餐廳位於囍帖街，樓高兩層，地下喺酒吧區，用餐區主要設晌二樓，環境非常有氣氛，幽暗而柔和嘅光線，加上四圍嘅裝飾、擺設、吊燈，整體都予人有份品味、藝術之感。小巧嘅皮梳化椅，舒適好坐，其次，枱上嘅餐具，都喺細心挑選過似的。
遇着依家天氣清涼，一眾露台位必定喺搶手之選，既可感受吓秋意嘅清爽，空間感更寬闊寫意。
高纖餐包
未開餐，先嚟一人一個小高纖餐包，頗軟熟，等多陣用嚟配前菜嘅雞肝醬或佐湯用，都非常合宜。
清酒麵豉雞肝醬配多士 $108
清酒喺比較玩綽頭嘅部分，多士下嘅石卵喺燒熱晒，唧上清酒散出縷縷白煙，散發出酒香，幾有效果感。不過，當食啲多士，其實，喺唔會太有清酒味，而碟上嗰一小兜灰灰沉就喺麵豉雞肝醬，質感偏軟身流質，味道幾得意，有朕麵豉味又有一朕肝香，但就唔似鴨肝或鵝肝醬咁濃，雖話加入清酒，但唔使擔心酒味重，搽落脆口嘅多士，食味不俗。
蟹肉青蘋果沙律配牛油果芒果冷泡沫 $128
雖然話喺沙律，但其實可以塗晌多士或麵包食，而個沙律貨真價實，超多蟹肉，青蘋果粒唔多，當吊吊味。至於，個泡沫做得非常幼細輕柔，牛油果味突出過芒果味，整體嚟講幾清爽。順帶一提，不少菜式晌擺設上，都會加啲竹葉、食用花，添上多點和風色彩！
龍蝦濃湯 $158
湯品所選嘅龍蝦濃湯喺店家嘅招牌菜，上枱喺兩件有兩隻手指粗嘅波士頓龍蝦肉，旁邊白色嘅喺已打起嘅忌廉，放晌透徹嘅玻璃碟內，咁啲湯呢？原來，濃湯喺以茶壺另行倒出，夠晒保熱，味道極為濃郁，口感滑溜，啖啖都喺鮮蝦味，絕對喺水準之作。
鮮濃忌廉日本蟹膏汁扒大蝦意大利扁麵 $228
意大利扁麵一向都喺喜愛嘅麵條食材之一，加埋扒大蝦，更成為心水菜式。賣相已經睇落好正，兩大隻大蝦，扒燒得鮮紅誘人，食落爽彈有蝦味；至於扁麵，煮到啱啱好，煙韌有咬口唔在講，個鮮濃忌廉日本蟹膏汁幾有畫龍點睛之效，味道其實有少少龍蝦味，總之令個扁麵多咗一層鹹香味，正呀！事後被告知，蟹膏喺用上松葉蟹蟹膏，用料之精就喺無話可說。
海膽意大利燴飯配日本舞茸菇 $188
意大利燴飯向來喺小弟嘅心水菜式，飯粒煮得好有水準，煙韌而有咬口，汁底偏濕潤；飯內混有唔少本菇及舞茸菇，更刨落唔少巴馬臣芝士，極之幽香。一大撮馬糞海膽放晌碟邊，喺頗聰明嘅做法，因為如果溝埋入飯內，一定被忌廉及芝士味冚晒，依家，小弟認為最理想嘅食法喺每羹飯添小抹海膽，咁就唔會嘥晒海膽嘅鮮味。
烤熊本豬鞍·抹茶豆腐汁野菜沙律 $238
豬鞍取自九州嘅熊本豬，相信都有啲冷門，但質素絕對唔失禮，豬鞍煎到恰到好處，外層微脆，肉質卻頗軟腍，富肉汁又有油香，入口仲帶點爽身；件菜則有啲混和抹茶豆腐汁嘅野菜沙律及烤薯，前者嘅野菜好新鮮，但抹茶豆腐汁就未有想像中咁有個性；反而後者烤薯淋上芝士醬，立時變得濃香滋味。
南青山蛋糕卷 $58
甜品方面，佢哋馳名嘅忌廉蛋糕卷點可以唔試，蛋糕卷嘅口味共有3款：原味、皇家奶茶味及抹茶味。眼前依件就喺皇家奶茶味，忌廉做的非常軟滑輕盈，其茶味芳香醇和，而海綿蛋糕部份，的確鬆軟綿綿，好有彈力，不愧鎮店招牌。
法式栗子蛋糕 $68
好味嘅甜點又豈止蛋糕卷，另一款法式栗子蛋糕正值栗子當造期，就更加唔可以錯過。外形一如法式甜點般精緻，細嚐一口栗子蓉，真喺綿滑而充滿栗子嘅清甜，下面仲有一層栗子忌廉，細緻幼滑，撻殼鬆化富牛油香，又一高水準嘅出品。
鮮奶咖啡 $38
甜點配咖啡，始終喺小弟個人心水，不過，單以依杯鮮奶咖啡嘅質素計，個人就唔太推薦喇，唔喺唔香醇，只喺奶泡撞落啲濃縮咖啡度唔平均，整體口感度未臻柔順。
順便講講，Yoku Moku餅店就在樓下，對其忌廉蛋糕卷、雪茄蛋卷、曲奇禮盒……等等有興趣買嚟送俾朋友仔，就不妨入去睇睇。
總結餐飯，從整晚所食嘅菜式嚟講，不愧大師出品，由前菜、湯品、主菜到甜品，無論賣相、味道、配搭，都做得出色。有時候，不得不讚日本人，做咩都一絲不苟，青出於藍。
個人評分
味道：8/10
環境：9/10
服務：8/10
抵食：8/10
平均每人消費：HK$450
味道：8/10
環境：9/10
服務：8/10
抵食：8/10
平均每人消費：HK$450
餐廳資料：
Blue Brick Bistro
灣仔皇后大道東200號利東街地下G35號舖
2865 0355
Blue Brick Bistro
灣仔皇后大道東200號利東街地下G35號舖
2865 0355
沒有留言:
發佈留言