16 Shell：蜆而易見

位處蜆殼街16號嘅「16 Shell」，店名嘅由來顯而易見，主打意大利菜，喺小弟喜愛嘅菜系之一，另外，少有哋以黑蒜作為餐廳賣點，故吸引到訪。天氣轉寒，落住長命雨，感覺有點悽楚嘅一個晚上。

餐廳屬小店格局，佈置簡約，實木深啡襯白，配柔和燈光，都幾有情調。白色牆身上有唔少食物相關嘅剪影裝飾，頗得意。當然，入門左方靠牆嘅梳化椅應該最好坐，但其餘嘅梳化櫈亦都舒服，只喺略嫌枱與枱之間太逼。

上文都講過黑蒜喺其賣點，所以，餐牌頁面就以一位精「蒜」大師作代言人，蹺起雙手，型！黑蒜價錢唔平，佢喺發酵過嘅蒜頭，網上摷摷就知有幾好，如抗氧化。

此外，店家亦晌餐牌內頁註明，佢哋喺幾注重菜式嘅健康度，無味精，無添加……

翻一轉餐牌，菜式選擇甚多，頭盤、餐湯、沙律、小菜、精選菜式、意大利麵、烤燒類及飲品。尤其意大利麵，配搭甚多。

巴馬火腿黑蒜薄餅 $98

原本打算試試佢哋嘅黑炭黑蒜蓉包，但店員話新出咗一款黑蒜薄餅，仲可配巴馬火腿，當然比單單黑蒜蓉包吸引啦。餅底加入黑蒜，外觀有少少發霉樣，但又搓得幾軟綿，黑蒜嘅蒜味無一般蒜頭咁霸道，配以油潤嘅火腿，真喺幾正。 

蒜蓉香椒白酒牛油汁海鮮拼盤 $108

另一道頭盤喺海鮮拼盤，以蒜蓉、香椒、白酒、牛油煮個汁，色澤艷紅，帶微辣，不過蒜味及白酒都偏弱，唔算差，只喺叫做顯得未夠個性。但用料睇落就幾正，啲蝦、青口都好大隻，夠睇頭，而且，蝦肉好爽彈，青口柔軟，蜆肉亦好鮮甜，可以講喺用料不賴。 

香煎蟹餅 $168

主菜方面，試咗一道蟹餅，一客有兩球蟹餅，好大好厚，切開一睇，確喺幾真材實料，一絲絲蟹肉填滿整件蟹餅之內。雖然，入口果真食出啖啖蟹肉，但有兩個問題，一就喺蟹餅口感太鬆散，搓得唔夠實，似食蟹肉絲，非蟹餅；其次，應該喺用上罐頭蟹肉，所以，味道都比較偏鹹，若然加番多少少洋蔥，唔知會唔會令口感爽啲，鹹度又平衡啲呢？所伴嘅醬汁只喺普通沙律醬，未有其他亮點！

三文魚、香煎橄欖油大蒜熏肉、洋葱蕃茄醬意大利粉 $168

另一道主菜喺意大利粉，主材料揀是日鮮魚菜，而鮮魚就喺三文魚，煮法用上Alla Pomodori Style，即喺橄欖油香煎三文，並加入大蒜、熏肉、洋葱做成嘅蕃茄醬。老實講，賣相都幾令人失望，好似快餐店嘅處理手法，還好喺三文魚夠油潤，意粉煮得咬口，蕃茄醬算喺鮮活酸香，整體味道喺唔差嘅。  

鮮奶咖啡 $35

諗住餐後嘆杯咖啡，所以，揀咗慣常嘅鮮奶咖啡，如果講賣相，就真喺唔多得。從外觀所見，估計奶泡打過籠，兼連泡都倒埋落啲濃縮咖啡度，所以，表面起晒皺紋；至於幾個心心，一睇就知喺加奶泡畫出嚟，而唔喺拉出嚟，咖啡嘅醇香亦只屬中規中矩。

整體而言，味道方面有讚有彈，但賣相方面可以再做好少少。反而，幾欣賞啲服務，由於枱面空間唔大，但上菜速度啱啱好，唔會堆到一枱都喺嘢，而且，適時換碟，都喺睇在客人眼裡。

個人評分
味道：6/10
環境：7/10
服務：8/10
抵食：6/10
平均每人消費：HK$340

餐廳資料：
16 Shell
天后炮台山蜆殼街6-16號寶榮大廈地下B舖
3954 5918