯、法式蒜蓉包、主菜（$238-$368）、紐約芝士餅、餐飲，除咗定價貴啲之外，多咗一客芝士餅。比起散點，點都喺抵食啲。故此，我哋就晌兩個組別各揀一款。
煙肉薯仔湯（是日餐湯）、蒜蓉包
味道唔錯，質感滑得嚟有種粉粉嘅薯仔感，又有煙肉嘅香味，不過，敗筆位在於唔夠熱，基本上唔可以用個熱字嚟形容，只喺微暖，感覺肯定會大打折扣。蒜蓉包烘得香脆，但唔熱亦喺問題所在。被人感覺，喺做得迤。
鮮茄茸牛尾肉醬扁意粉 $138
晌主餐牌見散點要$118一客，所以，補多$20成為套餐，喺咪划算好多呢！其實，賣相、食味都相當唔錯，扁意粉質感咬口，個鮮茄茸牛尾肉醬好鮮香酸活，加埋少少即刨嘅巴馬臣芝士，更芳香，不過，只嫌牛尾肉真喺得好少。
原隻炭燒波士頓龍蝦配黑松露醬薯條 $248
店家嘅龍蝦菜式有意大利飯，亦有原隻龍蝦，當然，以後者夠睇頭、夠吸晴啦，主餐牌同樣有得散叫，$218一客，所以，無理由唔叫套餐，多$30，就夠個湯、芝士餅及餐飲，單喺件芝士餅都值番$30啦。原隻炭燒龍蝦以大長方木盤盛載，伴有沙律菜、炸薯條，薯條份量實在多，整份龍蝦睇上嚟非常大堆頭。
龍蝦肉爽口彈牙，又有碳火香，唧啲檸汁更清新鮮甜，而且，更有唔少蝦膏。啲薯條本身唔會話特別好食到飛起，炸得唔油已收貨，但正就正在配個黑松露醬，沾嚟食薯條就自不然變得不一樣，香味立即大增。再食番少少沙律菜嚟平衡吓、清爽吓！
紐約芝士餅
少咗一層酸忌廉晌餅面，可謂有欠正宗，似歐陸芝士餅多啲，而且，消化餅底亦有少少厚。不過，芝士部份就做得唔錯，第一就夠濃郁，芝士味夠重，其次口感挺實而柔軟。
咖啡、檸茶
友人話杯檸茶麻麻，個茶底有啲怪怪哋。而佢哋無賣啲特色咖啡，如鮮奶咖啡、意式泡沫咖啡之類，只有普通或即磨（+$3），所以，索性飲杯普通貨色就算，果然好普通，但如果唔喺即磨，普通嘅喺咪咖啡粉開沖呢？
Pom's個環境確喺幾特色，同埋枱椅安排都算OK，招呼又幾好，侍應頗有禮貌，約埋幾個老友食飯傾偈喺唔錯。菜式以意大利菜為主，兩款主菜都做得不俗，但整體而言，食物仍有改善空間，如餐湯、蒜蓉包，咪睇小依啲嘢，好唔好喺幾影響餐飯一開始嘅感覺。
個人評分
味道：7/10
環境：8/10
服務：8/10
抵食：7/10
平均每人消費：HK$190（88折優惠券）
味道：7/10
環境：8/10
服務：8/10
抵食：7/10
平均每人消費：HK$190（88折優惠券）
餐廳資料：
Pom's Kitchen & Deli
佐敦德興街7號A-B號舖
2640 0388
Pom's Kitchen & Deli
佐敦德興街7號A-B號舖
2640 0388
沒有留言:
發佈留言