山區裡的走走趯趯: 魚你相聚：「魚」願以嚐

2024年6月7日星期五

魚你相聚：「魚」願以嚐

雖然老婆就比較鍾意晌屋企煮、晌屋企食，因為覺得自己煮會健康啲，不過，我哋依家大多數嘅星期五都會出街食，一來幫手推動下本土經濟（查實一個禮拜一餐半餐真喺幫唔到幾多），二來都想輕輕鬆鬆食餐飯，乜都唔使搞。經在地好友介紹，今晚就近近哋嚟到「魚你相遇」食下酸菜魚。

餐廳格局細細，雖然喺賣川菜，不過，環境就似茶記，老實講我哋嚟都喺食餐便飯，所以，環境唔喺太大考量點，乾淨企理就可以喇，最緊要喺啲嘢食啫。而成晚所見，大部分時間都有9乘滿，有時候甚至見要等位，睇落亦唔少喺街坊，相信喺有番咁上下質素先會咁旺場。

川菜即喺辣嘢，小弟唔食辣喎，老友喺咪玩嘢，當然唔喺啦，佢話有啲湯底只喺微辣，更有一款喺唔辣嘅蕃茄湯底。魚類嘅選擇多，啲一人套餐嘅配搭又夠彈性，此外，仲有煲仔飯、小食、大大盤嘅酸菜魚，好多選擇，定價亦唔算貴。

鱸魚片配蕃茄濃湯 $76
唔使多講，老婆就一定喺揀呢一款蕃茄濃湯，選上鱸魚就貪佢魚味濃啲，又比較鮮甜，而配料就揀豆腐皮、娃娃菜，佢話唔使要主食，阿姐就話可以揀多款配料，就搭埋萵筍，阿姐處理得夠彈性。個蕃茄濃湯幾唔錯，蕃茄味突出，濃郁酸香，飲落好醒神。萵筍薄薄哋仲有份爽脆感，豆腐皮好似啲上海百頁咁，煙韌有豆香，初時以為喺類似港式嘅腐皮，而主角鱸魚入口非常之嫩滑，好有魚鮮味，十分鮮甜，整道菜式極之啱老婆口味。

鯛魚片檸檬酸菜湯 $76
我就對呢個檸檬酸菜湯非常有興趣，加上佢標註只喺一隻細辣椒辣度，問過侍應都話唔會好辣，再加上嚟到啲紅卜卜嘅辣椒放喺面，可以夾走減辣嘅，就會變得辣度更溫和。我再將啲檸檬篤爛去，攪勻之後個湯真喺非常有特色，酸酸辣辣再有啲清爽感。配菜揀咗生菜同黑木耳，仲混有唔少酸菜，主食選米線，一大碗米線另碗上，夠晒我哋兩公婆食，米線口感滑溜，掛上湯底，好好味。我就揀咗配鯛魚片，同樣好嫩滑，有少少爽脆感，一樣咁好食。溫馨提示，啲魚有機會有少少細骨，食嘅時候都要小心啲。