龍島美食店 Lucullus Gourmet Shop：公朱同好（七）

之前都收過龍島嘅朱古力，一次喺三年前老婆送嘅罐裝榛子牛奶朱古力（Hazelnut Milk Chocolate），另一次就喺食友送嘅小盒裝南瓜子爆谷朱古力（Pumpkin Seed Choc-A-Corn），兩款朱古力都好好食，不過，當時就未有寫朱古力嘅食評系列。最近，又收到朋友送贈嘅龍島朱古力：熱帶乾果朱古力（Tropical Dried Fruit with Nuts）同快樂無限朱古力之旅（Happy Chocolate Tour），當然要寫入「公朱同好」系列啦，由第一篇到依家，唔覺唔覺已去到第七篇，雖然篇數唔多，但都代表對朋友餽贈嘅一份謝意。

熱帶乾果朱古力

粉紅硬皮紙袋襯棗紅粗絲帶，包裝比較大方得體，精巧心意送禮之選。有一點需要注意，就喺食用期比較短，大概兩星期左右。

打開包裝紙，內裡再以密封膠袋包實4件乾果朱古力，保證衛生。

4件乾果朱古力分別有：

2件杏脯乾朱古力 - 杏脯乾本身幾油蜜，又無話太乾硬，沾上黑朱古力，軟韌中帶點甘苦；
1件芒果乾朱古力 – 一整片芒果乾，較杏脯乾乾身，但味道則較為清甜；
1件橙片乾朱古力 – 橙片乾嘅橙味非常突出，而且又甜甜酸酸，除咗沾上朱古力，仲額外加有開心果仁碎、小粒杏脯乾、小粒金提子乾，所以，一啖過入口口感豐富多啲。

快樂無限朱古力之旅

啱啱朝早先睇完飲食雜誌介紹依盒朱古力，隔咗日就收到依份厚禮，真喺喜出望外。唔好理佢好唔好食先，16粒迷你朱古力仔個造型絕對殺晒，俗啲講句，真喺氹死女或引死細路呀。果然貫徹番龍島不斷創新嘅作風，依份小禮盒，認真打破沉悶，令人快樂無限，正能量添加劑！

16粒朱古力都各自有唔同味道，附掛晌盒邊嘅介紹小卡，繽紛鮮明，有齊晒16款味道嘅資料，憑相看圖識字，小弟就無謂抄多次。

朱古力粒粒造型精細，的骰別緻，一啖一粒，而講到味道，龍島出品始終都喺有一定質素，就算做到咁可愛，味道一樣唔失禮。講到心水，青蘋果型嘅青蘋果味、哈哈笑嘅純黑脆米味、星星嘅檸檬味、笑騎騎嘅芒果味、粉紅煲呔嘅黑加內侖子味，幾款都喺味道較清新嘅。當然，其他味都一樣唔錯，你又會鍾意邊款？

有人話甜品可以舒緩緊張，stressed倒轉就喺desserts，姑勿論事實喺點，收到咁可愛得意嘅朱古力，又點會再緊張呀！而且，咁多好嘢，又點可以淨得自己一個人食，梗喺同朋友、家人一齊分享啦，咁先叫得公諸同好嘛！

個人評分
味道：8/10
環境：- /10
服務：- /10
抵食：- /10
平均每人消費：HK$0（禮物）

餐廳資料：
龍島美食店 Lucullus Gourmet Shop
沙田新城市廣場3期3樓A323a號舖
2367 1230