Outdark：「Out」起當日美味回憶

餐牌內頁唔單止介紹香港分店，更有介紹「Outdark」自己本身嘅故事，原來佢哋喺嚟自韓國釜山，雖然曾經到訪過，不過對上嗰次去釜山已經喺2012年嘅事，今次同個老死嚟到食飯，勾起小弟唔少晌釜山旅遊嘅回憶。

一出電梯就喺餐廳，佈置得好有心思。喺門口嘅牆好似首爾南山塔咁樣掛滿晒情人鎖仔，夠晒浪漫，而裡面最大亮點就喺晌微微燈光之下掛滿好多「星星」，令到整個現場都好有氣氛。

朋友未到，先慢慢睇一睇餐牌有啲咩好揀，有韓色炸雞、芝士鍋、韓式烤肉、炒年糕、街頭小食、煎餅、炒粉絲、麵條、紫菜飯卷、炒飯……等等，而飲品方面，多款梳打特飲、乳酪特飲、汽水、燒酒、啤酒……等等。

此外，最近新出嘅夏日餐單，一面介紹韓國特色嘅菜包肉，另一面就介紹水冷麵，對我嚟講兩樣嘢都唔陌生，以前都試過，不過，炎炎夏日真喺幾有興趣食番個水冷麵啫。

Coolpis 菠蘿乳酪汽水 $20
有時晌啲放題度都會見到啲韓國罐裝嘢飲，反正都知啲梳打大概喺點，所以，小弟貪新鮮試咗呢款原裝汽水，飲落菠蘿味好突出，少少乳酸嘅酸味，配炸雞唔錯喎。

西柚梳打 $48
老友同樣諗住食炸雞，就嗌杯清爽啲嘅凍飲，佢就點咗杯西柚梳打，佢話啱晌佢，因為西柚味道酸酸澀澀，入口夠晒冰涼清爽。

海鮮蔥煎餅 $138
煎餅喺韓國菜也好有特色，頭盤就嚟過煎餅先，揀咗海鮮蔥煎餅，睇樣都見到加咗好多蔥，而裡面又有唔少海鮮餡料，煎得底面都帶點焦香，而且，仲切成一格格，鋪排整齊，方便食用，煎餅咬落軟軟糯糯，好有蔥香，沾上少少自家製醬汁，多添一份鮮味，作為邊傾邊食又邊飲嘅頭盤，喺幾唔錯嘅選擇。

香蒜蜜糖炸雞 $192

韓國炸雞嘅熱潮雖在少少回落，但仍然有好多人喜歡食韓國炸雞，小弟都鍾意。呢度嘅炸雞唔單止淨喺得啲雞，仲配有大量薯條、薯格，炸得香脆又唔油；講返啲炸雞，炸得色澤金黃均勻，最緊要記得趁快食，因為始終都淋上咗一層香蒜蜜糖醬，擺耐咗就會令外層皮變腍，咬落啲雞肉確喺香口，肉質好嫩滑，加上無骨，啖啖肉，食得過癮，沾滿了香蒜蜜糖醬，正呀！全份嘅份量標明有450克，夠晒足秤，大滿足啊！

水冷麵 $138

食完炸雞，最後，就嚟一碗水冷麵降下溫，水冷面有3款配搭，可揀牛肉、豬肉或五花肉，我哋就揀咗牛肉。未食睇見個碗內嘅碎冰就已經有一陣陣透心涼之感，水冷麵嘅特色就喺將啲湯底雪成冰，再鑿碎加落碗麵度，所以，食落非常涼快，而麵條好有韌勁，非常有口感，牛肉炒得幾香口，肉質軟腍又富肉香，沾上少少芥末襯埋個麵，好食。

今晚所點嘅3款菜式，都各有賣點，老友都讚好食，加上環境又唔錯，啲侍應亦好好招呼，菜式份量好足，食到撐住肚皮走。

個人評分
味道：9/10
環境：8/10
服務：9/10
抵食：8/10
平均每人消費：HK$300

餐廳資料：
Outdark
地址：尖沙咀厚福街8號H8 17樓
電話：2722 0831