尚苑京滬川菜 Top One Palace Club and Chinese Cuisine：舒服至「尚」

又到「開心星期五」，等老婆輕鬆吓，唔煮，出街食，就番佢返工所以揀咗嚟尖東食晚飯。加上想舒舒服服、安安靜靜食餐晚飯，結果就揀咗嚟「尚苑」，貪佢位處尖東一角嘅南洋中心，可以講喺一個比較僻靜嘅場。

餐廳開晌地庫層，落到嚟別有洞天，由於是晚有團體搞聯誼會，所以，絕大部份客人都被安排晌一個廂房內。環境光猛，都喺一般中式酒樓嘅格局，但勝在幾邊都有大電視，啱晒香港人電視撈飯。

唔知喺咪呢晚隔離大廳搞聚會，好似同我晌網上睇到嘅菜式選擇少咗好多，我亦再三問過侍應，確喺得手上呢兩個菜牌。雖然，本身都想試試店家嘅京滬點心，不過，簡簡單單食吓小菜我哋都OK。

先講講啲雜費，嚟得中式酒樓大家都知呢啲嘢，餐前小食「醬油花生」收$20，茗茶就收$18位，我哋仲嗌咗一個白飯，收$20，另需加一服務費。

燻香醬茶鴨 $98

依家做緊優惠，半價就食到，無理由唔叫架。雖然只賣$98，但就無將貨就價，原裝半隻鴨靚靚仔仔砌番出嚟，賣相幾好。入口皮脆肉嫩不特止，確喺好有煙燻香味，加少少皮下油脂，的確好食，老婆都大讚。

椒鹽蒜香白飯魚 $108
平時屋企煮飯都以健康簡單為主，基本喺唔會整啲油炸菜式，所以，老婆口痕痕又想試試呢道菜。份量唔太多，不過，兩個人食都好夠，白飯魚啲肉好嫩滑，面頭鋪滿金蒜，自不然惹味啲，本身已經炸得唔油膩，再沾少少喼汁，食起嚟酸香更清爽。

尚苑小炒王 $128

間間酒樓都有自己配方嘅小炒王，以「尚苑」嘅小炒王用料非常豐富，有鮮蝦、迷你帶子粒、蝦乾、蚌片，再加埋菜脯、韮菜花，炒埋一大碟食落去夠鑊氣，口感豐富，確喺唔錯喎。

今晚兩公婆靜靜侷食餐小炒晚飯，感覺幾唔錯。下次有機會都有諗過約埋啲舊同事嚟呢度聚一聚，因為貪佢近紅磡站，方便住喺新界嘅老友。

個人評分
味道：8/10
環境：8/10
服務：8/10
抵食：8/10
平均每人消費：HK$225

尚苑京滬川菜 Top One Palace Club and Chinese Cuisine
地址：尖沙咀麼地道75號南洋中心LG樓
電話：2868 6898