餐廳尾仲有兩個貴賓房，亦可以打通，每個大約可容納8-10人，人多又想私隱多啲，訂房就最好不過，但設最低消費$2,000（每個計），其實定得唔高，即平均每人消費二、三百左右就夠數。
除散點之外，仲有一系列套餐：三道菜嘅精選晚市套餐、二人套餐、四道菜嘅特色套餐、六道菜嘅風味套餐，平貴都有，可謂豐儉由人。套餐故之然划算啲，但份量十足，所以，人多就建議套餐加散點，划算得嚟有多份彈性！
此外，牆上黑板亦寫有多款推介菜式，如太多選擇唔知揀咩好，就不妨晌推介中諗諗。而且，想特別少少，訂枱時原來仲可以同店方講聲，等主廚為你特別設計菜式，甚有私房菜嘅感覺。
另外，有個甜品及飲品餐牌，以一家小店形式，真喺無諗過佢哋會提供咁多款甜品。好酒之人亦有選擇，因為餐廳都有提供多款餐酒。
特色麵包拼盤
單喺個麵包碟，已睇得出店家嘅心思，一共有4款自家製嘅麵包：墨魚汁包、香草脆條、原味法包及無花果法包，以人頭計，各有3片，保證人人都有得試。
墨魚汁包好軟熟，送到上枱時仲喺微暖；香草脆條陣香草味超突出，而且咬落卜卜脆；原味法包當然喺大路嘢，但混入無花果乾嘅法包，份甜味寧舍自然清甜，搽啲牛油已好好食。
法國藍青口伴香草白酒忌廉汁配蒜蓉多士（套餐）
早前晌一家比利時餐所食到嘅青口，質高味美，印象難忘，今晚晌度所嚐嘅法國藍青口，同樣有水準。雖然啲青口肉地唔算厚，但勝在鮮甜，而且份量多到似主菜多過一道前菜；個香草白酒忌廉汁做得好香滑，既有香草味，又有微微白酒香，內裡混入好多配料，味道有層次，所以，再加落片蒜蓉多士度一齊食，超正；因為個汁底都幾多，故就可以用埋之前啲「餐包」蘸嚟食，唔好嘥。
蟹肉牛油果沙律伴蕃茄油醋汁（套餐）
食完個較濃味嘅藍青口，再落嚟嘅沙律，正好清新一下大家嘅味蕾。依道沙律唔花巧，但絕對喺以新鮮取勝，沙律菜好爽脆，蟹肉一啲無手緊，唯獨是牛油果我就覺得未夠熟透。底下再墊有蕃茄同青瓜，配上油醋及少少芒果醬，食完令人更開胃。
龍蝦忌廉湯（套餐）
時下唔少餐廳都有做龍蝦湯，一般敢做依款湯嘅餐廳都會做得唔差，雖然，個湯無早前晌灣仔Blue Brick Bistro咁有排場，又有大大件波士頓龍蝦肉，但個湯底一啲唔失禮。入口龍蝦味都好濃郁，口感順滑，湯內有少少蝦肉碎，老友就話有少少澀味，我就唔喺太覺得。
南瓜蕃茄湯忌廉湯（套餐）
喺是日餐湯嘅款式，雖然，套餐喺指定嘅龍蝦忌廉湯，但如果你唔介紹，又想試吓其他湯，佢哋都可以俾你轉為是日餐湯。質感滑溜，完全無粗糙感，南瓜嘅甜味好出，但隱約帶有少少蕃茄嘅酸香，唔重，喺點到即止嘅感覺。
蟹肉牛油果青瓜凍湯 $58
依個喺店長推介俾我哋試吓，話頗有特色，再者，甚少飲凍湯，故貪新鮮好有興趣一試。湯碟中已放有唔少蟹肉及青瓜粒，自己將湯倒入碟內，目的喺叫人睇出蟹肉喺貨真價實，而旁邊小茶壺內青綠色嘅就喺凍湯。蟹肉好有鮮味，個湯飲落好輕盈清新，予人好爽快嘅感覺，不過，個人覺得頗偏向青瓜味，牛油果味太隱約，感覺未夠平衡。
烤燒加拿大豬鞍扒伴芥末莎莎（套餐）
近期都跟豬鞍扒幾有緣，無耐之前先品嚐過，小弟亦幾鍾意依一款食材。睇件扒嘅呎吋、厚薄，就知斤兩十足，如果睇番散點餐牌，喺10oz份量，單價賣$248，所以，個套餐非常抵食。
豬鞍扒烤得色澤金黃，更泛起焦香，好誘人嘅外觀，伴以色彩繽紛嘅沙律菜，喺攞到高分嘅賣相。雖然喺豬肉，但我本身都知依款豬可以唔使全熟，五乘喺最理想，不過，問過店長，為免客人怕太生，通常都做到七、八乘。切開一睇，又真喺扒肉仲喺呈粉紅色，邊位帶少少脂肪，落刀一刻都感覺到肉質份彈性，就算件扒裁到咁厚身，入口有種脆口鬆化嘅口感，唔會覺得好生，更無嚡口嘅感覺，又富肉汁，所以，我哋一致都認為件扒好好食；芥末莎莎，帶微微芥末嘅刺激，用作提提肉香，效果唔錯。
蕃茄慢燴澳洲穀飼牛面肉（套餐）
喺牆上黑板嘅推介菜式，相信有一定嘅質素先敢擺出嚟作為推仲，單賣都要$218架。賣相雖然只喺一般燴肉嘅菜式，唔多花巧嘢，但精彩之處喺佢「內在美」吖嘛！牛面肉入口有「即化」嘅口感，即喺啲肉質慢燴到軟腍、鬆軟，而且好有肉香，就算啲蕃茄蓉好濃香酸活，亦無冚過啲肉味。墊底仲有啲薯蓉，口感非常幼滑，嗒落就知加入咗黑松露醬，立時變得唔普通，叫人睇得出做菜嘅認真同花心思。
黑松露白汁煙肉蘑菇炒年糕 $108
兩道西式主菜做得有一手，但帶韓式嘅炒年糕會唔會甩轆呢？個炒年糕採用咗西式卡邦尼嘅做法，加入白汁、煙肉、蘑菇去炒，再升級添加咗黑松露，而最神髓喺加埋隻生蛋，依家出去食卡邦尼意粉，好多時蛋都慳番費事加架。撈勻後，個汁底集香滑惹味於一身，年糕炒得煙韌有咬口，粒粒都掛滿汁，真喺好正兼好飽肚。
鮮奶咖啡（套餐）+$15
甜點時段，個人喜好都喺要襯番杯鮮奶咖啡，個茶杯造型非常得意，不過，就有姿勢，卻唔太實際，因為奶泡撞落咖啡出嚟嘅口感唔均勻，似意大利泡沫咖啡多啲，還好咖啡味道不俗。
洋甘菊（套餐）+$15
友人就喜歡洋茶配甜點，洋甘菊有多種功效，女生就當然最睇重佢可以抗老化、潤澤肌膚啦。跟咖啡一樣，所用嘅茶杯亦好精緻，而最窩心喺附上嘅喺蜜糖，唔喺普通糖水。
蘋果金寶（套餐）
即焗出爐嘅嘢食永遠喺香噴噴，載住蘋果金寶嘅餐配熱到辣手，就知喺新鮮即焗出品。面層嘅金寶粒非常之香，鬆脆而充滿牛油香味。而金寶底下嘅蘋果粒，較一般切得幼細，煮得軟綿，帶幽香嘅玉桂味，好食。
椰皇二重奏（套餐）
估唔到套餐內嘅廚師推介甜品喺椰皇二重奏（散點定價要$80），即喺椰皇奶凍（下）夾椰皇沙冰（上），奶凍好有椰青嘅清甜味，專登做得更滑身，可以啜嚟食；不過，上層嘅沙冰就差啲，雖然好有椰香，但打得有啲粗糙，未夠綿，食落有少少碎冰粒，喺美中不足之處！
除咗份量十足，味道的確有一定水準，服務亦好到位，添水、換碟都做到足，侍應都好有禮貌。無預到佢哋啲頭盤咁大份量，其實，真喺唔要個炒年糕都夠晒我哋3個人食！無刻意問店員間餐廳名點解，事後自行上網查查，原來喺法文「amitié」，意思喺友情，當然，唔知店主改名喺唔喺帶有依個意思，但同相識足有30載嘅老友嚟聚一聚，感覺好有意思。
個人評分
味道：8/10
環境：7/10
服務：8/10
抵食：8/10
平均每人消費：HK$320
味道：8/10
環境：7/10
服務：8/10
抵食：8/10
平均每人消費：HK$320
餐廳資料：
Amitie Kitchen
尖沙咀亞士厘道27號捷利商業大廈8樓
3104 9234
Amitie Kitchen
尖沙咀亞士厘道27號捷利商業大廈8樓
3104 9234
沒有留言:
發佈留言